യക്ഷി

Yakshi Part 2 | Author : Appu | Previous Part

കഥ കേൾക്കാനുള്ള അവന്റെ ആകാംഷ കണ്ട് ചിരിച്ചുകൊണ്ട് തൊട്ടടുത്ത കല്ലിൽ ഇരുന്നുകൊണ്ട് അവൾ പറഞ്ഞുതുടങ്ങി…..

” ഈ തറവാട്ടിലെ നിനക്ക് മുൻപുള്ള തലമുറയിലെ ആദ്യസന്താനമായിരുന്നു രാജീവ്‌…. പൗർണമി നാളിലെ ഗന്ധർവ്വ യാമത്തിൽ ജനിച്ചവൻ… സുന്ദരൻ… അവന് യക്ഷികളോട് പ്രണയം തോന്നാൻ അവന്റെ ജന്മനിമിഷം തന്നെയായിരിക്കാം കാരണം…!!”

“ജന്മനിമിഷത്തിന് എന്താ പ്രത്യേകത…?” യക്ഷി ഇരുന്ന കല്ലിന് താഴെയിരുന്ന് ഒരു കൊച്ചുകുട്ടിയെപ്പോലെ കഥയോടൊപ്പം അവൻ സംശയങ്ങളും ചോദിച്ചു…

“പൗർണമി നാളിലെ ഗന്ധർവ്വയാമം യക്ഷികൾക്ക് പ്രിയപ്പെട്ടതാണ് അപ്പൂ … സ്വർഗം വിട്ട് ദേവതമാർ ഭൂമിയിലേക്കിറങ്ങുന്ന സമയമാണത്….. അപ്പോൾ ജനിക്കുന്ന കുഞ്ഞുങ്ങളും അവർക്ക് ഏറെ പ്രിയപ്പെട്ടവരായിരിക്കും…!!” അപ്പുവിന്റെ തലയിൽ തലോടി അവൾ പറഞ്ഞു…

“ഞാനും അങ്ങനെയാണോ….??”

” നിനക്ക് കഥ കേൾക്കണോ അതോ സംശയം തീർക്കണോ….?? ” യക്ഷി ജ്ഞാനീഭാവം വിട്ട് കൊച്ചുകുട്ടിയായി..

” ഇല്ല കഥ പറഞ്ഞോ കേൾക്കാം…!!” അവൻ അടങ്ങി…

” അങ്ങനെ അവൻ വളർന്നുവന്നു… ചെറുപ്രായത്തിൽ എപ്പോഴോ കേട്ട കഥകളിലൂടെ അവൻ യക്ഷികളെ മനസ്സിൽ ആരാധിച്ചുതുടങ്ങി… യക്ഷികളെ കാണാനും സാന്നിധ്യം അനുഭവിക്കാനുമുള്ള വഴിയന്വേഷിച്ച് അവൻ സൂര്യമംഗലം മനയിൽ വരെ ചെന്നു… മന്ത്രതന്ത്രവിധികളിൽ സൂര്യമംഗലം മന കഴിഞ്ഞേയുള്ളൂ മറ്റൊരു തറവാട്… മണിയംകണ്ടതിൽ തറവാട്ടിലെ ഒരു അംഗത്തെ അങ്ങനെ അങ്ങ് ഒഴിവാക്കാൻ പറ്റാത്ത ഒരു കടപ്പാടുണ്ട് സൂര്യമംഗലത്ത് മനക്കാർക്ക്… അതുകൊണ്ട് അവരവനെ സ്വീകരിച്ചു…

യക്ഷി ഉപാസനാമന്ത്രങ്ങളും മൂലമന്ത്രങ്ങളും സകല വിവരങ്ങളും അവരവന് പറഞ്ഞുകൊടുത്തു… വല്ലാത്തൊരു ആവേശത്തോടെ, ആഗ്രഹത്തോടെ അവനത് പഠിച്ചെടുത്തു… അങ്ങനെ 36 യക്ഷിണികളെയും ഉപാസിക്കേണ്ട മന്ത്രങ്ങളും അതിനുവേണ്ട തയ്യാറെടുപ്പുകളും അവൻ പഠിച്ചു….!!”