ചെകുത്താന്‍ വനം 7 

Author : Cyril

[ Previous Part ]

 

 

പ്രിയ കൂട്ടുകാരെ,
അടുത്ത് വരുന്ന part എട്ടില്‍ ചെകുത്താന്‍ വനം കഥ അവസാനിക്കും. എന്റെ കഥ വായിച്ച, വായിക്കുന്ന എല്ലാവർക്കും നന്ദി. ഇതുവരെ കമെന്റിലൂടെ നിങ്ങളുടെ അഭിപ്രായങ്ങളും പ്രോത്സാഹനവും നല്‍കിയ എല്ലാവർക്കും പ്രത്യേക നന്ദി ഞാൻ അറിയിക്കുന്നു.
*********************************************************

 

ഗിയ ചിരിച്ചു. “വെറും കുറഞ്ഞ കാലയളവില്‍ നി എത്ര ശക്തനായി മാറി കഴിഞ്ഞിരിക്കുന്നു! ഇന്ന് നിങ്ങൾ മൂന്ന് പേരും ചെയ്തത് അത്ര നിസ്സാരമായ കാര്യമല്ല എന്ന് അറിയാമോ?”

“അറിയാം. ഞാൻ വന്നത് ഒരു ഉപകാരം ആവശ്യപ്പെട്ട് കൊണ്ടാണ്.” ഞാൻ പറഞ്ഞു.

“മഹാ ശക്തനായ നി എന്നോട് ഉപകാരം ആവശ്യപ്പെടുന്നത്‌ എന്നെ അത്ഭുതപ്പെടുത്തുന്നു. എനിക്ക് കേൾക്കാൻ തിടുക്കമായി.” ഗിയ ഒരു ചിരിയോടെ പറഞ്ഞു.

മറുപടിയായി എന്റെ രണ്ട് കൈയും ഞാൻ മുന്നോട്ട് നീട്ടി. ഉടനെ എന്റെ രണ്ട് കൈയിലും രണ്ട് കുഞ്ഞ് ഗോളങ്ങൾ പ്രത്യക്ഷപെട്ടു.

“ഒന്നില്‍ എന്റെ രക്തവും മറ്റത്തില്‍ എന്റെ ജീവ ജ്യോതിയിൽ നിന്നും എടുത്ത എന്റെ ഉന്നത ശക്തിയും ആണ്. ഇത് രണ്ടും എന്റെ അമ്മയെ ഏല്‍പ്പിക്കണം.” ഞാൻ പറഞ്ഞു.

ഗിയയുടെ മുഖം വിളറി. “നി ചെയ്യുന്നത് എന്താണെന്ന് നിനക്ക് അറിയാമോ റോബി?” ഗിയ ആശങ്കയോടെ ചോദിച്ചു.

“അറിയാം, എന്റെ രക്തവും, എന്റെ ജീവ ജ്യോതി ശക്തിയും പ്രപഞ്ച വാളിനെ ഒരു ഉന്നത ശക്തിയുള്ള വാളായി മാറ്റും.” ഞാൻ പറഞ്ഞു.

“അത് മാത്രമല്ല…. ആ വാളിന് —” ഗിയ തുടങ്ങി പക്ഷേ ഞാൻ ഗിയയെ തടഞ്ഞു.

“ആ വാള്‍ കൊണ്ട് എന്ത് ചെയ്യാൻ കഴിയുമെന്ന് എനിക്കറിയാം…..” ഞാൻ പറഞ്ഞു.

ഇപ്പോഴും എന്റെ കൈകൾ നീട്ടി പിടിച്ചു കൊണ്ട് തന്നെ ഞാൻ നിന്നു. അവസാനം ഗിയ വേദനയോടെ അതിനെ വാങ്ങി.

