ചമ്പ്രംകോട്ട് മന

Chambrangott Mana | Author : Aadhidev

മുംബൈയിൽനിന്നും കൊച്ചിയിലേക്കുള്ള വിമാനം കയറിയ നന്ദൻ ഗഹനമായ ചിന്തയിലാണ്ടു. പത്തുവർഷങ്ങൾക്ക് ശേഷം താനും സുഹൃത്തുക്കളും കണ്ടുമുട്ടാൻ പോവുകയാണ്. സുഹൃത്തുക്കളെന്ന് പറയുമ്പോൾ പ്രൈമറി മുതൽ തന്നോടൊപ്പം പഠിച്ചവരാണ് ഹരിയും ദേവനും. ഡിഗ്രി വരെയും ഒന്നിച്ചു പഠിച്ച തങ്ങൾ ഒന്നിച്ചല്ലാതെ ഒന്നും ചെയ്തിട്ടില്ല. തനിക്ക് സാഹിത്യത്തിലാണ് താല്പര്യം എന്ന് തിരിച്ചറിഞ്ഞ് താൻ ആ വഴിക്ക് തിരിഞ്ഞപ്പോഴും തന്റെ ഉറ്റ മിത്രങ്ങൾ നല്ലതുപോലെ സപ്പോർട്ട് ചെയ്തിരുന്നു. ദേവൻ അവിടെ വില്ലേജോഫീസിൽ VEO ആണ്. ഹരി ഒരു സ്‌കൂൾ അധ്യാപകനും. താൻ മാത്രം എഴുത്തിനെയും അക്ഷരങ്ങളെയും പ്രണയിച്ച് ഭാവനയുടെ ലോകത്തേക്ക് ചേക്കേറി. എന്നിരുന്നാലും തനിക്ക് അതിൽ യാതൊരു ഖേദവുമില്ലെന്നും മറിച്ച് അത്യാഹ്ലാദമാണെന്നും നന്ദൻ സന്തോഷത്തോടെ ഓർത്തു. അങ്ങനെ പഴയ കാലവും കോളേജ് ജീവിതവുമൊക്കെ അയവിറക്കി ഇരിക്കുമ്പോഴേക്കും വിമാനം ലാൻഡ് ചെയ്തിരുന്നു.

എല്ലാം കഴിഞ്ഞ് പുറത്തിറങ്ങിയപ്പോഴേക്കും നന്ദന്റെ ഫോണിലേക്ക് ദേവന്റെ കാൾ വന്നിരുന്നു.

“അളിയാ സോറി ടാ.. ഞാനിവിടെ കുറച്ച് തിരക്കുകളിൽ പെട്ട് പോയി. എനിക്ക് വരാൻ പറ്റിയില്ലെടാ… സോറി ടാ…ഞാൻ ഡ്രൈവറെ അയച്ചിട്ടുണ്ട്…നീ ഇങ്ങ് വാ. നമുക്ക് പൊളിക്കണ്ടേ?”

“ആ അതൊന്നും പ്രശ്നം ഇല്ലെടാ… പിന്നെ നാളെ രാവിലെ അങ്ങ് വന്നേക്കണം കേട്ടോ…”

“എടാ… നീ എന്തിനാടാ അങ്ങോട്ട് പോണത്? നീ എന്റെ വീട്ടിലേക്ക് വാടാ. അങ്ങോട്ട് പോണ്ട. എല്ലാരും ഇവിടല്ലേ..പിന്നെന്തിനാ നീ അങ്ങോട്ട് പോണത്? പറയണ കേക്ക് നന്ദൂ…”

“ഇല്ലെടാ… എന്നെ തടയാൻ നോക്കണ്ട ദേവാ…എനിക്ക് പോയേ തീരൂ… എന്റെ അപ്പനപ്പൂപ്പന്മാർ ഉറങ്ങുന്ന മണ്ണാണ്. നീ എന്ത് പറഞ്ഞാലും ഞാൻ അങ്ങോട്ട് തന്നെയാണ് പോകുന്നത്… ഈ തീരുമാനത്തിൽ ഒരു മാറ്റവുമില്ല.”

“ശരി… ഇനി ഞാനായിട്ട് നിന്നെ തടയുന്നില്ല… അല്ലേലും പണ്ടേ നീ തീരുമാനങ്ങളിൽനിന്ന് പിന്നോട്ടില്ലല്ലോ…”

അങ്ങനെ ഫോൺ കട്ടായി.

ചമ്പ്രംകോട്ട് മന!… നന്ദന്റെ പൂർവികർ പണിത തറവാടാണ്…പാലക്കാടുള്ള ഒരു ഉൾനാടൻ ഗ്രാമത്തിൽ തീർത്തും ഒറ്റപ്പെട്ട് നിൽക്കുന്ന നൂറ്റാണ്ടുകളുടെ പഴക്കവും പാരമ്പര്യവും ഉള്ള ഒരു നാലുകെട്ട്. സൂര്യപ്രകാശം പോലും കയറാൻ മടിക്കുന്ന രീതിയിലുള്ള ഒരു കാടുപിടിച്ച പ്രദേശത്താണ് സ്ഥിതി ചെയ്യുന്നത്. മനയിൽ നടന്ന പല അരുംകൊലകളും ദുർമരണങ്ങളും മൂലം വർഷങ്ങളായി ആൾത്താമസമില്ലാതെ കിടക്കുന്ന ഒരു പഴയ മന. സ്വത്തിന് വേണ്ടി പരസ്പരം കൊന്നും ചത്തും ഒടുങ്ങിയ ഒരു പരമ്പരയുടെ അവസാന ബാക്കിവയ്പ്പ്. പട്ടാപ്പകൽ പോലും മനക്ക് ചുറ്റും ഒരു ഭീതിജനകമായ അന്തരീക്ഷമാണ്. ആ പരമ്പരയിലെ അവസാന കണ്ണിയായ നന്ദനാണ് ഇപ്പോൾ ഈ മനയുടെ ഏക അവകാശി.

സ്വതവേ ദൈവവിശ്വാസവും പേടിയുമൊന്നുമില്ലാത്ത നന്ദന് അവിടെ താമസിക്കുന്നതിൽ യാതൊരുവിധത്തിലുള്ള പേടിയോ ശങ്കയോ ഉണ്ടായിരുന്നില്ല. ഡ്രൈവർ നന്ദനെ മനയിൽ കൊണ്ടുചെന്നാക്കി ലഗേജ് ഒക്കെ എടുത്ത് വച്ചുകൊടുത്ത് പോയി. നന്ദൻ അവിടെ സ്വയം സെറ്റിൽ ആയി.

***