എന്റെ ബാല്യകാല സ്മരണകൾ…

Author : മേനോൻ കുട്ടി

 
പ്രിയപ്പെട്ടവരെ….

ജീവിതത്തിൽ ഒരിക്കലെങ്കിലും തങ്ങളുടെ ബാല്യകാല ജീവിതലേക്ക് തിരിച്ചു പോയിരുന്നെങ്കിൽ എന്ന് ആഗ്രഹിക്കാത്ത മനുഷ്യരുണ്ടോ? ജീവിതത്തിൽ ഒറ്റപ്പെടുന്ന അവസരങ്ങളിലാണ് പലരും അങ്ങനെ ചിന്തിക്കാറ്…
ചിലർക്ക് ചെറുപ്പകാലം മനോഹരമായിരിക്കും എങ്കിൽ ചിലർക്കത് ദുസ്വപ്നമായി മറക്കാനാഗ്രഹിക്കുന്ന ഒന്നായിരിക്കും…പലരും വളർന്നു വന്ന സാഹചര്യം ആയിരിക്കും അവരെ അങ്ങനെ ചിന്തിപ്പിക്കാൻ പ്രേരിപ്പിക്കുന്നത്.
എന്റെ ജീവിതത്തിൽ ഞാൻ പലപ്പോഴും ആഗ്രഹിക്കുന്ന ഒന്നാണ് എന്റെ ബാല്യകാലത്തിലേക്കുള്ള തിരിച്ചുപോക്ക്.ഒരിക്കലും സാധ്യമല്ല എന്ന് പൂർണമായി അറിയാമെങ്കിൽ പോലും പലപ്പോഴും അത് ആഗ്രഹിക്കുന്നു…സ്വപ്നം കാണുന്നു…ആ മനോഹര കാലഘട്ടം ഒരിക്കലും തിരിച്ചു കിട്ടില്ല എന്നുള്ള തിരിച്ചറിവ് ഉൾക്കൊണ്ട്‌ കൊണ്ട് തന്നെ!

90കളിൽ ആയിരുന്നു എന്റെ ബാല്യകാല ആരംഭം. സമ്പത്തിക പരമായി ഒരു ഇടത്തരം കുടുബത്തിൽ ആയിരുന്നു ഞാൻ ജനിച്ചത്. ഇന്നും അങ്ങിനെ തന്നെ ആണ് കേട്ടോ! അന്ന് എനിക്ക് എന്റെ ബാല്യകാലത്ത് ഇന്നത്തെ തലമുറയിലെ കുട്ടികൾ അഭവിക്കുന്ന പലതരം സുഖ സൗകര്യങ്ങളും സന്തോഷങ്ങളും അനുഭവിക്കാനോ ആസ്വദിക്കാനോ സാധിച്ചിട്ടില്ല. ഇന്നത്തെ തലമുറയുടെ ശരീരിക മാനസിക വളർച്ചയെ പ്രതികൂലമായി ബാധിക്കുന്നതും എന്നാൽ ജീവിതത്തിൽ ഇന്ന് ഒഴിച്ചുകൂടാൻ സാധിക്കാത്തുമായ പല ആധുനിക സൗകര്യങ്ങളും അന്ന് കേട്ടുകേൾവി മാത്രമായിരുന്നു. എന്തിനേറെ പറയുന്നു വൈദ്യുതിയോ അതിനോടനുബന്ധിച്ച ഉപകരണങ്ങളോ പോലും അന്ന് ഗ്രാമപ്രദേശങ്ങളിലെ വീടുകളിൽ പലതിലും അപൂർവങ്ങളായെ കാണാൻ സാധിച്ചിരുന്നുള്ളു. അന്നൊക്കെ ടെലിവിഷനുകളോ ലാന്റ് ഫോണുകളോ ഉള്ള വീടുകൾ നാട്ടിൽ ഒന്നോ രണ്ടോ മാത്രമായിരുന്നു എന്നാണ് ഓർമ. അതുകൊണ്ട് തന്നെ നാട്ടിലെ മിക്കയവരും ടീവീയിലെ പ്രോഗ്രാമുകൾ കാണലും അത്യാവശ്യ ഫോൺ വിളിയുമെല്ലാം ആ വീടുകളിൽ ചെന്നു കൊണ്ടായിരുന്നു. പ്രവാസികളായ പലരും അന്ന് വീട്ടുകാരുമായി ബന്ധപെട്ടിരുന്നത് ഇത്തരത്തിലുള്ള ഫോൺ വിളിയിലൂടെ ആയിരുന്നു. എന്നാൽ അന്നൊന്നും അത് ആർക്കും ഒരു ബുദ്ധിമുട്ടായി തോന്നിയിരുന്നില്ല. പലരും അതൊക്കെ തന്നെ വലിയ സൗകര്യങ്ങളായി കണ്ട് ആശ്വസിച്ചിരുന്നു.
ഒരുപക്ഷെ ഇത്തരത്തിൽ ഒരു ജീവിതരീതി അന്ന് പലരും സ്വപ്നം പോലും കണ്ടിട്ടുണ്ടാകില്ല എന്നതായിരിക്കാം അതിനു കാരണം.

അന്നത്തെ ഉത്സവകാലമാണ് എപ്പോഴും ആദ്യം മനസിലേക്ക് ഓടിയെത്തുന്നത്. അന്നൊക്കെ ആ സമയം ആഘോഷമായിരിക്കും വീട്ടിൽ…