ഒന്നും ഉരിയാടാതെ [നൗഫു] 4790

“എന്റെ പെങ്ങളെ അളിയൻ കൊണ്ടാക്കി.. പക്ഷെ ഓളിന്ന് രാവിലെ തന്നെ തിരികെ പോയി..”

“അതെന്ത് പറ്റി മനാഫ്..”

“ഒന്നും പറയണ്ട അളിയാ.. അവൾക് വയറ്റിലുണ്ട്, ഞാൻ ഇതൊന്നും അറിയാതെ അവളെ കണ്ട സന്തോഷത്തിൽ രാത്രി ഓടിച്ചെന്ന് കെട്ടിപ്പിടിച്ചു.. ഇന്നലത്തെ പണിയുടെ മണം അടിച്ചപ്പോൾ തന്നെ ഓള് ഛർദിൽ തുടങ്ങി.. ഹോ.. അങ്ങനെ ഓള് പെട്ടിയുമെടുത് രാവിലെ വിട്ടു..”

“ഹ ഹ ഹ.. അത് പൊളിച്ചു.. സമാധാനം ഉണ്ട് എന്റെ വീട്ടിൽ പിന്നെ ഞാൻ ഒരാള് മാത്രമേ ഉള്ളു.. അതും പറഞ്ഞു ആഷിക് ചിരി തുടങ്ങി…”

“ടാ.. ചിരിച്ചോണ്ട് നിൽക്കാതെ വേഗം പണി കഴിക്കാൻ നോക്കാം.. പത്തു മണി ആകാൻ ആയി.. രാവിലെ നാല് മണിക്ക് മുന്നേ എത്തിക്കണം.. ഉസ്മാൻ ഹാജി വളരെ സ്ട്രോങ്ങ്‌ ആണ്..” ആഷിക്കിന്റെ ചിരി നിർത്തിച്ചു കൊണ്ട് ഞാൻ പറഞ്ഞു..

“ടാ, ഉനൈസേ ഈ ഉസ്മാൻ ഹാജി നിന്റെ മാമൻ അല്ലേ..”

“അതേ മൂപരുടെ മോളെ കല്യാണമാണ് ഇന്ന്..”

“ആരെ…??”

❤️❤️❤️

ബിരിയാണിക് ഉള്ളതും പൊരിക്കാനുള്ളതും ബ്രോസ്റ്റ് ആയി വെക്കാനുള്ളതുമായ കോഴി പീസുകൾ നാല് മണിക്ക് മുമ്പേ തന്നെ മൂന്നു പേരും അവരുടെ പെട്ടി ഓട്ടോയിൽ കല്യാണവീട്ടിൽ എത്തിച്ചു..

അവിടെ നിന്നും ഉമ്മയുടെ കയ്യിലെ ചാവി വേടിച്ചു കൊണ്ട് ഞാൻ വീട്ടിലേക് പുറപ്പെട്ടു.. ഒരു കുളി കഴിഞ്ഞു ഉറങ്ങി തീർക്കാൻ…

❤️❤️❤️

പ്ടാ…

തന്റെ ശരീരത്തിൽ ബെൽറ്റ്‌ കൊണ്ടുള്ള അടിയുടെ വേദന അറിഞ്ഞിട്ടാണ് ഞാൻ ഉറക്കത്തിൽ നിന്നും ഞെട്ടി എഴുന്നേൽക്കുന്നത്.. കലി തുള്ളിക്കൊണ്ട് രണ്ട് ഇക്കാക്കമാരും റൂമിൽ നിൽക്കുന്നു..