ഓണത്തുമ്പി [രേഷ്മ] 139

വൈകുന്നേരം ഹരിയേട്ടനെ കണ്ടു ഒരു സോറി പറയാം എന്നു വിചാരിച്ചു ചന്ദന ഹരിയുടെ വീട്ടിലേക്കു ചെന്നെങ്കിലും ഹരി അവിടെ ഉണ്ടായിരുന്നില്ല

“” ചന്ദനെ നാളെ രാവിലെ അമ്പലത്തിൽ പോവാട്ടോ ഇതാ ഇതുടുത്തു വേണംട്ടോ വരാൻ “”എന്നും പറഞ്ഞു ഹരിത ഒരു പൊതി കൂടി ചന്ദനയുടെ കയ്യിൽ കൊടുത്തു..

“”മോൾക് ഇഷ്ടാവോന്നു അറീല്ല കുട്ട്യോൾക്ക് ഓണ കോടി എടുത്തപ്പോ മോൽക്കൂടെ ഒരു ദാവണി എടുക്കാൻ ഞാൻ പറഞ്ഞതാ സെലെൿഷൻ ഒക്കെ ഹരിയുടേത് ആണ്.. മോള് ഇട്ടു നോക്കു പാകം ആകുന്നില്ലാച്ചാ തിരിച്ചു കൊടുക്കാം.. “” സരസ്വതി അമ്മ പറഞ്ഞു

ചന്ദനയ്ക്ക് അതൊക്കെ പുതിയ അനുഭവങ്ങൾ ആയിരുന്നു ഓണക്കോടി യും അതും ദാവണിയും ഒക്കെ…ദാവണി ഹരിയേട്ടന്റെ സെലെക്ഷൻ ആണെന്നറിഞ്ഞ അവൾക്കു വല്ലാത്തൊരു സന്തോഷം തോന്നി കൂടെ ചെറിയൊരു നാണവും.. ഇതെടുക്കുമ്പോ എന്തായാലും തന്നെ ഓർത്തിട്ടുണ്ടാവണം അല്ലതെങ്ങനെ അളവ് കിട്ടും… എന്താണെങ്കിലും കുളിച്ചിട്ടു ഇട്ടു നോക്കണം… അവൾ വീട്ടിലേക്കു നടക്കുമ്പോൾ അതാണ് ചിന്തിച്ചത്

വീട്ടിലെത്തി അച്ഛനെയും അമ്മയെയും ഡ്രസ്സ്‌ കാണിച്ചു.. അവർക്ക് ഇഷ്ടമായി

“”അല്ല മോളെ പണ്ടൊരിക്കൽ ദാവണി ഉടുക്കാൻ പറഞ്ഞപ്പോൾ മോളെന്താ പറഞ്ഞത് അതൊക്കെ ഓണം കേറാ മൂലയിലെ ഡ്രസ്സ്‌ ആണെന്നല്ലേ… ഇപ്പോ ഇതെങ്ങനെ “” ചെറിയൊരു ചിരിയോടെ വിശ്വൻ ചോദിച്ചു..

“”അതേ ചേരയെ തിന്നുന്ന നാട്ടിലെത്തിയാൽ നടു കഷ്ണം തിന്നണം എന്നല്ലേ അച്ഛൻ പറഞ്ഞു തന്നേക്കുന്നതു “”

“”ഇതു നിങ്ങടെ മോളു ചേരയെ മുഴുവനോടെ തിന്നും എന്നാ തോന്നണേ “” വിശ്വന് ചായ കൊണ്ടു കൊടുക്കുന്നതിനിടയിൽ പ്രമീള ചിരിച്ചു കൊണ്ട് പറഞ്ഞു..

“”പോ അമ്മേ…””പ്രമീളയെ കൊഞ്ഞനം കുത്തി കാണിച്ച ശേഷം ചന്ദന അവളുടെ മുറിയിലേക് ഓടി..

പച്ച നിറമുള്ള ദാവണിയുടുത്തു കണ്ണാടിക് മുന്നിൽ നിന്നവൾ തിരിഞ്ഞും മറിഞ്ഞും നോക്കി.. ആ നിറത്തിൽ അവളുടെ നിറം എടുത്തു കാണിച്ചു… അളവെടുത്തു തയ്ച്ച പോലെ കൃത്യം ആയിരുന്നു അതു.. അതാണ് അവളെ അത്ഭുത പെടുത്തിയത്..

“”അച്ഛാ ഹരിതേച്ചിയുടെ കുട്ടികൾക്കു ഓണ കോടി എടുക്കാൻ പോകുമ്പോ എന്നെയും കൂട്ടണേ.. ”കിടക്കാൻ പോകുന്നതിനു മുൻപേ അവൾ അച്ഛനെ ഓർമിപ്പിച്ചു

“”എന്താ മോൾക് എന്തേലും എടുക്കാനുണ്ടോ.. “”

“”ഉണ്ട്‌ അച്ഛാ എനിക്ക് എടുക്കാനുണ്ട്.. “”
മറുപടി പറഞ്ഞ ശേഷം അവൾ മുറിയിലേക്കു പോയി..

അമ്പലത്തിൽ പോകേണ്ടത് കൊണ്ട് ചന്ദന രാവിലെ തന്നെ എഴുന്നേറ്റു…ഇരുട്ട് മാറി വരുന്നതെ ഉണ്ടായിരുന്നുള്ളു ജനൽ പാളികൾ തുറന്നപ്പോൾ തണുത്ത കാറ്റു മുറിക്കുള്ളിലേക് അരിച്ചെത്തി പുറത്തു നല്ല മഞ്ഞു വീഴ്ചയുണ്ട് ജനൽ ഗ്ലാസിൽ പറ്റി പിടിച്ചിരിക്കുന്ന ജല കണങ്ങൾ പതിയെ താഴേക്കു ഉരുണ്ട് വീണു പിന്നിലെ തൊടിയിൽ പൂത്ത മുല്ലപ്പൂവിന്റെ ഗന്ധവും വഹിചെത്തിയ കാറ്റ് അവളെ കടന്നു പോയി.. തോർത്തും സോപ്പും മാറാനുള്ള ദാവണിയും കയ്യിൽ എടുത്തു അവൾ വടക്കേപുറത്തേക് നടന്നു അവിടെയാണ് ചുറ്റും കൽപ്പടവുകൾ ഉള്ള കുളം.. അതിനു കുളപ്പുരയും ഉണ്ട്..

രാവിലെ കുളത്തിൽ കുളിക്കാൻ പോകുന്നത് കണ്ടാൽ അമ്മ വഴക്ക് പറയും അതു കൊണ്ട് തന്നെ വളരെ പതിയെ ആണ് ഫ്രണ്ട് ഡോർ തുറന്നു പുറത്തിറങ്ങിയത് ഹരിയേട്ടന്റെ റൂമിൽ വെളിച്ചം കണ്ടു..