അഥർവ്വം 6 [ചാണക്യൻ] 187

അനന്തുവും ശിവയും അമ്മായിയെ പിന്തുടർന്നു.

അടുക്കളയിലെത്തിയ അവർക്ക് നേരെ ആവി പറക്കുന്ന ചായ കപ്പ് നീട്ടികൊണ്ട് ഷൈല അവരെ നോക്കി ചിരിച്ചു.

ശിവ കപ്പും വാങ്ങി സീതയുടെ പുറകെ എങ്ങോട്ടോ പോയി.

അനന്തു ചായ കപ്പ് കയ്യിൽ വാങ്ങി അതു കുടിച്ചു നോക്കി.

ആ ചായ അവനു ഒരുപാട് ഇഷ്ട്ടമായി.

“അമ്മായി ആണോ ഈ ചായ ആക്കിയേ? ”

“അതേ അനന്തു എന്തെ ഇഷ്ട്ടായില്ലേ? ”

ഷൈല പരിഭ്രമത്തോടെ അവനെ നോക്കി.

“അയ്യോ വേറൊന്നുംകൊണ്ടല്ല നല്ല ചായ ആണ്. എനിക്ക് ഇഷ്ട്ടമായി.”

അതു കേട്ടതും ഷൈലയുടെ ഉള്ളിലുള്ള പരിഭ്രമം അവളെ വിട്ടകന്നു.

“അമ്മായി അഞ്ജലിയ്ക്ക് ചായ കൊടുത്തായിരുന്നോ ? ”

അനന്തു ശങ്കയോടെ ചോദിച്ചു.

“ഇല്ല അനന്തു ഞാൻ കൊടുക്കാൻ പോകുവാ”

“എങ്കിൽ എന്റെ കയ്യിൽ തരുമോ ഞാൻ അവൾക്ക് കൊടുത്തോട്ടെ ? ”

പ്രതീക്ഷയോടെയുള്ള അനന്തുവിന്റെ ചോദ്യം കേട്ടതും ഷൈലക്ക് ഒരുപാട് സന്തോഷം തോന്നി.

“അതിനെന്താ അനന്തു”

ഉത്സാഹത്തോടെ മറ്റൊരു കപ്പിലേക്ക് ചായ പകർന്ന് ഷൈല അത് അനന്തുവിന്റെ കയ്യിൽ  കൊടുത്തു.

ഷൈലയെ നോക്കി പുഞ്ചിരിച്ചു കൊണ്ടു അനന്തു നടു മുറ്റത്തേക്ക് നടന്നു.

അവിടുന്ന് നേരെ അഞ്ജലിയുടെ മുറിയ്ക്ക് സമീപം എത്തി.