എന്റെ ബാല്യകാല സ്മരണകൾ… [മേനോൻ കുട്ടി] 52

അന്നൊക്കെ അധികവും വൈകുന്നേരങ്ങളില്‍ പഠിത്തം കഴിഞ്ഞു മടങ്ങുമ്പോള്‍ പോലും മാങ്ങക്ക് എറിയലാരുന്നു പ്രധാന പണി. മാങ്ങാ കണ്ടാല്‍ കല്ലെടുക്കാന്‍ തോന്നുന്ന ബാല്യകാലം…
ഇന്നും വഴിവക്കിൽ മാവിൽ മാങ്ങ കണ്ടാൽ അറിയാതെ കുനിഞ്ഞുപോകും…ഒരു കല്ലിനായി!

മഴകാലത്തെ പന്ത് കളിയെ പറ്റിപറഞ്ഞല്ലോ… അതുപോലെ തന്നെ വേറെയും കലാ പരിപാടികൾ ഉണ്ടായിരുന്നു…
വീടിന്റെ പുറകിൽ നിറയെ നോക്കെത്താ ദൂരം നീണ്ട് കിടക്കുന്ന പുഞ്ച പാടങ്ങൾ ആണ്…ഏകദേശം ഒരു കൊച്ചു പുഴ കണക്കെ.അവിടെ വാഴതണ്ടും കവുങ്ങിൻ പൊളിയും കൊണ്ട് ചങ്ങാടം ഉണ്ടാക്കി ഇറക്കും ഒരാൾക്ക് ഇരുന്നു തുഴയാൻ പറ്റുന്ന കൊച്ചു ചങ്ങാടങ്ങൾ…പക്ഷെ ഒരിക്കൽ പോലും അത് പാടത്തിന്റെ നടുവിൽ പോലും എത്തില്ല അയിനുമുമ്പേ മുങ്ങി പോയിട്ടുണ്ടാകും…ഈ കാലത്തിനിടക്ക് ഒരിക്കൽ പോലും അത് സക്ക്സെസ്സ് ആയില്ലെങ്കിപ്പോലും മുടങ്ങാതെ എല്ലാ വർഷവും ചെയ്തിരിക്കും. ഓരോ പരാജയവുമാണ് അടുത്ത വിജയത്തിന്റെ ചവിട്ടുപടി എന്നുള്ളത് ഇക്കാര്യത്തിൽ മാത്രം ശരിയായില്ല.

പാടവരമ്പത്തെ വെള്ളത്തില്‍ മീനുകളെ പിടിച്ചു കളിച്ചിരുന്നതാണ് മറ്റൊരു പരുപാടി. ചെറിയ തോര്‍ത്ത് മുണ്ട് വെച്ചാരുന്നു മീന്‍ പിടിത്തം. മീന്‍ പിടിച്ചു കഴിഞ്ഞാ പിന്നെ ചെറിയ കവറില്‍ വെള്ളം നിറയ്ക്കും. പിന്നെ മീനെ അതിലാക്കും. വളരെ ചെറിയ മീന്‍ ആയിരിക്കും കേട്ടോ പേരൊന്നും ഇന്നും അറിഞ്ഞുകൂടാ. പക്ഷെ, ഞങ്ങടെ ആ കവര്‍ അക്ക്വേറിയം രണ്ടു ദിവസം വരെയേ കാണു. രണ്ടു ദിവസം കഴിഞ്ഞാ ആ മീനുകൾ ഒക്കെ ചത്തു പോകും. എന്താ കാരണം എന്ന് ഞങ്ങള്‍ക്ക് അന്നൊന്നും പിടി കിട്ടിയിരുന്നില്ല. ഏങ്കിലും ചങ്ങാടം ഉണ്ടാക്കിയിരുന്നത് പോലെ തന്നെ വീണ്ടും വീണ്ടും ചെയ്തുകൊണ്ടിരിക്കും.
ഒടുവിലത് പാടവരമ്പിലെ വെള്ളത്തിൽ നിന്നും മാറി കുളത്തിലെ വെള്ളത്തിൽ വരെ ആയി എന്ന് മാത്രം…തോർത്തുമുണ്ടിൽ പിടിത്തരാത്ത വലിയ മീനുകൾക്ക് ഞങ്ങൾ പ്രതേകം ചൂണ്ട ഉണ്ടാക്കും…അതിരിൽ നിന്നും വെട്ടിയെടുക്കുന്ന ശീമ കൊന്നയുടെയോ മുളയുടെയോ നീളമുള്ള തണ്ടിന്റെ ഒരറ്റത്ത് നൂൽ കെട്ടും, കങ്കുസ് നൂലാണ് കെട്ടുന്നത് (ഒരു തരം ഫൈബറിന്റെ നൂൽ – പെട്ടെന്ന് പൊട്ടിപ്പോകില്ല) അത് കടകളിൽ നിന്നും വാങ്ങാൻ കിട്ടും ഒരു രൂപയോ മറ്റോ ആണ് വില കൂടെ നൂലിന്റെ അറ്റത്തു കെട്ടാനുള്ള കൊളത്തും കിട്ടും. കങ്കുസിന്റെ മറ്റേ അറ്റത്ത് കെട്ടിയ കൊളുത്തിൽ ഇരയായി മണ്ണിരയെയോ പുൽച്ചാടികളെയോ പിടിച്ചു കോർക്കും…അതിനുശേഷം കങ്കുസ് നൂലിന്റെ മധ്യത്തിൽ ആയി ഒരു കൊള്ളി കെട്ടിയിടും നൂൽ മുഴുവൻ വെള്ളത്തിൽ താഴ്ന്നുപോകാതെ പൊങ്ങികിടക്കാനാണ് ഇത്. ഇങ്ങിനെ ഉണ്ടാക്കുന്ന ചൂണ്ടയും കൊണ്ട് കുളക്കരയിലോ തൊട്ടിന്റെ വക്കത്തോ പോയി ഇരിക്കും…അധിക സമയവും വെറുതെ കുത്തിയിരിപ്പാവും മിച്ചം…ഏങ്കിലും കൂട്ടുകാരോടൊപ്പം അങ്ങിനെ ഇരിക്കാനും ഒരു രസമുണ്ടായിരുന്നു…

അതുപറഞ്ഞപ്പോഴാ…