MOONLIGHT VI (മാലാഖയുടെ കാമുകൻ) 816

അയാൾ അവരെ ഒന്ന് നോക്കി തിരിഞ്ഞു നടന്ന് ഒരു വണ്ടിയിൽ കയറിയപ്പോൾ അത് മുൻപോട്ട് നീങ്ങി.. പുറകെ അവിടെ കിടന്ന മറ്റു വണ്ടികളും..

“അതാരാണ്..? അയാളെ വിടണ്ടായിരുന്നു.. അയാൾക്ക് എന്തൊക്കെയോ അറിയാം.. എന്റെ പേര് വരെ..”

ജെയിംസ് സംശയത്തോടെ ട്രിനിറ്റിയെ നോക്കി.

“ഇവർ മെസ്സഞ്ചർസ് ആണ്.. അവരെ പിടിച്ച് നിർത്തിയിട്ട് ഒരു കാര്യവും ഇല്ല..

പക്ഷെ ഇവരെ ആക്രമിച്ചത് മനുഷ്യർ തന്നെയാണ് എന്ന് തോന്നുന്നു.. ജെയിംസ് വിചാരിക്കുന്നതിലും ഒരുപാട് മുകളിൽ ആണ് ചില മനുഷ്യർ ഇന്ന്.. എല്ലാത്തിന്റെയും ഉത്തരം അകത്ത് ഉണ്ട്..”

ട്രിനിറ്റി അത് മാത്രം പറഞ്ഞു മുൻപോട്ട് നടന്നപ്പോൾ അവർ പരസ്പരം ഒന്ന് നോക്കി അവളുടെ പുറകെ നടന്നു..

“ആയുധങ്ങൾ മാറ്റി വച്ചോളു..”

മുൻപിൽ ചെറിയ ഒരു അമ്പലം പോലെ ഒരു നിർമിതി കണ്ടപ്പോൾ ട്രിനിറ്റി അവരോട് പറഞ്ഞു അകത്തേക്ക് കയറി..

അവർ എല്ലാം ആയുധം വച്ച ശേഷം അകത്തേക്ക് കയറി.. അകത്ത് ഒരു ഒഴിഞ്ഞ ഹാളിൽ ഒരു ചെറിയ തല മുണ്ഡനം ചെയ്ത പെൺകുട്ടി അടിച്ചു വാരുന്നുണ്ടായിരുന്നു.. കാവി ആണ് അവളുടെ വേഷം.. ഒറ്റ നോട്ടത്തിൽ ഒരു ബുദ്ധ വിശ്വസിയെ പോലെ തോന്നി..

അവൾ അവരെ കണ്ടതും ഒന്ന് പുഞ്ചിരിച്ചുകൊണ്ട് ഇരിക്കാൻ ആഗ്യം കാണിച്ചു.. അവർ എല്ലാവരും അടിച്ചു വാരി കഴിഞ്ഞ ഒരിടത്ത് ഇരുന്നു..

ആ പെൺകുട്ടി ജോലി തുടർന്നു.. മുഴുവൻ അടിച്ചു വാരി വൃത്തി ആയ ശേഷം അവൾ കൈ കാലുകൾ ഒന്ന് കഴുകി തുടച്ച ശേഷം അല്പം ഉയർന്ന ഒരു ഇടത്ത് ഇട്ട മരത്തിന്റെ പാളിയിൽ ഇരുന്നു..

ഒന്ന് കണ്ണുകൾ അടച്ചു ഇരുന്ന ശേഷം അവൾ പുഞ്ചിരിയോടെ കണ്ണ് തുറന്നു നോക്കി..

“ഇതൊരു അത്ഭുതം ആണല്ലോ.. രാജാവിന്റെ മൂന്നു പത്നിമാരും ഒരുമിച്ച്.. കൂടെ ഒരു ഹാഫ് ബ്ലഡ്‌ എൽഫ്.. കുറച്ചു മനുഷ്യർ..

മ്മ്മ്.. ഒഹ്.. നിങ്ങൾ തേടുന്നവൾ എവിടെ ആണെന്ന് എനിക്ക് അറിയാം. പക്ഷെ വേണ്ട.. അത് നടക്കില്ല.. പൊയ്ക്കോളൂ.. ഞാൻ അത് പറഞ്ഞാൽ ഈ ഭൂമിയിലെ സമാധാനം ഇല്ലാതെ ആകും.. പൊയ്ക്കോളൂ.. എല്ലാം ഒരു സ്വപ്നം മാത്രം ആണെന്ന് വിചാരിച്ചോളൂ..”

അവൾ അത് മാത്രം പറഞ്ഞു കണ്ണുകൾ അടച്ചപ്പോൾ അവർക്ക് ഒന്നും മനസ്സിലായില്ല..

“പോകാൻ വന്നവർ ആണെന്ന് തോന്നുന്നുണ്ടോ ഞങ്ങളെ കണ്ടിട്ട്..?”

ട്രിനിറ്റി അത് ചോദിച്ചപ്പോൾ അവൾ കണ്ണുകൾ തുറന്ന് അവളെ ഒന്ന് നോക്കി.. അതിന് ശേഷം അവൾ ഒന്ന് പുഞ്ചിരിച്ചു.. വല്ലാത്ത ഒരു പുഞ്ചിരി..

“നിങ്ങൾക്ക് ഞാൻ പറയാൻ പോകുന്ന രണ്ട് കാര്യങ്ങളിൽ ഏതെങ്കിലും ഒന്ന് ചെയ്യാം..”

അവൾ കണ്ണുകൾ അടച്ചുകൊണ്ട് അത് പറഞ്ഞപ്പോൾ എല്ലാവരും ചെവികൾ കൂർപ്പിച്ചു..

“ഒന്ന്…, എല്ലാവരും പഴയ ജീവിതത്തിലേക്ക് തിരിച്ചു പോകുക.. അമേരിക്കയിൽ നിന്നും വന്നവർ അവരുടെ ജോലികൾ തുടരുക.. ഒരു എൽഫ് ആണ് താൻ എന്ന കാര്യം മറന്ന് ജൂഹി തിരികെ ജോലിയിൽ പ്രവേശിക്കുക.. സാധാരണ ജീവിതം നയിക്കുക..

മീനാക്ഷിയും അർച്ചനയും നിങ്ങളുടേതായ ജീവിതത്തിലേക്ക് തിരിയുക.. ട്രിനിറ്റി നിന്റെ ഗ്രഹത്തിലേക്ക് തിരികെ പോകുക.. തൽക്കാലം എൽവിഷ് ലോകം ഒരു ആപത്തിൽ ആണെന്ന് ഉള്ള കാര്യം വിസ്മരിക്കുക.. എല്ലാം ഒരു സ്വപ്നം പോലെ മറന്ന് കളയുക..”

അവൾ അത് പറഞ്ഞ ശേഷം ഒന്ന് നിശബ്ദം ആയി..