ഇപ്പോൾ എന്റെ മനസ്സ് ശാന്തമാണ്. പെട്ടന്ന് തന്നെ ലോകവേന്തൻ ഉണരും. മെറോഹ്റിയസും ആരണ്യയും തമ്മിലുള്ള ഏറ്റുമുട്ടല്‍ ഒഴിവാക്കാൻ കഴിയാതെ പോയത് പോലെ, ഞാനും ലോകവേന്തനും തമ്മിലുള്ള യുദ്ധം ഒരിക്കലും ഒഴിവാക്കാൻ കഴിയില്ല.

അവസാന നിമിഷം ആരണ്യയെ മന്ത്ര ഭക്ഷിനി രക്ഷിച്ചു….. പക്ഷേ എന്നെ ആര് രക്ഷിക്കും……?

എന്റെ കൈയിൽ നിന്നും വാങ്ങിയ രണ്ട് കുഞ്ഞ് ഗോളങ്ങളും ഗിയയുടെ കൈകളിൽ നിന്നും അപ്രത്യക്ഷമായി.

“പെട്ടന്ന് തന്നെ ലോകവേന്തൻ ഉണരും…..” ഗിയ പറഞ്ഞു.

“അവന്‍ ആദ്യം തിരക്കി വരുന്നത് രൗത്രികയെ യായിരിക്കും…. രൗത്രിക ഒരിക്കലും അവന്റെ കൈയിൽ അകപ്പെടാൻ പാടില്ല…. അങ്ങനെ സംഭവിച്ചാല്‍ പിന്നെ ലോകവേന്തനെ ഒരു ശക്തിക്കും നശിപ്പിക്കാന്‍ കഴിയില്ല.” ഞാൻ പറഞ്ഞു.

“ഇതിന്‌ ഒരു പരിഹാരം മാത്രമാണ്‌ ഞാൻ കാണുന്നത്, റോബി!”

ഗിയയെ ഞാൻ തറപ്പിച്ചു നോക്കി. എന്നിട്ട് കോപത്തോടെ ഞാൻ പറഞ്ഞു, “നിങ്ങളുടെ പരിഹാര മാര്‍ഗ്ഗത്തോട് ഞാൻ യോജിക്കുന്നില്ല, ഗിയ. രൗത്രികയെ കൊല്ലാന്‍ ഞാൻ തയ്യാറല്ല…. കൊല്ലാന്‍ നിങ്ങളെയും ഞാൻ അനുവദിക്കില്ല.”

വിഷാദം നിറഞ്ഞ കണ്ണുകളോടെ ഗിയ എന്നെ നോക്കി. ഞാൻ ഗിയയെ കോപത്തോടെ നോക്കി നിന്നു.

“ഇപ്പഴേ ലോകവേന്തൻ ഉന്നത ശക്തിയുള്ള അതി ശക്തനായി മാറി കഴിഞ്ഞു, റോബി. ഒരുപക്ഷേ നിങ്ങൾ രണ്ട് പേരും തുല്യ ശക്തരായിരിക്കും. അങ്ങനെ ആണെങ്കിൽ — ഈ പ്രപഞ്ചത്തെ നശിപ്പിക്കാന്‍ നടത്തുന്ന അവന്റെ എല്ലാ ശ്രമത്തെയും നിനക്ക് തടയാൻ കഴിയും. പക്ഷേ രൗത്രിക അവന്റെ കൈയിൽ അകപ്പെട്ടാൽ, രൗത്രികയുടെ ജീവനുള്ള ഹൃദയത്തെ അവന്‍ ഭക്ഷിച്ച് അവനില്‍ ഉള്ള ഉന്നത ശക്തിയെ കളങ്കപ്പെടുത്തി ഉന്നത ശക്തിക്ക് തുല്യമായ പുതിയൊരു ശക്തിയായി അവന്‍ പരിണമിക്കും. അതാണോ നിനക്ക് വേണ്ടത്….?” ശാഠ്യം പിടിക്കുന്ന കുഞ്ഞിനോട് എന്ന പോലെ ഗിയ കടുപ്പിച്ച് ചോദിച്ചു.