എന്റെ ബാല്യകാല സ്മരണകൾ… [മേനോൻ കുട്ടി] 52

കാരണം പറയാതെ അറിയാല്ലോ. മാഷ് നല്ലോണം തല്ലും. എല്ലാര്‍ക്കും നല്ല പോലെ തല്ലു കിട്ടിട്ടുണ്ട്.
ഞാനും തല്ലു വാങ്ങാന്‍ ഒട്ടും മോശമല്ലായിരുന്നു.
മാഷിന്‍റെ ചില ചോദ്യങ്ങള്‍ കുഴപ്പിക്കാറുണ്ട്.
തല്ലിന്‍റെ കാര്യം പറഞ്ഞല്ലോ.
വടി കൊണ്ട് മാത്രമല്ല പുള്ളിയുടെ ആ വലിയ കൈകൊണ്ട് ചന്തിക്ക് ആയിരുന്നു പെട… പെട എന്നുപറഞ്ഞാൽ കണ്ണിൽ നിന്ന് പൊനീച്ച പറക്കും അമ്മാതിരി പെട. പക്ഷെ അന്നത്തെ ആ തല്ലുകൊണ്ടത് കൊണ്ട് ഇന്ന് അത്യാവശ്യം കൂട്ടാനും ഗുണിക്കാനും അറിയാം… അതിന് മാഷോട് നന്ദി പറയണം. പാവം മാഷ്….

അന്ന് കുറച്ചു പെണ്‍കുട്ടികളും ഞങ്ങടെ കൂട്ടത്തില്‍ ഉണ്ടായിരുന്നു. അന്നും പെണ്‍കുട്ടികളുടെ മുന്‍പില്‍ വല്യ ആളാവാനായി കാണിക്കുന്ന ഓരോരോ വികൃതികള് ഉണ്ട്, ഇന്നത്തെ പോലെ തന്നെ.അന്ന് സ്കൂള്‍ വിട്ടു വരുമ്പോ കാണിക്കുന്ന ഓരോ രസങ്ങൾ… അന്നത്തെ ഹീറോ കളികൾ പലപ്പോഴും കൂട്ടത്തലിൽ ആയിരിക്കും അവസാനിക്കുന്നത്. എങ്കിലും അതൊക്കെ നിമിഷനേരത്തേക്ക് മാത്രമായിരിക്കും… വീണ്ടും തോളിൽ കൈയിട്ടും കെട്ടിപിടിച്ചും പരസ്പരം വാരിയും കഥകൾ പറഞ്ഞും പഴയപോലെ ആയിട്ടുണ്ടാകും. അതിനുകാരണം അന്നത്തെ അടിപിടികൾ പ്രണയം പോലെ തന്നെ നിഷ്കളങ്കമായിരുന്നത് കൊണ്ടായിരിക്കണം…. അറിയില്ല……

നാട്ടിലും സ്കൂളിലും കുറെ കൂട്ടുകാര്‍ ഉണ്ടായിരുന്നെങ്കിലും എനിക്ക് ചില പരിഭവങ്ങളൊക്കെ ഉണ്ടായിരുന്നു കേട്ടോ…
വളരെ അവിചാരിതമായാണ് എനിക്ക് ഒരു കളിക്കൂട്ടുകാരിയെ കിട്ടിയത്. എന്റെ അയൽവാസി ആയിരുന്ന കുട്ടി. കൂട്ടത്തില്‍ കളിക്കുമ്പോള്‍ അവളെന്നെ ശ്രദ്ധിക്കാറുണ്ട് എന്നെനിക്കു അറിയാമായിരുന്നു.
എല്ലാ കാര്യത്തിനും അവളെനിക്കു സപ്പോര്‍ട്ട് ചെയ്യുമായിരുന്നു. എങ്കിലും ഞാന്‍ ഒന്നും കാണുന്നില്ല എന്ന മട്ടില്‍ പെരുമാറി.
സത്യത്തില്‍ എന്‍റെ ഒരു കണ്ണ് എപ്പോളും അവളിലാരുന്നു, അവളറിയാതെ.
ഒളിച്ചു കളിക്കുമ്പോ ഞാന്‍ അറിഞ്ഞു കൊണ്ട് അവള്‍ക്കു വേണ്ടി തോറ്റു കൊടുക്കാറുണ്ട്.
എന്തിനായിരിക്കാം ഞാന്‍ അങ്ങനെ ചെയ്തത്.
എനിക്കറിയില്ല. എന്നാൽ അവളും മോശക്കാരിയല്ല, ഞാന്‍ തോല്‍ക്കാന്‍ അവളും സമ്മതിക്കില്ല. അവൾക്കും എന്നെ ഇഷ്ടമായെന്നിരിക്കണം…
ഈ ഒളിച്ചുകളി കുറെ നാള്‍ തുടര്‍ന്നു….
ഇതിനൊരു മാറ്റം വരാന്‍ എനിക്ക് ഒന്ന് വീഴേണ്ടി വന്നു. സൈക്കിൾ ചവിട്ടാൻ പഠിക്കുന്ന കാലമായിരുന്നു അന്ന്. അന്ന് എന്‍റെ കാല് കുറച്ചു മുറിഞ്ഞു രക്തം വന്നു. എന്‍റെ അരികില്‍ എല്ലാര്‍ക്കുമൊപ്പം അവളും ഉണ്ടായിരുന്നു.
ആ കുഞ്ഞു മനസ്സ് പിടയുന്നത് ഞാന്‍ നേരില്‍ കണ്ടു. അത് എനിക്കും വിഷമമുണ്ടാക്കി….
പിന്നെ രണ്ടു ദിവസം ഞാന്‍ കളിയ്ക്കാന്‍ ഉണ്ടായിരുന്നില്ല. രണ്ടു കുരുന്നു മനസ്സ് പരസ്പരം അറിയാതെ വേദനിച്ചു.