ജോക്കർ [ആൽബി] 1094

ജോലിക്ക് ചെല്ലാതെ,ഒരു ലീവ് പോലും പറയാതെ രാവിലെ മുതൽ അടി തുടങ്ങിയിരുന്ന ആന്റണിയെ അന്വേഷിച്ചു,തന്റെ ഒപി തിരക്കിട്ടു തീർത്തു അവന്റെ വീട്ടിൽ എത്തിയതാണ് ഡോക്ടർ സാന്ദ്ര ചെറിയാൻ.അവിടെ കാണാതെ തനിക്കറിവുള്ള പതിവ് സ്ഥലങ്ങളിലും അന്വേഷിച്ചു വരുമ്പോഴാണ് അവൻ പോവാറുള്ള ബാറിൽ അവന്റെ ബൈക്ക് ശ്രദ്ധയിൽ പെട്ടത്. പിന്നെ വണ്ടി ഒതുക്കി അകത്തേക്ക് കയറി.അവനെ കണ്ടപാടെ നല്ലൊരു സമ്മാനം കൊടുത്തു അവൾ.

അവൾ കയറിവരുമ്പോഴേ, ഇതെന്താ കഥ എന്ന് കരുതി പിറുപിറുത്തുകൊണ്ടിരുന്ന കുടിയന്മാർ നിശബ്ദരായി. നീല വെളിച്ചം തളം കെട്ടിനിന്ന ആ ബാറിൽ നിശബ്ദതയുടെ നിഴൽ വീണു.

ഡാ, നശിക്കാൻ തീരുമാനിച്ചവനെ ആരെന്നല്ല, ഒടേതമ്പുരാൻ വിചാരിച്ചാലും രക്ഷിക്കാൻ പറ്റില്ല. ഓർത്തുവച്ചോ നീ. സാന്ദ്രയാ പറയുന്നേ… അവന്റെ നേരെ കൈചൂണ്ടി അവൾ പറഞ്ഞു.

റോയ് ചേട്ടാ, ഇവിടുള്ളത് മുഴുവൻ അവന്റെ അണ്ണാക്കിലേക്ക് ഒഴിച്ചുകൊടുക്ക്, കുടിക്കട്ടെ.കുടിച്ചു നശിക്കട്ടെ.

പിന്നെ നീ ഒന്നു കൂടെ ഓർത്തോ ഇനി നീ സാന്ദ്രയെ കാണില്ല. എനിക്കിനി നിന്നെ കാണണ്ട. അവൾ തിരിഞ്ഞു നടന്നു.

ആ ഒരു നിമിഷത്തിൽ എന്തെങ്കിലും പറയാനോ അവളെ തടയാനോ അവനു കഴിഞ്ഞില്ല. അവളുടെ പോക്ക് നോക്കി നിൽക്കുവാനല്ലാതെ.

സീൻ കോൺട്ര ആയതുകൊണ്ട് അവൻ അവിടെ നിന്നില്ല.ബാറിൽ സെറ്റിൽ ചെയ്ത് എങ്ങനെയോ വീട്ടിലെത്തി.ബൈക്കിൽ നിന്നും ഇറങ്ങി നടക്കാൻ പാടുപെട്ട അവനെക്കണ്ടു മുറ്റത്തെന്തോ ചെയ്യുകയായിരുന്ന അമ്മ അവനെ വന്ന് പിടിച്ചു.

എവിടാരുന്നു നീ?? നീയെന്താ ഇന്നു പോവാഞ്ഞത്?? ഇതെന്താ ഇപ്പൊ ഇങ്ങനെ കുടിച്ചു വരാൻ എന്താ ഉണ്ടായേ??

അമ്മ ഒന്നു പോകുന്നുണ്ടോ.ഞാൻ ചിലപ്പോൾ ജോലിക്ക് പോയില്ലെന്നിരിക്കും, തോന്നുമ്പോൾ കുടിക്കും. അതിന് ആർക്കാ ചേതം.

ഒറ്റ വീക്കിട്ടു തന്നാലുണ്ടല്ലോ,നാവിനു എല്ലില്ലാ എന്നുകരുതി എന്റെ അടുത്ത് വല്ലോം പറഞ്ഞാ പൊട്ടീരു തരും ഞാൻ.

ആ, വിടാൻ ഞാൻ പൊക്കോളാം. അവൻ അമ്മയുടെ കൈവിടുവിച്ചു മുറിയിലേക്ക് പോയി.

അന്തോണി. രാവിലെ സാന്ദ്രമോൾ വന്നിരുന്നു,നിന്നെ തിരക്കി.

അവൻ മറുപടി ഒന്നും നൽകാതെ ഡോർ വലിച്ചടച്ചു കട്ടിലിലേക്ക് വീണു.
……..

കാറിന്റെ ഹോൺ ശബ്ദം കേട്ട് ഗ്രേസി മുറ്റത്തേക്കിറങ്ങി.ഗൗരവം വിടാതെ ഡോർ തുറന്ന് സാന്ദ്ര അടുത്തേക്ക് വന്നു.