Wonder 6 [Nikila] 2829

ഡാർക്ക് സീരീസിന്റെ കാര്യമാണ് ഞാൻ പറഞ്ഞതെന്ന് ആ മണ്ടന് മനസിലായിട്ടില്ല?.

“വ്യക്തമായിട്ട് പറയാനാണെങ്കിൽ ഇപ്പോഴൊന്നും ശരിയാവില്ല. അതിനൊക്കെ മൂന്നു ദിവസമെങ്കിലുമെടുക്കും. നീയിപ്പോ വിളിച്ചതെന്തിനാണെന്ന് പറ”

അങ്ങനെയാണ് അവനെന്നോട് ആ കാര്യം പറഞ്ഞത്. ഈയാഴ്ച്ച അവന്റെ കമ്പനിയിലെ സ്റ്റാഫുകളെല്ലാവരെയും ചേർത്ത് ഒരു ടൂറ് പ്ലാൻ ചെയ്തിട്ടുണ്ട്. ആദ്യം ഈ ടൂറിന് എല്ലാവരും സമ്മതിച്ചപ്പോൾ അവരെ വിശ്വസിച്ചു ബസ്സുകാർക്കും ഹോട്ടലുക്കാർക്കും മറ്റും മുൻകൂറായി അഡ്വാൻസ് കൊടുത്തു. പക്ഷെ ഇപ്പൊ അവര് പറയുന്നത് ടൂറു പോകുമ്പോൾ എന്നെയും കൂടി കൂട്ടിയില്ലെങ്കിൽ അവര് വരില്ലെന്നാ. അവരെ കുറ്റം പറയാൻ പറ്റില്ല. കുറേ നാളായില്ലേ ഞാനാ ഭാഗത്തേക്ക്‌ തന്നെ പോയിട്ട്. എങ്ങനെ പോകാനാ ? അവരുടെയീ ബ്രോക്കർ പണി കാരണം ഞാനായിട്ട് മനപ്പൂർവം ഒഴിഞ്ഞു മാറിയതാ. ഇപ്പോ അവര് പറയുന്നത് ഞാനില്ലാതെ ഈ ടൂറെന്ന പരിപാടിയേ നടക്കില്ലെന്നാ. അതുക്കൊണ്ട് എന്നോടും കൂടി വരാൻ റോയ് ആവശ്യപ്പെട്ടു. മിഖിയെ ഒപ്പം കൂട്ടാമെങ്കിൽ വരാമെന്നു ഞാനും പറഞ്ഞു. ഇഷ്ടക്കേടോടെയാണ് അവനതിന് സമ്മതിച്ചത്. ഇഷ്ടക്കേട് ഉറപ്പായും കാണണമല്ലോ.ഞാനും മിഖിയും കൂടി എങ്ങോട്ട് പോയാലും അവിടെയെന്തെങ്കിലും കുഴപ്പമുണ്ടാക്കിയിട്ടേ തിരിച്ചു വന്ന് ശീലമുള്ളൂ. അപ്പോൾ അവന് മിഖിയെയും കൂടെ കൂട്ടുന്നതിൽ താൽപ്പര്യക്കുറവ് തോന്നിയതിൽ കുറ്റം പറയാൻ പറ്റില്ല.

മിഖിയോട് അവനെയും കൂട്ടി ടൂറ് പോവുന്ന കാര്യം പറഞ്ഞപ്പോൾ അവനും ഭയങ്കര സന്തോഷമായി. കാരണം അവനിതുവരെ സ്കൂളിൽ നിന്ന് ടൂറ് പോകാൻ പറ്റിയിട്ടില്ല. എങ്ങനെ പോകാനാ ?, മന്ത്രവാദിയെന്ന വിളിപ്പേരല്ലായിരുന്നോ ആ സമയത്തവന്.

