രാക്ഷസൻ 2 [FÜHRER] 335

അവന്‍ അവളെ നോക്കി.. അവന്റെ മുഖത്തേക്കു വന്ന ഭാവങ്ങള്‍ ഉള്ളിലൊതുക്കിക്കൊണ്ട് അവന്‍ പറഞ്ഞു തുടങ്ങി.

അറസ്റ്റു ചെയ്യാനോ.. അവനെയോ.. ഹും. പോലീസിനും നിയമത്തിനും അവനെ ഭയമാ. അപ്പോഴാ അറസ്റ്റ്.. അവന്‍ നിര്‍വചിക്കും അവന്റെ നിയമസംഹിതകള്‍.. അതനുസരിച്ചു മറ്റുള്ളവര്‍ ജീവിക്കും. അതാ അവന്റെ രീതി.

മോളേ, നീ കാണുന്ന പ്രത്യക്ഷ ലോകത്തില്‍ അവനുണ്ടാവില്ല. പക്ഷേ അവനറിയാതെ ഒന്നും ഇവിടെ നടക്കുന്നുമില്ല. നടക്കത്തുമില്ല.

ചുരുങ്ങിയ കാലത്തിനിടക്ക് മസില്‍ പവറുകൊണ്ടും മണി പവറുകൊണ്ടും അവന്‍ ഇന്നു ഭാരതത്തിലുടനീളം വ്യാപിച്ചു കിടക്കുന്ന സാമ്രാജ്യം തന്നെ സൃഷ്ടിച്ചെടുത്തിട്ടുണ്ട്.

അവന്‍ ആ സാമ്രാജ്യത്തിലെ രാക്ഷസ ചക്രവര്‍ത്തിയും…

മരണത്തിന്റെ മറ്റൊരു മുഖമാണവനെന്നാണ് എതിരാളികള്‍ പോലും പറയുന്നത്. ഇന്ന് അവന്‍ കണ്ണു ചൂഴ്‌ന്നെടുത്തതും അതുപോലെ അവനെ എതിര്‍ത്ത ആരുടെയെങ്കലും ആയിരിക്കും.

ഇസ അമ്പരപ്പോടെയാണ് അലക്‌സിന്റെ ഓരോ വാക്കും കേട്ടത്. ഇങ്ങനെയും ആളുകള്‍ ഉണ്ടോ. അവള്‍ക്കു വിശ്വാസം വരുന്നുണ്ടായിരുന്നില്ല.

അവന്റെ പേരെന്താ ഇച്ചായി. അവള്‍ അല്‍പം പേടിയോടെ ചോദിച്ചു.

അലോക് നാഥ്.. അതാവണന്റെ പേര്.

അല്ല ഈ അധോലോകക്കാര്‍ക്ക് ആരെങ്കിലും ഇങ്ങനെത്തെ പേരിടുവോ. അവള്‍ കുസൃതിയോടെ അവനെ നോക്കി.

ആഹാ ഇസക്കൊച്ചു പഴയ ഫോമിലായല്ലോ. അവന്‍ അവള്‍ക്കിട്ടൊന്നു കൊട്ടി.

എടി അവന്‍ ഒരു മലയാളിയാ..

നമ്മുടെ കേരളത്തിലെവിടയോ വേരറ്റു പോയൊരു കുടുംബത്തിലെ അംഗമാണ്. കൂടുതല്‍ ഒന്നും എനിക്ക് അറിയില്ല.