ജോക്കർ [ആൽബി] 1094

ആ മോളോ, ഇതെന്നാ വീണ്ടും. ഞാൻ വിചാരിച്ചു ആ വഴി പോയിക്കാണുമെന്ന്.

അങ്ങനെ പറ്റില്ലല്ലോ അമ്മേ.അവൻ ഇപ്പോൾ വന്നേ ഉള്ളോ??

നല്ല കോലത്തിലാ വന്നു കേറിയെ. കുറെ തറുതലേം പറഞ്ഞു കേറിക്കിടന്നു.

എന്തുപറ്റി അമ്മേ?എന്താ പ്രശ്നം?ചായ കുടിക്കുന്നതിനിടെ അവൾ ചോദിച്ചു.

അറിയില്ല മോളെ. ഇന്നലെ കിടക്കുമ്പോഴും സന്തോഷത്തിൽ ആയിരുന്നു. ഇന്നു രാവിലെയാ ഇങ്ങനെ. ഒന്നും കഴിക്കാണ്ടാ ഇറങ്ങിപ്പോയെ. ഞാനോർത്തു,അവിടെ മോളോടൊപ്പം വല്ലോം കഴിക്കുവാരിക്കും എന്ന്. പക്ഷെ….

മ്മം,എന്നാ ഞാൻ ഇറങ്ങട്ടെ. പപ്പയോടു പറയാണ്ടാ വന്നേ. നാളെ സൺ‌ഡേ അല്ലെ, ഞാൻ വരാം.അവനോട് ഞാൻ സംസാരിച്ചോളാം.അമ്മ ഒന്നും ചോദിക്കണ്ട.

എന്നാ ശാരിമോളെ. വൈകണ്ട.

പിന്നെ നാളെ നല്ല ഡക്ക് റോസ്‌റ്റ് വേണോട്ടോ,ഗ്രേസിക്കൊരു ഉമ്മയും കൊടുത്തിറങ്ങുമ്പോൾ അവൾ പറഞ്ഞു.

എന്റെ മോൾക്ക് എന്നാന്നു വച്ചാൽ ഉണ്ടാക്കി വച്ചേക്കാം. അമ്മ സാന്ദ്രയെ യാത്രയാക്കി.

ഈ സമയം മുറിയിൽ ആന്റണിയുടെ ചിന്തകൾ പിറകിലേക്ക് പോയി.സാന്ദ്ര തന്റെ ജീവിതത്തിന്റെ ഭാഗമായത് ഓരോന്നായി അവന്റെ മനസ്സിലേക്ക് ഓടിയെത്തി.
……
ബിയയും വിമലും പോയതിൽ പിന്നെ ഒരുതരം ഒറ്റപ്പെടലിൽ ആയിരുന്നു ആന്റണി.ജോബി,സംഗീത്, ജോഷി. ഇവർ കുറച്ചുനാൾ കൂടി അവിടെ തുടർന്നു എങ്കിലും അവരും ജോലി മാറി.സിനിക്ക് അവനോട് കൂടെ നിൽക്കണം എന്നുണ്ടായിരുന്നു എങ്കിലും കല്യാണത്തോടെ അവളും അവിടം വിട്ടു.ഇടക്ക് പതിവായിരുന്ന മദ്യം അവന്റെ ഉറ്റ ചങ്ങാതിയായി.ഇതിനിടയിൽ നമിത്തിന് നാട്ടിൽ സെറ്റിൽ ആവേണ്ട സ്ഥിതി വന്നതിനാൽ അവന്റെ ആകെയുള്ള ആശ്വാസവും നഷ്ടമായി. ഡിപ്പാർട്മെന്റ് അവന്റെ ചുമലിലായി.ഓരോ ദിവസവും പരിഹാസത്തോടെ നോക്കുന്ന പരിചിതർ. ഒളിഞ്ഞും തെളിഞ്ഞും അവനെ കോമാളിയായി ചിത്രീകരിച്ചു.ഒരു പെണ്ണിന്റെ കൊഞ്ചിക്കുഴയലിൽ തന്റെ സ്വപ്‌നങ്ങൾ അടിയറവു വച്ച അവനെ ചീട്ടുകൊട്ടാരത്തിലെ കോമാളി എന്നവർ വിളിച്ചു. അവരുടെ നേരമ്പോക്കുകളിൽ ആ കോമാളി ഒരു കഥാപാത്രമായി.അവൻ തന്റെ ജോലിസമയത്തും തന്റെ പുതിയ മിത്രത്തെ കൂടെ കൂട്ടി.

പതിവുപോലെ രണ്ടെണ്ണം അടിച്ചിട്ട് അവൻ ഡ്യൂട്ടിക്ക് എത്തി. ഇപ്പോൾ അവന്റെ കീഴിൽ രണ്ടു പുതിയ കുട്ടികൾ എത്തി ബംഗാൾ സ്വദേശി കാമിയും, ഡെൽഹിക്കാരി ശ്വേതയും. ആന്റണിയുടെ പാസ്റ്റ് അറിഞ്ഞിരുന്ന അവർ അവന്റെ ജോലിയിൽ പ്രൊട്ടക്ട് ചെയ്തുനിർത്തി.പക്ഷെ അവൻ അവരോടു ഒരു അകലം പാലിച്ചുനിന്നു. അന്നേ ദിവസം ട്രൈനിങ്ങിന്റെ ഭാഗമായി എമർജൻസി കോഡ് പിങ്ക് അനൗൺസ് ചെയ്തിട്ട് അവൻ പീഡിയാട്രിക് വിഭാഗത്തിൽ റെസ്പോൺസ് നോക്കുകയായിരുന്നു.അപ്പോൾ ആണ് ഒരു പെൺകുട്ടി ഡോർ തുറന്ന് പുറത്തേക്ക് ഇറങ്ങാൻ ശ്രമിക്കുന്നത്.

എക്സ്ക്യൂസ്‌ മി മാഡം, അവൻ അവരെ തടഞ്ഞു.