Wonder part – 2

Author : Nikila

 

“ഫ്രണ്ട്സ്, കഴിഞ്ഞ പാർട്ടിന് ലഭിച്ച അഭിപ്രായങ്ങൾ പൊതുവെ കുറവാണെങ്കിലും ലഭിച്ച അഭിപ്രായങ്ങളിൽ പലരും പറഞ്ഞ പ്രധാന കാര്യം കഥയ്ക്ക് നല്ല ലാഗ്ഗുണ്ടെന്നാണ്. അതു നൂറു ശതമാനവും സത്യവുമാണ്. അതുക്കൊണ്ട് ഇപ്രാവശ്യം സ്പീഡ് കൂട്ടാൻ ശ്രമിച്ചെങ്കിലും അതു നടന്നില്ലെന്ന് മാത്രമല്ല ഞാൻ എഴുതി വച്ചതിൽ അവസാനത്തെ പത്തോളം വരുന്ന പേജുകൾ നഷ്ടപെടുകയും ചെയ്തു. അതുക്കൊണ്ട് ഈ പാർട്ടിലും ലാഗ്ഗ് അനുഭപ്പെട്ടേക്കാം സഹകരിക്കുക. എന്നിരുന്നാലും നിങ്ങളെ പരമാവധി ബോറടിപ്പിക്കാതിരിക്കാൻ ശ്രമിക്കാം”

അങ്ങനെ ഞങ്ങൾ പോലീസ് ജീപ്പിന്റെ ബാക്ക് സൈഡിൽ കേറിയിരുന്നു. കൂട്ടിനു രണ്ടു കോൺസ്റ്റബിൾമ്മാരും. ജീപ്പ് ഞങ്ങളെയും കൊണ്ട് പോലീസ് സ്റ്റേഷനിലേക്ക് നീങ്ങി.

 

 

രാത്രിയിലെ തണുത്ത കാറ്റും ജീപ്പിന്റെ എഞ്ചിൻ ശബ്ദവും പിന്നെ കുറച്ചു ക്ഷീണവുമുള്ളതിനാൽ കണ്ണുകൾ മെല്ലെയടഞ്ഞു തുടങ്ങി. പിന്നെ ഉറക്കത്തിലേക്ക്.

 

 

‘Chase your dreams’ ‘സ്വപ്‌നങ്ങളെ പിന്തുടരുക’. സ്കൂൾഘട്ടം മുതൽ കോളേജ് കാലഘട്ടം വരെയുള്ള സമയങ്ങളിൽ പല മോട്ടിവേഷൻ സ്പീക്കർമ്മാരുടെ അടുത്തുനിന്നും കേട്ടിട്ടുള്ള ഡയലോഗാണ്. അന്നങ്ങനെ പറഞ്ഞവരെയെല്ലാം ഇന്നു കൈയിൽ കിട്ടിയാൽ രണ്ടെണ്ണമെങ്കിലും പൊട്ടിക്കണം എന്നെനിക്കു തോന്നി. കാരണം അമ്മാതിരി സ്വപ്നമാണ് ജീപ്പിലുള്ള യാത്രയ്ക്കിടയിൽ ഞാൻ കണ്ടു പോയത്. പിന്തുടരാൻ പറ്റിയ സ്വപ്നം തന്നെ😪.

 

---

 

ഞാനൊന്ന് കണ്ണു ഇറുക്കിയടച്ചു ദീർഘശ്വാസം വലിച്ച ശേഷം കണ്ണു മെല്ലെ തുറന്നു. കണ്ണു തുറന്ന ഞാൻ മുൻപിൽ കണ്ട കാഴ്ചകൾ കണ്ട് ഞെട്ടി പോയി.

 

 

ഒരു ഓഡിറ്റോറിയം, ആ ഓഡിറ്റോറിയമാണെങ്കിൽ മുഴുവൻ ചുവപ്പു മയം. നിലത്തു മുഴുവൻ ചുവന്ന പരവതാനി വിരിച്ചിരിക്കുന്നു. എന്റെ മുൻപിൽ ഒരുപാട് കസേരകൾ നിരത്തിയിട്ടിരിക്കുന്നു. അവിടെയൊക്കെ പുറത്തു നിന്നും കയറി വരുന്ന ആളുകൾ സ്ഥാനം പിടിച്ചിരിക്കുന്നു. വന്നവരെല്ലാം എന്നെത്തന്നെ നോക്കി നിൽക്കുന്നു. കുറച്ചാളുകൾ എനിക്ക് ചുറ്റും കൂടി നിൽക്കുന്നു.

 

 

ഇനി കൂട്ടം കൂടിയെന്ന തല്ലാനാണോ ഇവരുടെ പ്ലാനെന്നു പോലും സംശയിച്ചു പോയി😶. എനിക്കാണെങ്കിൽ ഒന്നും മനസിലായില്ല.

 

 

ഇതൊക്കെ കണ്ണുകൾ കൊണ്ട് കണ്ട കാഴ്ചകൾ. ഇനി കാതുകൾക്കൊണ്ട് കേട്ടവ വേറെയുണ്ട്. ആളുകൾ എന്തൊക്കെയോ അടക്കം പറയുന്നു🗣️.