” അമ്മേ ബാഗ് പാക്ക് ചെയ്യ് ഒരു യാത്ര പോകാനുണ്ട്…. .. ” പുറത്തു നിന്നും അകത്തേക്ക് കയറികൊണ്ട് ഉറച്ച ശബ്ദത്തിൽ ഇഷാനി പറഞ്ഞുപത്രം വായിക്കുകയായിരുന്ന ജാനകി ഞെട്ടിത്തിരിഞ്ഞു അവളെ നോക്കി

” എന്താ അമ്മ ഇങ്ങനെ നോക്കുന്നത്… ”

“എവിടെ പോകുന്ന കാര്യമാ മോളെ ”

“അമ്മയുടെ സ്വപ്നങ്ങളിലേക്ക് ”

” സത്യാണോ മോളെ , നീ , നീ എന്നെ പറ്റിക്കുന്നതല്ലല്ലോ ” അവർ ആകാംഷയോടെ ചോദിച്ചു

“എന്റെ ജാനകിക്കുട്ടിക്ക് ഞാൻ നുണ പറയുന്നുണ്ടെന്ന് തോന്നുന്നുണ്ടോ ”

“എന്റെ മോള് നുണ പറയില്ലന്നറിയാം എങ്കിലും ഒരു….. ”

” ദേ ഈ ഇഷ ഒരു കാര്യമേറ്റാൽ ഏറ്റതാ , പിന്നെ ഈ സുന്ദരി അമ്മക്കുട്ടിയുടെ കാര്യമാകുമ്പോൾ പറയണോ ” അവൾ അവരെ കെട്ടിപ്പിടിച്ചു മുത്തം കൊടുത്തു

“മോള് തന്ന ധൈര്യം മാത്രമാ ഇപ്പോ എല്ലാരുടെയും മുന്നിൽ പിടിച്ചു നില്കുന്നെ… പലരും ഇപ്പോളും കുറ്റപ്പെടുത്തുന്നുണ്ട് ”

“അമ്മ ആരുടേയും വാക്ക് ശ്രദ്ധിക്കേണ്ട, അമ്മയുടെ സ്നേഹനിധിയായ കെട്ടിയോനും മുത്തുമണികളായ മക്കളും സമ്മതിച്ചില്ലേ അതു മാത്രം മതി, ചെല്ല് പെട്ടിയൊക്കെ പാക്ക് ചെയ്യ്, എന്തേലും വാങ്ങാൻ ഉണ്ടെങ്കിൽ നമുക്ക് വൈകിട്ടു പോയി വാങ്ങിക്കാം ”

അവൾക്കും തിരിച്ചൊരു മുത്തം കൊടുത്തിട്ടു ഫോൺ എടുത്തു….. ഏട്ടനെ വിളിച്ചു പറയണം, മോൻ പറഞ്ഞിട്ടുണ്ടാകും എന്നാലും ഞാൻ പറയുംപോലെ ആകില്ലല്ലോ മനസ്സിൽ അതും പറഞ്ഞു കാൾ ചെയ്തു

“ജാനു , ബാഗ് പാക്ക് ചെയ്തോ ” സ്നേഹത്തോടെയുള്ള ചോദ്യത്തിൽ അവരിൽ പുഞ്ചിരി വിരിഞ്ഞു

“ഏട്ടൻ അറിഞ്ഞുവെന്നു അറിയാം എങ്കിലും ഞാൻ പറയണ്ടേ ”

“എന്നോട് പറയാത്തതായി ഒന്നുമില്ലെന്ന് അറിയാം ജാനു, നിന്റെ സന്തോഷം തന്നെയാണ് എനിക്ക് വലുത്.. നീ ഇല്ലാത്ത ദിവസങ്ങൾ മാത്രം ആണ് ഓർക്കാൻ വയ്യാത്തത്, എങ്കിലും നിന്റെ വർഷങ്ങളായുള്ള ആഗ്രഹം…. അതുകൊണ്ട് മാത്രമാ സമ്മതിച്ചത് ”

“ഏട്ടന് വിഷമമാണെൽ പോകുന്നില്ല ”

“എന്റെ പൊന്നു ജാനു നി പോയിട്ട് വേണം എനിക്കു പുതിയ ഒരുപാട് കിളിയെ തപ്പിപ്പിടിക്കാൻ , നി ഇങ്ങനെ വാലുപോലെ പുറകെ നടക്കുന്നത്കൊണ്ട് ആരും ശ്രദ്ധിക്കുന്നില്ല , …… മനുഷ്യന് ഒരു തമാശ പോലും പറയാൻ പാടില്ലേ ”

“നിങ്ങൾ ഇങ്ങോട്ടേക്കല്ലേ വരുന്നത് ബാക്കി അപ്പോ പറയാം ” അവർ കെറുവോടെ പറഞ്ഞു

” പൊന്നേ ചതിക്കല്ലേ , ചുമ്മാ പറഞ്ഞതാ, വരുമ്പോൾ വല്ലതും വാങ്ങണോ ”

” സോപ്പിടേണ്ട , ഞാൻ മോളുടെ കൂടെ വൈകിട്ടു പോകുന്നുണ്ട് ”

” എങ്കിൽ ശരി, ഞാൻ വെക്കട്ടെ, ഇവിടെ കുറച്ചു തിരക്കുണ്ട് ”

“ഒക്കെ ഏട്ടാ ”

ഫോൺ കട്ട്‌ ചെയ്തിട്ട് ബാഗിൽ ഡ്രസ്സ്‌ ഒക്കെ എടുത്തുവെക്കാൻ തുടങ്ങി ഓരോന്നും എടുത്തുവെക്കുമ്പോൾ ചിന്തകളും കൂടെ കൂടി