MOONLIGHT VI (മാലാഖയുടെ കാമുകൻ) 816

“അല്ല യുദ്ധം ചെയ്യാൻ ആണെങ്കിലും നമ്മൾ ആകെ കുറച്ചുപേരെ ഉള്ളു.. ഒരിക്കലും ജയിക്കില്ല..”

ജാക്കും അത് പറഞ്ഞു..

ഡിസംബർ നിലത്തേക്ക് നോക്കി എന്തോ ആലോചിച്ചു നിന്നു.. അവൾ വല്ലാത്ത ദേഷ്യത്തിൽ ആണെന്ന് അവർക്ക് തോന്നി..

“ആആആആആ….”

അവൾ വാൾ നിലത്തേക്ക് ഇട്ട് അലറിവിളിച്ചപ്പോൾ എല്ലാവരും ഒന്ന് ഞെട്ടി അവളെ പകച്ചു നോക്കി..

അവൾ പുറകിൽ നിന്നും അവളുടെ വില്ല് വലിച്ചെടുത്ത് അതിലെ ഞാൺ വലിച്ചു ആകാശത്തേക്ക് ഉയർത്തി.. അതിൽ അസ്ത്രം തെളിഞ്ഞു വന്നു..

“ഫും….!”

ഇരുട്ടിനെ കീറി മുറിച്ചുകൊണ്ട് ആദ്യത്തെ അസ്ത്രം ആകാശത്തേക്ക് ഉയർന്നു മേഘങ്ങളുടെ ഇടയിൽ മറഞ്ഞു… അതുപോലെ അവൾ ചുറ്റിനും ഏഴ് അസ്ത്രങ്ങൾ അയച്ച ശേഷം ട്രിനിറ്റിയെ നോക്കി..

“ട്രിനിറ്റി.. വെപ്പൺസ്..”

ട്രിനിറ്റി തലയാട്ടിയപ്പോൾ ആരോ വിളിച്ചത് പോലെ വട്ടം കറങ്ങി ട്രിനിറ്റിയുടെ സ്പേസ് ഷിപ് അവർക്ക് മുൻപിൽ വന്നു ഡോർ തുറന്ന് നിന്നു..

അവൾ അതിൽ നിന്നും വലിയ ഒരു ബോക്സ്‌ വലിച്ച് നിലത്തേക്ക് ഇട്ടു തുറന്നു..

ജെയിംസിന്റെയും കൂട്ടരുടെയും കണ്ണ് മിഴിഞ്ഞുപോയി.. ഏറ്റവും മികച്ച യന്ത്ര തോക്കുകൾ.. വേസ്റ്റുകൾ.. ബോംബുകൾ.. മിനി ഗൺ വരെ അതിനുള്ളിൽ ഉണ്ട്..

“മെറിൻ, ലിസ, ജെയിംസ്, ഒലിവർ, ജാക്ക്, ആലിസ്, എമ്മ.. ഇതിൽ പറ്റുന്നത് എല്ലാം എടുത്ത് തയാറാകുക..”

ഡിസംബർ അവരോട് പറഞ്ഞപ്പോൾ അവർ എന്താണ് ഉദ്ദേശം എന്ന് അറിയാതെ തല കുലുക്കി..

“ട്രിനിറ്റി.. വിളിക്ക്.. ഡെൽറ്റയെ വിളിക്ക്..!”