” സിദ്ധു… മോനെ സിദ്ധുവേ “അമ്മ രാവിലെ മീൻവിളിക്കാരിയെ അനുസ്മരിപ്പിക്കുന്ന വിളി തുടങ്ങി.
ഒരു അവധി ദിവസം ആയിട്ടു ഉറങ്ങാനും വിടില്ല, എന്തായാലും കൂടപ്പിറപ് ആയ മടിയെ കൂട്ടുപിടിച്ചു പുതപ്പ് എടുത്ത് തലയ്ക്കു മുകളിൽ കൂടെ മറച്ചു കിടന്നു വീണ്ടും ഉറങ്ങാൻ ആയി കിടന്നു

” ഡി ഇന്നു ഞായറാഴ്ച അല്ലെ, ആ ചെറുക്കനെ ഒന്നു ഉറങ്ങാൻ വിട് ” അച്ഛൻ അമ്മയോട് പറയുന്നത് കേട്ടു

” ആഹാ, എന്നാൽ പിന്നെ നിങ്ങള് പോകുമോ പെണ്ണ് കാണാൻ ഇന്ന് ”
അമ്മ കലിപ്പിൽ അത് പറഞ്ഞപ്പോൾ ആണ് പെണ്ണ് കാണലിന്റെ കാര്യം ഓർത്തത്.

ഓഹ് പുല്ല്, ഇനി അതിനു പോണമല്ലോ, അമ്മ മിനിഞ്ഞാന്ന് പറഞ്ഞതാ പക്ഷെ മറന്നു പോയി. അപ്പോൾ ഇന്നത്തെ ഉറക്കം ഗോവിന്ദാ

“ടാ ചെറുക്കാ, മര്യാദയ്ക്കു എണിറ്റു വന്നേ, വെറുതെ എന്നേ അങ്ങോട്ട്‌ വരുത്തിക്കരുത് ”
ദേവിയെ… അമ്മയുടെ സൗണ്ടിന്റെ ട്യൂൺ മാറി തുടങ്ങി.
അതുകൊണ്ട് മടിയെ അടികൊടുത്തു വിട്ടു എണിറ്റു ചെല്ലാം.
അങ്ങനെ എണിറ്റു കൈലി വാരിചുറ്റി ഹാളിലേക് ചെന്നു.

ആഹാ സഖാവ് ശിവൻ ഇരുന്നു പുട്ട് അടിക്കുന്നുണ്ടല്ലോ. ഇന്ന് പാർട്ടി മീറ്റിങ്ങിൽ പോയി ഇരുന്നു തള്ളാൻ ആവും.

“അമ്മാ… ചായ ”
ഞാൻ ഓർഡറും ഇട്ടു അച്ഛൻ ഇരിക്കുന്ന അടുത്ത് കസേര വലിച്ചിട്ടു ഇരുന്നു ടീവി ഓൺ ആക്കി

ആഹാ ടീവിയിൽ ചന്ദ്രോത്സവം… ചിറയ്ക്കൽ ശ്രീഹരി… ബെസ്റ്റ് കണ്ണാ ബെസ്റ്റ്. അടിപൊളി,
അലേലും ലാലേട്ടനെ കണ്ടാൽ തന്നെ ഒരു പോസിറ്റീവ് ആണ്. അങ്ങേരു ആ മുണ്ട് ഉടുത്തു തലയിൽ തോർത്തു കെട്ടി ആ ബിജിഎം ഇട്ടു നടത്ത കണ്ടാൽ …. ഹോ രോമാഞ്ചിഫിക്കേഷൻ. ആ ഉറക്കക്ഷീണം അങ്ങ് പോയി…

അമ്മ അപ്പോഴേക്കും രണ്ടു കട്ടൻ എനിക്കും അച്ഛനും കൊണ്ട് വെച്ച്.

” എടിയേ, ഇന്നു മുട്ട ഇല്ലെടി രാധു? , പുട്ടും താറാമുട്ടയും സൂപ്പർ ആരുന്നു എല്ലാം പറഞ്ഞാൽ അല്ലാതെ അറിഞ്ഞു ചെയ്തൂടെ ” അച്ഛൻ ആത്മഗതാഗതം പോലെ പറഞ്ഞു

” ദേ മനുഷ്യാ, നിങ്ങളോട് അല്ലെ പാലും, മുട്ടയും വാങ്ങി വരാൻ ഇന്നലെ പറഞ്ഞു വിട്ടത് എന്നിട്ടു അതു മറന്നേച്ചു വന്നിട്ടു മുട്ട എവിടെ കുട്ട എവിടെ എന്ന് പറഞ്ഞു വന്നാൽ ഉണ്ടല്ലോ…. പപ്പടകോലാ കൈയ്യിൽ ഇരിക്കുന്നത് വെച്ച് കുത്തിത്തരും ഞാൻ ”
അമ്മ അതും പറഞ്ഞു ചാടി തുള്ളി അടുക്കളയിലോട്ടു പോയി