എന്റെ ബാല്യകാല സ്മരണകൾ… [മേനോൻ കുട്ടി] 52

നാട്ടിൽ ഒരു ചെറിയ കുളമൊക്കെ ഉണ്ട്…,
ചെറുപ്പത്തിൽ അധികവും കുളിയൊക്കെ അവിടെ നിന്നാണ്. ചിലപ്പോളൊക്കെ കുളത്തിന്റെ കരയിലിരുന്നു കല്ലുകൾ പെറുക്കി കുളത്തിലേക്ക് ചെരിച്ച് എറിഞ്ഞു കളിക്കുമായിരുന്നു…
സായാഹ്നങ്ങളില്‍ ആരുന്നു മിക്കവാറും ആ തമാശകള്‍. കല്ലുകൾ അധികവും പരന്നതായിരിക്കും അപ്പോൾ അവ ചാടി ചാടി തവള കണക്കെ പോകുന്നത് കണ്ട് രസിക്കും…അന്നത്തെ ഓരോ വട്ടുകൾ…
പിന്നീട് ഒരുമിച്ച് കുളത്തിൽ ഇറങ്ങി കുളിക്കുകയും കുളത്തിന്റെ കൂപ്പിൽ നിന്ന് ചാടിയും മുങ്ങാം കുഴിയിട്ടും മത്സരിച്ചു നീന്തികളിച്ചും ആഘോഷമാണ്…
വെള്ളത്തിൽ കിടന്നുള്ള ആ കുത്തിമറിച്ചിൽ തീരുന്നത്
അമ്മമാരുടെ നീട്ടിയുള്ള ചിത്തവിളി കേൾക്കുന്നത് വരെ ആണ്. ചിലപ്പോൾ പുളി വടിയുടെ ചൂടറിഞ്ഞിട്ടാകും വീട്ടിൽ കയറുന്നത് തന്നെ!

വേനലവധിക്ക് അമ്മവീട്ടിൽ പോകാൻ വാശി ആയിരുന്നു… ചിപ്പോഴൊക്കെ പട്ടിണി കിടന്ന് പ്രതിഷേധിക്കും… അവിടുന്ന് ബന്ധുക്കൾ ആരെങ്കിലും വന്നു പോയാൽ പിന്നെ സങ്കടമാണ് കൂടെ കൊണ്ടുപോയില്ലെങ്കിൽ പിന്നെ അന്ന് അത്താഴം പോലും കഴിക്കാതെ തെറ്റികിടക്കും… ഒടുവിൽ കുസൃതി ഒന്നും ഒപ്പിക്കാതെ നിന്നോളം എന്നുള്ള ഉറപ്പിൻമേൽ കൊണ്ടാക്കിത്തരാം എന്ന് പറഞ്ഞാലാണ് പ്രതിക്ഷേധ സമരം ഒത്തു തീർപ്പാകുന്നത്… ഇങ്ങിനെ പ്രതിക്ഷേധിച്ചു പോകാൻ വാശിപിടിക്കാൻ കാരണം എന്താണെന്ന് വച്ചാൽ അവിടെ ബന്ധുക്കളായ സമപ്രായക്കാർ കുറേപേർ ഉണ്ടാക്കും… മാവിൻ കൊമ്പിൽ ഊഞ്ഞാൽ കെട്ടി ആടിയും കുട്ടിപുര വച്ചു അച്ഛനും അമ്മയും കളിച്ചും കളിമണ്ണിൽ അപ്പവും അടയും ചുട്ടും ഓല ചീന്തിൽ നാടൻ കളിപ്പാട്ടങ്ങൾ ഉണ്ടാക്കിയും തല്ലുപിടിച്ചും രണ്ടുമാസം നീണ്ടുനിൽക്കുന്ന വേനലവധി ദിവസങ്ങൾ കൊഴിഞ്ഞുപോകുന്നത് അറിയുകപോലും ഇല്ല…

കുസൃതികള്‍ നിറഞ്ഞ കുട്ടിക്കാലം കുറെ വേദനിപ്പിക്കുന്ന ഓർമകളും സമ്മാനിച്ചിട്ടുണ്ട്…
വിഷുകാലം ഒരുപാട് ഇഷ്ട്ടമായിരുന്നു അന്നൊക്കെ… പ്രധാന കാരണം കൈനീട്ടം കിട്ടും എന്നുള്ളതാണെങ്കിൽ പോലും…

അന്നൊക്കെ കണിക്കൊന്നക്കായി തലേദിവസം നാട് നീളേ ഓടിയതിനു കൈയും കണക്കും ഇല്ലായിരുന്നു.എത്ര കഷ്ട്ടപ്പെട്ടിട്ടായാലും ഒരുപിടി കാണിക്കൊന്നയുമായെ ഒടുവിൽ വീട്ടിൽ എത്തുകയുള്ളു. കണിവെള്ളരി ഉൾപ്പെടെ പച്ചക്കറികൾ എല്ലാം സ്വന്തം പറമ്പിൽ നിന്ന് തന്നെ ശേഖരിക്കും. അമ്മയും മുത്തശ്ശിയും ആണ് വീട്ടിൽ കണിയൊരുക്കുന്നത്. കാലത്ത് അവർ ഒരുക്കിയ വിഷുകണി കാണിക്കാൻ അമ്മ ഒരോരുത്തരെയായി കണ്ണുപൊത്തി കൂട്ടികൊണ്ട് പോകും… കണിക്കണ്ടു പ്രാർത്ഥിച്ച ശേഷം മുത്തശ്ശൻ എല്ലാവർക്കും വിഷു കൈനീട്ടം നൽക്കും… ഒരുപാട് ഒന്നും ഇല്ലാട്ടോ അന്നൊക്കെ അഞ്ചു രൂപയുടെ കോയിൻ ആണ് കൈനീട്ടം തരിക… കാര്യമായി വലതും തടയണമെങ്കിൽ അച്ഛൻ തന്നെ തരണം. പുള്ളി അന്നും ഇന്നും നൂറുരൂപയിൽ കുറഞ്ഞൊരു കൈനീട്ടം തന്നിട്ടില്ല… അതിനു ശേഷം എല്ലാരും കൂടെ ഉമ്മറകോലായിൽ ഇരുന്ന് പടക്കങ്ങൾ പൊട്ടിച്ചും പൂത്തിരി കത്തിച്ചും വിഷുപുലരി ആഘോഷിക്കും. പടക്കങ്ങൾ ഇന്നത്തെ പോലെ അന്നും എനിക്ക് ഒരു വീക്നെസ് ആയിരുന്നു… ഏട്ടന്മാർ ഓലപ്പടക്കങ്ങൾ കൈയിൽ എടുത്തെറിഞ്ഞു പൊട്ടിക്കുമ്പോൾ അസൂയയോടെ നോക്കി