ഒടിയൻ [അപ്പു] 244

ക്രൂദ്ധനായ നായരുടെ അലർച്ച കേട്ട് പറയനും പുലയനും പേടിച്ച് വിറച്ചു. എന്നാൽ ആജ്ഞ സ്വീകരിച്ച് കടിച്ച് കീറാൻ വെട്ടപ്പട്ടികളെ പോലെ വന്നവർ നാലുപാടും തെറിച്ച് വീഴുന്ന കാഴ്ചയാണ് പിന്നീട് അവിടെ കണ്ടത്. കണ്ണനെ കൊല്ലാൻ പോയിട്ട് ഒന്ന് വീഴ്ത്താൻ പോലും ഒരാൾക്കും ആയില്ല. പത്ത് മല്ലന്മാരെ ഒറ്റക്ക് നേരിട്ട കണ്ണനെ കണ്ടവർ കണ്ണുതള്ളി നിന്നു. വടക്കൻപാട്ടിലെ വീരനെ കണ്ട പ്രതീതി. ഒരു തവണ കിട്ടിയവരൊന്നും പിന്നെ എഴുന്നേറ്റില്ല അതുപോലെ മർമ്മസ്ഥാനങ്ങളിൽ ക്ഷതമെല്പിച്ച് കണ്ണൻ അവരെ തളർത്തി.

മടിയിൽ അളന്നിട്ട ഒരു നാഴിക്ക് പകരം ഓരോ ചാക്കുകളും ഓരോ കിഴി പണവും കണ്ണൻ തന്നെ ആ പണിക്കാരെ ഏൽപ്പിച്ചു. മല്ലന്മാരെ ഒറ്റയടിക്ക് മലർത്തിയവനോട് കോർക്കാൻ കേശവൻനായർ മടിച്ചു.

നാളെ മുതൽ ചെയ്യുന്ന ജോലിക്ക് കൂലി കിട്ടിയില്ലെങ്കിൽ ഒരാള് പോലും നിന്റെ പറമ്പിൽ പണിക്ക് വരില്ല. പണിക്ക് നീ പുറത്തൂന്ന് ആളെ ഇറക്കിയാൽ നീയും നിന്റെ നിലവും പറയും നെല്ലും പറയന്റേം പുലയന്റേം വീട്ടിൽ ഇരിക്കും. അവർക്ക് വേണ്ടത് ധൈര്യമാണ് അത് കിട്ടിയാൽ നീ അവർക്ക് വെറും പുഴു. തുഫ്…..

മുഖത്തോട് മുഖം നോക്കി താക്കീതായി കണ്ണൻ അത് പറഞ്ഞപ്പോൾ കേശവൻ നായർക്ക് അത് സഹിക്കാവുന്നതിലും അപ്പുറമായി. നെഞ്ചും വിരിച്ച് പുച്ഛവും മുഖത്ത് നിറച്ചു പണിക്കാരും പടിയിറങ്ങിയപ്പോൾ തന്റെ തൊലിയുരിഞ്ഞ് പോവുന്നതായി അയാൾക്ക് തോന്നി.

കുഞ്ചാ…… അവർ പോയതും അയാൾ അലറി

അടിയുടെ ഇടയിൽ എവിടെയോ പോയി ഒളിച്ച കുഞ്ചൻ ഓടി അടുത്ത് വന്നു.

തമ്പ്രാ…
നീ പോയി ഭാർഗവനോട് വരാൻ പറ. ഇപ്പൊ തന്നെ. അവൻ ഇനി സൂര്യോദയം കാണരുത്. ആ വാലാട്ടി പട്ടികളും.
അവർ പോയ പടിപ്പുരയിലേക്ക് നോക്കി പകയോടെ അയാൾ പറഞ്ഞു. പക്ഷെ കുഞ്ചൻ അത്കേട്ട് വിറച്ചു.

തമ്പ്രാ.. അത്.. ഈ രാത്രി.. ഒടിയന്റെ അടുത്തേക്ക്..???

ക്രൂദ്ധമായ ഒരു നോട്ടമായിരുന്നു അതിനുള്ള ഉത്തരം. അയാളുടെ കണ്ണിലെ കത്തുന്ന പക കണ്ട കുഞ്ചൻ പിന്നെ നിന്നില്ല ഭാർഗവനെ അന്വേഷിച്ച് ഇറങ്ങിയാൽ എന്തെങ്കിലും പറ്റുമോ എന്ന് ഭയം മാത്രമേ ഉള്ളു ഇനി അവിടെ നിന്നാൽ മരണം ഉറപ്പാണെന്ന് അയാൾക് തോന്നി അയാൾ ആദ്യത്തെ വഴി തിരഞ്ഞെടുത്തു.

ദേശത്തെ ഓലമേഞ്ഞ പാർട്ടി ആപ്പീസിൽ അന്ന് വിജയാഘോഷം ആയിരുന്നു. ഒരുപക്ഷെ വിജയത്തിലേക്കുള്ള ആദ്യ പടി. സാധാരണ ഒളിഞ്ഞും മറഞ്ഞും വരുന്ന രണ്ടുമൂന്നു ആളുകൾക്ക് പകരം ഇന്ന് കുറച്ച് നാട്ടുകാർ കൂടി വന്നിരുന്നു. വൈകിട്ട് കേശവൻ നായരുടെ വീട്ടിൽ നിന്നിറങ്ങി പോന്നവരും അത് കണ്ടുനിന്നവരും ആക്കൂട്ടത്തിൽ ഉണ്ടായിരുന്നു. പാടിയും വാക്കാൽ പ്രസംഗിച്ചും നടന്നത് ചെയ്തു കാട്ടിയ പുലിക്കുട്ടിയെ കാണാനും തങ്ങളുടെ ദുരിതങ്ങൾക്ക് ഒരു അന്ത്യമാക്കാനും അവർ അവരോടൊപ്പം കൂടി.