MOONLIGHT VI (മാലാഖയുടെ കാമുകൻ) 821

“വീണ്ടും കാണും..”

“ഇനി കാണുമ്പോൾ നിന്റെ ആ സുന്ദരമായ ചിറകുകൾ ഞാൻ അരിഞ്ഞു എടുക്കും…”

അവൾ അത് പുഞ്ചിരിയോടെ ആണ് പറഞ്ഞത്.. അത് കേട്ടിട്ടും ഡിസംബർ മറുപടി പറയാതെ തിരിഞ്ഞു നടന്നു.. അവരുടെ പുറകെ മറ്റുള്ളവരും.. വാതിൽ കടന്നതും നേരത്തെ അവളുടെ വാൾ വാങ്ങിയവൻ അത് ഡിസംബറിന്റെ കാൽചുവട്ടിലേക്ക് ഇട്ടു കൊടുത്തു.. പുച്ഛത്തോടെ..

“നിന്റെ ജീവൻ ഇപ്പോൾ ദാനം കിട്ടിയത് പോലെ നിലത്ത് നിന്നും എടുത്തോളൂ…”

“സ്സ്…”

അത് കേട്ടപ്പോൾ ട്രിനിറ്റി ചീറിക്കൊണ്ട് മുൻപോട്ട് നീങ്ങിയതും ഡിസംബർ അവളുടെ കൈ പിടിച്ചു വച്ച് വാൾ നിലത്ത് നിന്നും എടുത്തു..

“നിന്റെ തല വെട്ടുന്നത് ഞാൻ ആയിരിക്കും.. അത് എന്റെ വാക്ക്..”

ഡിസംബർ അവനോട് അത് മാത്രം പറഞ്ഞു നടന്നു.. എല്ലാവരും പുറകെ.. നടന്നു.. നിരാശയോടെ..

“തിരിച്ചു പോയാൽ ശരിയാകുമോ.. അപ്പോൾ എൽവിഷ് ലോകം..? അവൾ പറഞ്ഞ ആൾ ആരാണ്..?”

ജെയിംസ് അത് ചോദിച്ചു എങ്കിലും മറുപടി ഉണ്ടായില്ല.. ട്രിനിറ്റി അവനെ നോക്കി ഒന്ന് കണ്ണ് അടച്ചപ്പോൾ പിന്നീട് സംസാരിക്കാം എന്നാണ് പറഞ്ഞത് എന്ന് ജെയിംസിന് തോന്നി..

അവർ നേരെ പുറത്തേക്ക് ഇറങ്ങി വന്നു.. ഗേറ്റ് അടഞ്ഞതും ആകെ ഇരുട്ട് വ്യാപിച്ചു.. മുൻപിൽ പാലം വന്നു.. അവർ അതിൽ കയറി അത് തിരിച്ചു അവർ നിന്ന അവിടേക്ക് ചെന്നു..

എല്ലാവരും ഇറങ്ങി.. ആരും ഒന്നും മിണ്ടിയില്ല..

“തിരിച്ചു പോകുക ആണെന്ന് തോന്നുന്നു അല്ലെ..? അവൾ പറഞ്ഞത് ഏതോ വലിയ വില്ലൻ ആണെന്ന് തോന്നുന്നു.. താനോസ് പോലെ ആയിരിക്കും ചിലപ്പോൾ..”

എമ്മ ആലിസിന്റെ ചെവിയിൽ അത് പറഞ്ഞപ്പോൾ അവൾ ഒന്നും മിണ്ടിയില്ല..