രാക്ഷസൻ 2

Author : Führer

[ Previous Part ]

സുഹൃത്തുക്കളേ രാക്ഷസൻ ഒന്നാം ഭാഗത്തിനു തന്ന പിന്തുണയ്ക്ക് നന്ദി. തുടർന്നും ഈ സഹകരണം പ്രതീക്ഷിക്കുന്നു.

ചുടു രക്തം പടര്‍ന്നൊഴുകുന്ന മുഖം. അവന്‍ തങ്ങളെ വീക്ഷിച്ചു കൊണ്ടു മന്ദഹസിക്കുന്നു.

ഇസ ഞെട്ടിയുണര്‍ന്നു ചുറ്റു നോക്കി. മുകളിലെ ഫാന്‍ കറങ്ങുന്ന ശബ്ദം അവിടെ മുഴങ്ങികൊണ്ടിരുന്നു. സമീപത്തെ ബെഡില്‍ വേറെ കുറേ പേര്‍ കിടക്കുന്നുണ്ട്.

താനൊരു ഹോസ്പിറ്റലിലാണുള്ളതെന്ന് അവള്‍ക്കു മനസിലായി. അവള്‍ പരിഭ്രാന്തയായി അലക്‌സിനെ തിരഞ്ഞു. അവന്‍ അപ്പുറത്ത് മാറിയിരുന്നു ഉറങ്ങുന്നുണ്ട്. അവള്‍ ആശ്വസത്തോടെ എഴുനേല്‍ക്കാന്‍ ശ്രമിച്ചു.

 ഇച്ചായി.. ഇസ ഇടറിയ ശബ്ദത്തോടെ അവനെ വിളിച്ചു.

അവളുടെ ശബ്ദം കേട്ട അലക്‌സ് മയക്കം വിട്ടുണര്‍ന്നു. അവന് ഇസ ഉണര്‍ന്നതു കണ്ടു ആശ്വാസം തോന്നി.

അലക്‌സ് അവളുടെ അവളുടെ സമീപത്തേക്കുവന്നിരുന്നു. അവളെ തലോടി ആശ്വസിപ്പിച്ചു.

നിറഞ്ഞ കണ്ണുകളോടെ അവള്‍ അവനെ കെട്ടിപ്പിടിച്ചു കരഞ്ഞു. അവളുടെ കണ്ണില്‍ നിന്നും എത്ര ശ്രമിച്ചിട്ടും ആ കാഴ്ച മായുന്നുണ്ടായിരുന്നില്ല. അവളുടെ ഉള്ളില്‍ ഭയം മാത്രമായിരുന്നു. അവനും അവള്‍ നന്നേ ഭയന്നിരുന്നുവെന്നു മനസിലായി.

എന്നാലും എന്റെ ചട്ടമ്പി ഇത്രേയുള്ളോ.. ഭാവിയിലെ ഡോക്ടര്‍ ചോര കണ്ടു ബോധം പോയീന്നറിഞ്ഞാല്‍ നാണക്കേടാന്നേ…അലക്‌സ് അവളുടെ മൂടു മാറ്റാനായി ചെറു ചിരിയോടെ പറഞ്ഞു.

അതു കേട്ട അവള്‍ കണ്ണീരു തുടച്ച് അവനെ നോക്കി. അവള്‍ അപ്പോഴും ഭയത്താല്‍ വിറയ്ക്കുകയായിരുന്നു. അലകസ് അവളെ ചേര്‍ത്തു പിടിച്ചു.

ഇച്ചായി.. അയാള്‍.. അവള്‍ വിക്കി വിക്കി പറഞ്ഞു.

എന്റെ മോളു പേടിക്കെണ്ട.. ഒരു ദുസ്വപ്‌നം കണ്ടെന്നു കരുതിയാല്‍ മതി. അവന്‍ അവളെ ആശ്വസിപ്പിച്ചു.

ആരാ ഇച്ചായി അയാള്‍…. അയാളെ പോലീസ് അറസ്റ്റു ചെയ്‌തോ..