MOONLIGHT V (മാലാഖയുടെ കാമുകൻ) 953

എമ്മ പേടിച്ചു ഒലിവറിന്റെ പുറകിൽ പോയി നിന്ന് വിറച്ചപ്പോൾ അവനും വിറച്ചു കൊണ്ടാണ് മുൻപിലേക്ക് നോക്കിയത്..

അവർ വീണ്ടും മഞ്ഞ് കുന്നിന്റെ മുകളിലേക്ക് നോക്കി..

അവിടെ ഒരാൾ.. ഒരാൾ അല്ല,
കറുത്ത വേഷം അണിഞ്ഞ മനുഷ്യനോട് സദൃശ്യം ഉള്ള ഒരു പെണ്ണ്.. കൂർത്ത ചെവിയും അല്പം കൂർത്ത താടിയും വലിയ നീല കണ്ണുകളും ഉള്ള ഒരു ജീവി.. ശരീരം മനുഷ്യന്റെ ആണ്.. ഒരു പെണ്ണിന്റെ തനി രൂപം..

അതിന്റെ നീളൻ വാൾ പുറകിൽ കിടന്ന് വെട്ടുന്ന കാഴ്ച കണ്ടപ്പോൾ ആ തണുപ്പിലും അവർ വല്ലാതെ വിയർത്തു..

കനത്ത മഞ്ഞിൽ പല ജീവികളും ഉണ്ടെന്ന് കേട്ടിട്ടുണ്ട്.. യതി പോലെ.. എന്നാൽ ഇതുപോലെ ഒരെണ്ണം പറഞ്ഞു കേട്ടിട്ട് പോലും ഇല്ല..

അത് മനുഷ്യൻ നടക്കുന്നത് പോലെ പതിയെ ഇറങ്ങി ആവരുടെ അടുത്തേക്ക് വന്നപ്പോൾ അവർ വിറച്ചു നിന്നു.. പക്ഷെ കാലുകൾ പുറകോട്ട് ചലിച്ചു..

പെട്ടെന്ന് ഒരു തോന്നലിൽ ജാക്ക് നിലത്ത് കിടന്ന മഞ്ഞിൽ പുതഞ്ഞ ഒരു വലിയ കല്ല് എടുത്ത് തലക്ക് മുകളിൽ പിടിച്ച് ഓങ്ങി നിന്നു..

“അടുത്ത് വരരുത്..! പോ…!”

അവൻ അലറിയപ്പോൾ ആ ജീവി അത് കണ്ട് ഒന്ന് ചിരിച്ചു.. അവളുടെ കൂർത്ത പല്ലുകൾ കണ്ടപ്പോൾ അവർക്ക് എന്താണ് ചെയ്യേണ്ടത് എന്ന് പോലും അറിയാത്ത അവസ്ഥ ആയി..

അവൾ അല്പം കൂടെ മുൻപോട്ട് വന്ന് കൈ ഉയർത്തി ബ്ലേഡ് മാറി നിൽക്കുന്ന തരത്തിൽ ഉള്ള നഖങ്ങൾ പുറത്തേക്ക് നീട്ടി കാണിച്ച് ജാക്കിനെ ഒന്ന് നോക്കി..

അതോടെ അവൻ ആ കല്ല് നിലത്തേക്ക് ഇട്ടു കൈ പൊക്കി കാണിച്ചു.. എതിർത്ത് നിൽക്കാൻ പറ്റില്ല എന്ന് ബോധ്യം വന്നു..

“കണ്ടാൽ ശക്തന്മാർ ആണെന്ന് തോന്നും എങ്കിലും നിങ്ങൾക്ക് പേടി കൂടുതൽ ആണല്ലോ..?”

അവൾ പെട്ടെന്ന് അത് ചോദിച്ചപ്പോൾ എല്ലാവരും ഒന്ന് ഞെട്ടി.. അത് മനുഷ്യനെ പോലെ സംസാരിക്കുന്നു.. ഒരു പെണ്ണിന്റെ സ്വരം തന്നെ..

“ങേ.. ഞങ്ങളുടെ ഭാഷ അറിയാമോ.. നിങ്ങൾ ആരാ..?”

ജെയിംസ് അവളെ ആകാംഷയോടെ നോക്കി..

“ലുക്കിങ് ഫോർ ദാറ്റ്‌..?”

അവൾ കൈ വിരൽ ഒന്ന് ഞെടിച്ചപ്പോൾ കുറച്ചു അപ്പുറം മാറി കിടന്ന സ്പേസ് ഷിപ് വല്ലാത്തൊരു മൂളലോടെ തെളിഞ്ഞു വന്നു.. നീല വെളിച്ചം വിതറി വല്ലാത്ത ഒരു ശബ്ദത്തോടെ മഞ്ഞിൽ ഉറച്ചു നിൽക്കുന്ന ഷിപ് അവർ എല്ലാവരും കണ്ടു..

അത് കണ്ടപ്പോൾ അവർക്ക് ആശ്വാസം തോന്നി.. അപ്പോൾ അതാരും കൊണ്ടുപോയിട്ടില്ല…

“അതെ.. പ്രിൻസസ്സ് ഓർക്കിഡ് ആണ് ഞങ്ങളെ ഇവിടേക്ക് വിട്ടത്..”

ജൂഹി അത് പറഞ്ഞപ്പോൾ അവൾ ജൂഹിയെ സൂക്ഷിച്ചു നോക്കി.. ആ വലിയ നീല കണ്ണുകൾ കണ്ടപ്പോൾ ജൂഹിക്ക് പേടി തോന്നി..

“അപ്പോൾ നീയാണ് അവൾ..”

അവൾ മുൻപോട്ട് വന്നു ജൂഹിയുടെ മുൻപിൽ നിന്നപ്പോൾ ജൂഹി ആകെ ആശയകുഴപ്പത്തിൽ ആയിരുന്നു.. അവൾ സംശയത്തോടെ ആണ് അതിനെ നോക്കിയതും.. ആ ഷിപ്പിന്റെ ഉള്ളിൽ അവൾ ഇട്ട വേഷം പോലെ ചില വേഷങ്ങൾ കണ്ടത് ജൂഹിക്ക് ഓർമ വന്നു..

“ഓർക്കിഡ് നിങ്ങളെ എന്റെ അരികിലേക്ക് ആണ് വിട്ടത്.. കുറച്ചു കാര്യങ്ങൾ പറഞ്ഞു തരാനും പഠിപ്പിക്കാനും..”