MOONLIGHT VI (മാലാഖയുടെ കാമുകൻ) 816

വലിയ ഒരു പാറകെട്ടിന് മുകളിൽ ആയിരുന്നു ഷിപ് നിർത്തിയിരുന്നത്… ഒരു ഭാഗത്ത് കറുത്ത നിറം ഉള്ള സമുദ്രം.. മറു ഭാഗത്ത് കൊടും കാട്.. വല്ലാത്ത കാറ്റ് വീശി അടിക്കുന്നു.. ആകെ മൊത്തം ഇരുട്ട് ആണ്.. ആകാശം കാണുന്നില്ല..

ആകെമൊത്തം വല്ലാത്ത ഒരു പേടി തോന്നുന്ന ഒരിടം..

“അവൾ എവിടെ..? ആ വെളുത്ത മുടിയുള്ള..?”

എമ്മ പതിയെ ആലിസിനെ നോക്കി ചോദിച്ചു.. ചോദിച്ചു തീർന്നതും മുകളിൽ ശക്തമായ ഒരു ചിറകടി ശബ്ദം കേട്ട് അവർ എല്ലാവരും ഞെട്ടി മുകളിലേക്ക് നോക്കി..

അവരുടെ ജീവിതത്തിലെ ഏറ്റവും മനോഹരമായ കാഴ്ചകളിൽ ഒന്നാണ് അതെന്ന് അവർക്ക് തോന്നി.

തൂവെള്ള വേഷം ധരിച്ച ഡിസംബർ വലിയ തൂവെള്ള ചിറകുകൾ വീശി അടിച്ചു വന്നു താഴേക്ക് ഇറങ്ങി അവരുടെ മുൻപിൽ നിന്ന് ചിറകുകൾ ഒതുക്കി വച്ചു..

“ഇതൊരു എയ്ഞ്ചൽ ആയിരുന്നോ..?”

അത്ഭുതം കൊണ്ട് പരവശർ ആയ ജെയിംസും കൂട്ടരും സ്വയം ചോദിച്ചപ്പോൾ ഡിസംബർ അവളുടെ കയ്യിൽ ഇരുന്ന വില്ല് ഒന്ന് വലിച്ച് പുറകിൽ തൂക്കി.. അവരെ നോക്കി പുഞ്ചിരിച്ചു..

“വില്ലിൽ അമ്പ് ഇല്ലല്ലോ..?”

എമ്മ ജൂഹിയുടെ ചെവിയിൽ പറഞ്ഞപ്പോൾ ഡിസംബർ ചിരിച്ചു.

“പോകാം..?”

അവൾ എല്ലാവരെയും നോക്കി.. എല്ലാവരും തയ്യാർ ആയിരുന്നു..

“കിങ് വേൾഡ് ബിലോ..ഞങ്ങൾ ഇത് ചെയ്യുന്നത് അഹങ്കാരം കൊണ്ടല്ല.. എൽവിഷ് ലോകത്തിന്റെ നിലനിൽപ്പിന് വേണ്ടി മാത്രം ആണ്..”

ഡിസംബർ അത് പറഞ്ഞ ശേഷം അവളുടെ പുറകിൽ നിന്നും വില്ല് എടുത്തു..

അവൾ അത് ആകാശത്തിലേക്ക് പൊക്കി.. ഇരു വിരലുകൾ ചേർത്ത് ഞാണിൽ പിടിച്ച് പുറകിലേക്ക് വലിച്ചപ്പോൾ അതിൽ സ്വർണ നിറമുള്ള അസ്ത്രം തെളിഞ്ഞു വന്നു..