ഒന്നും ഉരിയാടാതെ 36

Onnum uriyadathe

Author : നൗഫു ||| ഒന്നും ഉരിയാടാതെ 35

 

 

ടിക് ടിക് ടിക്… ബീപ്.. ബീപ്

 

ഒട്ടും പരിചമില്ലാത്ത ശബ്ദം കേട്ട് ഒരുറക്കത്തില്‍ നിന്നെന്ന പോലെ ഞാന്‍ ഞെട്ടിയുണര്‍ന്നു.. കണ്ണുകള്‍ ശരിക്കും തുറക്കാന്‍ കഴിയുന്നില്ല.. പാതി മാത്രം തുറന്ന കണ്ണുകള്‍ ഞാന്‍ ചുറ്റിലും ഓടിച്ചു.. ഞാൻ ഏതോ റൂമിൽ കിടക്കുകയാണ്… എന്റെ ശരീരം മുഴുവൻ ഓരോ വയറുകൾ ഘടിപ്പിച്ചിട്ടുണ്ട്… ആ വയറുകൾ കുത്തിയ യന്ത്രത്തില്‍ നിന്നാണ് ഞാനാ ശബ്ദം കേൾക്കുന്നത്…

 

റൂമിൽ നല്ല തണുപ്പ്.. ശക്തമായ തലവേദനയുണ്ട്.. ഞാൻ എവിടെയാണ് കിടക്കുന്നത്… എങ്ങിനെ ഞാനിവിടെയെത്തി.. പാതിമാത്രം തുറന്ന കണ്ണുകള്‍ മുഴുവൻ തുറക്കുവാൻ ശ്രമിച്ചു കൊണ്ട് എന്താണ് സംഭവിച്ചതെന്നു ഓര്‍ത്തെടുക്കാന്‍ ഞാന്‍ ശ്രമിച്ചു കൊണ്ടിരുന്നു …

 

 

ടിക് ടിക് ടിക്… ബീപ്.. ബീപ്

 

മെല്ലെ തുറന്ന കണ്ണുകളോടെ ഞാൻ ചുറ്റിലും നോക്കി…

 

ഞാൻ ഒരു ഹോസ്പിറ്റലിൽ ആണെന്ന് എനിക്ക് മനസിലായി.. എന്റെ ശരീരത്തിൽ എന്തെല്ലാമോ മേസീനുകളും വയറുകളും ഘടിപ്പിച്ചിട്ടുണ്ട്.. കുറച്ചു മാത്രം മാറി രണ്ടു നെയ്സു മാർ ഇരിക്കുന്നുണ്ട്.. അതിൽ ഒരാൾ അടുത്തുള്ള മേശയിൽ തല വെച്ച് ഉറങ്ങുന്നു.. ഒരാൾ ഏതോ പുസ്തകം വായനയിൽ ആണ്..