അങ്ങനെ സമ്മതമൊക്കെ അറിയിച്ചു കഴിഞ്ഞതിനു ശേഷമാണ് എവിടേക്കാണ് ടൂറ് പോവുന്നതെന്ന് ചോദിക്കാൻ തോന്നിയത്. ഊട്ടിയാണ് അവൻ പോകാനായി തിരഞ്ഞെടുത്ത സ്ഥലമെന്ന് കേട്ടപ്പോഴേ ഞാൻ മരവിച്ചു പോയി. ഒന്നാമത് ഇപ്പോ തന്നെ നല്ല അസ്സൽ തണുപ്പിന്റെ സീസണാണ്. ഈ സമയത്ത് ഇടുക്കിയിലേക്ക് പോയാൽ തന്നെ ഊട്ടിയിലെ തണുപ്പനുഭവിക്കാം. അപ്പോഴാണ് അവൻ ഇവിടുത്തെ തണുപ്പും പോരാഞ്ഞിട്ടിനി ഊട്ടിയിലേക്കും കെട്ടിയെടുക്കാൻ നിൽക്കുന്നേ. ഇവനെയൊക്കെ ഐസ് കട്ട കൊണ്ടു തന്നെ കരണത്തടിക്കണം.

കാര്യം ഞാനും മിഖിയും ഹാപ്പിയായെങ്കിലും എന്നാലും ഞങ്ങൾക്ക് ചെറിയൊരു മനപ്രയാസമുണ്ടായിരുന്നു. ഫിലിപ്പ് അങ്കിളിനെയും ശരാദാന്റിയെയും വീട്ടില് ഒറ്റക്കാക്കി ദൂരത്തേക്ക് പോകുന്ന കാര്യമോർക്കുമ്പോൾ ഒരു വിഷമം. ഇക്കാര്യം അവര് രണ്ടു പേരോടും ഞാൻ പറഞ്ഞു. പക്ഷെ അവര് പൊയ്ക്കോളാൻ പറഞ്ഞു നിർബന്ധിച്ചു. അതും പോരാഞ്ഞിട്ട് യാത്ര ചെയ്യുന്ന സമയത്ത് അവരെ ഫോൺ ചെയ്യരുതെന്നും പ്രത്യേകം പറഞ്ഞു. കാരണം ചോദിച്ചപ്പോൾ അവര് പറഞ്ഞത് ഞങ്ങളുടെ ശബ്ദം കേട്ടാൽ പിന്നീട് ഞങ്ങളെ ഒരു നോക്ക് കാണാൻ കൊതിയാവുമെന്ന്.

ഇതു കേട്ടപ്പോഴേ എനിക്കൊരു സംശയം തോന്നി. പിന്നീടാണ് ഇതിന്റെയൊരു ഗുട്ടൻസ് മനസിലായത്. കള്ളത്തിരുമാലികൾ, ഞങ്ങള് രണ്ടു പേരും പോയിട്ട് വേണം അങ്കിളിനും ആന്റിക്കും കൂടി വീടു മുഴുവൻ റൊമാൻസ് കളിച്ചു നടക്കാൻ?. സാധാരണ ഞാനും മിഖിയും വീട്ടിനകത്തുള്ളപ്പോൾ അവര് രണ്ടാളും പരസ്പരം മിണ്ടാൻ തുടങ്ങിയാൽ കീരിയും പാമ്പും പോലെയാ. എന്നാ ഞങ്ങള് പോയിക്കഴിഞ്ഞാലോ പിന്നെയീ രണ്ടു പേരും പണ്ടത്തെ പ്രേം നസീറും ഷീലയുമായി റൊമാൻസ് കളിക്കും. ഞങ്ങളുടെ മുന്നിൽ മാത്രം കാണിച്ചുക്കൂട്ടുന്ന ഇവരുടെയീ അഭിനയത്തിനു മുൻപിൽ മോഹൻലാലും മഞ്ജുവാര്യരും വരെ മാറി നിൽക്കും. ഇപ്പോൾ ഇവരുടെ ഉദ്ദേശം ഇത്രയേയുള്ളൂ. രണ്ടു ദിവസത്തേക്ക് ഞങ്ങള് വീട്ടീന്ന് മാറി കിട്ടണം. അതിനു പറ്റിയ ഒരു സാഹചര്യം വന്നപ്പോൾ രണ്ടും കൂടി അതു മുതലാക്കി. എന്നാപ്പിന്നെ അങ്ങനെയാവട്ടേന്ന് ഞാനും തീരുമാനിച്ചു. പോവുന്നതിനു മുൻപ് അവർക്ക് ചെറിയൊരു താക്കീത് കൊടുത്തു ; “ഞങ്ങള് മാത്രമേ ഇവിടുന്ന് മാറി നിൽക്കുന്നുള്ളൂ. ഡഗ്ഗ് ഇപ്പോഴുമിവിടെ തന്നെ മണപ്പിച്ചു നടക്കുന്നുണ്ടേ” എന്ന്. അങ്കിളും ആന്റിയുമത് ചിരിച്ചു തള്ളി. പക്ഷെ അവരോർത്തില്ലായിരുന്നു ഡഗ്ഗ് ഒരു നിസാര പട്ടിയല്ലായെന്ന്?.

