MOONLIGHT V (മാലാഖയുടെ കാമുകൻ) 953

“മീനാക്ഷി.. സറണ്ടർ ആൻഡ് ഷി ലിവ്സ്..”

അടുത്ത സ്വരം വന്നപ്പോൾ മീനു പതിയെ എഴുന്നേറ്റ് നിന്നു.. അവൾ മെല്ലെ കൈ പൊക്കി കീഴടങ്ങിയത് പോലെ കാണിച്ചു..

അവളുടെ കണ്ണുകളിൽ ഒരു തിളക്കം വന്നു.. കണ്ണടച്ചു തുറക്കും വേഗത്തിൽ ആണ് അവളുടെ ശരീരം ചുട്ട് പഴുത്തത്..

ഒറ്റ ചാട്ടത്തിന് അർച്ചനയുടെ അടുത്ത് എത്തിയ മീനാക്ഷി വലത്തേ കൈ കൊണ്ട് അവളെ പൊക്കി പിടിച്ച റോബോട്ടിന്റെ തലയുടെ അടിയിൽ ആഞ്ഞു കുത്തി.. അതിന്റെ തല തെറിച്ചു പോയതും അവൾ നിലത്തേക്ക് വീണ അർച്ചനയെ സ്വതവേ ഉള്ള രൂപത്തിലേക്ക് വന്ന് ചാടി പിടിച്ചു..

ഇരുവരും ഒരുമിച്ച് നിലത്തേക്ക് വീണു.. മീനാക്ഷിയുടെ സാരി എല്ലാം കത്തി പോയിരുന്നു..

“മീനു..”

അർച്ചന മീനാക്ഷിയെ വിളിച്ചു നോക്കി.. ഒരുപാട് നാളുകൾക്ക് ശേഷം ശക്തി പുറത്ത് എടുത്ത അവൾ വല്ലാതെ അവശ ആയിരുന്നു..

അത് കണ്ട് അടുത്ത റോബോട്ട് അടുത്ത് എത്തി അവൾക്ക് നേരെ കൈ നീട്ടിയതും അവൾ ആ കൈയ്യിൽ കയറി പിടിച്ചു.. ഇരുമ്പ് ഞെരിയുന്ന സ്വരം..

അവളുടെ ദേഹം ചുട്ട് പഴുത്തു.. അത് റോബോട്ടിന്റെ ദേഹത്തേക്കും കയറി..

“ആആആ…”

മീനു ഒന്ന് അലറിയപ്പോൾ അവൾ വല്ലാതെ ജ്വലിച്ചു.. അത് അവളുടെ കൈ വഴി കയറി റോബോട്ടിന്റെ കയ്യിലേക്ക് കയറി.

ഒരു നിമിഷം പോലും വേണ്ടി വന്നില്ല.., റോബോട്ടിന്റെ തല ഭാഗത്ത് ഒരു പൊട്ടി തെറി നടന്ന് പകുതി ഉരുകി ഒലിച്ചു അത് താഴേക്ക് വീണപ്പോൾ മീനാക്ഷി പുറകോട്ട് മറിഞ്ഞു..

“മീനു മോളെ..”

അർച്ചന വേഗം അവളുടെ ജാക്കറ്റ് ഊരി അവളുടെ നഗ്നത മറച്ചു.. അവളെ തട്ടി വിളിക്കാൻ ശ്രമിച്ചു…

വീണ്ടും എന്തോ ഞെരിയുന്ന സ്വരം കേട്ടപ്പോൾ അർച്ചന തല ചെരിച്ചു നോക്കി.. രണ്ട് റോബോട്ടുകൾ കൂടെ അവരുടെ നേരേക്ക് വരുന്നു..

അർച്ചനക്ക് എന്ത് ചെയ്യണം എന്ന് ഒരു പിടിയും ഇല്ലായിരുന്നു..

“ആരെങ്കിലും ഉണ്ടോ..?”

അവൾ ഒരു സഹായത്തിന് വേണ്ടി ചുറ്റും നോക്കി സ്വയം ചോദിച്ചു..

റോബോട്ട് അവളുടെ അടുത്ത് വന്നപ്പോൾ അവൾ മീനുവിനെ മറഞ്ഞു നിന്നു.. മീനുവിനെ വലിച്ച് പൊക്കി കുറച്ചു പുറകോട്ട് പോയി ഒരു പാറയിൽ ചാരി നിന്ന് കിതച്ചു..

അവളുടെ നെറ്റിയിൽ റോബോട്ടിന്റെ പുറകിൽ നിന്നും ഉയർന്നു വന്ന യന്ത്ര തോക്കിന്റെ ലെസർ ഫോക്കസ് പതിഞ്ഞപ്പോൾ അർച്ചന കണ്ണുകൾ ഇറുക്കെ അടച്ചു..

പെട്ടെന്ന് ഇടി വെട്ടും പോലെ വല്ലാത്തൊരു മുഴക്കം അവൾ കേട്ടു..

അതെന്താണ് എന്ന് കണ്ണുകൾ തുറന്ന് നോക്കും മുൻപേ റോബോട്ടുകൾ രണ്ടെണ്ണം ചിന്നി ചിതറി പോകുന്നത് അർച്ചന കണ്ടു..

അവൾ ഞെട്ടി മുകളിലേക്ക് നോക്കി.. മെയ് വൂൺ സ്പേസ് ഷിപ് ഒരെണ്ണം മുകളിൽ വട്ടം കറങ്ങുന്നു..

••••