അങ്ങനെ ടൂറ് പോകുന്ന ദിവസം വന്നു. ഉച്ചയ്ക്ക് ശേഷമാണ് യാത്ര തിരിക്കുന്നത്. പോകുന്ന നേരത്ത് യാത്രയ്ക്ക് വേണ്ട സാധനസാമഗ്രഹികളൊന്നും കാര്യമായി കരുതിയില്ല. ആകെ കൂടി എടുത്തുവച്ചത് ചെറിയൊരു ബാഗ് മാത്രമായിരുന്നു. ആവശ്യമുള്ള സാധനങ്ങളൊക്കെ അവിടെയെത്തിയിട്ട് വാങ്ങാമെന്ന ഐഡിയയിലായിരുന്നു ഞാൻ. അല്ലാതെ ഒരു സ്ഥലത്തേക്ക് പോകുമ്പോ ഭാരമുള്ള ഭാണ്ഡകെട്ടും താങ്ങി ആ യാത്രയുടെ സുഖം കളയാൻ എനിക്കു താല്പര്യമുണ്ടായിരുന്നില്ല. പിന്നെ മിഖി നല്ലൊരു ക്രീയേറ്റീവായ ഐഡിയ പറയാമെന്നു പറഞ്ഞു വന്നെങ്കിലും ഞാൻ ചാടിക്കേറി വേണ്ട എന്നു പറഞ്ഞു. ഇവന്റെ ഐഡിയ എവിടം വരെ പോവുമെന്ന് ഞാൻ പണ്ടേ നന്നായിട്ട് അറിഞ്ഞിട്ടുള്ളതാ. പണ്ടൊരു തവണ ഇവനെയും കൊണ്ട് മലയാറ്റൂർ മല കേറാൻ പോയപ്പോൾ ഇവൻ കാട്ടിക്കൂട്ടിയത് തന്നെ ഒരു കോമഡിയായിരുന്നു. ട്രാക്ക് സ്യൂട്ടും വലിഞ്ഞു മുറുകിയ ടീഷർട്ടും ധരിച്ച് കയ്യിലൊരു വാക്കിങ് സ്റ്റിക്കും പിടിച്ച് കൂളിംഗ് ഗ്ലാസ്സുമായിട്ടായിരുന്നു അവന്റെ വരവ്. അതും പോരാഞ്ഞിട്ട് ബാഗിലൊരു മിനി പോര്ട്ടബിൾ സ്റ്റൗ, പച്ചക്കറികൾ, കത്തി, ന്യൂഡിൽസ് തുടങ്ങിയ ഈ വക സാധനങ്ങളുമായി ഒരു കൊച്ചു അടുക്കളയുമായിട്ടായിരുന്നു അവൻ മല കേറാനെത്തിയത്. ഇവന്റെ വിചാരം മലയാറ്റൂർ മല കേറുന്നത് എന്തോ ട്രക്കിങ്ങിന് പോകുന്ന പരിപാടിയാണെന്നാ. അങ്ങനെയുള്ള ഇവനെക്കൊണ്ട് ഒരു പ്ലാനും പറയാൻ സമ്മതിച്ചില്ല. യാത്രാ സാധങ്ങൾ കാര്യമായിട്ടങ്ങനെ കരുതിയിലെങ്കിലും ഒരു ബാഗ് നിറയെ വെള്ളം കുപ്പികളെടുത്തു വച്ചു. അതു കണ്ടപ്പോൾ മിഖിക്കൊരു സംശയം.

“ജോ ?”

“എന്താടാ ?”

“ഇതെന്തിനാ ഇത്രേം വെള്ളം കുപ്പികളെടുക്കുന്നേ ? നമ്മള് പോവുന്നത് ഊട്ടിയിലേക്ക് തന്നെയല്ലേ ?, അതോ യാത്രയിനി സഹാറ മരുഭൂമിയിലേക്കാക്കിയാ ?”