?ബാല്യകാലസഖി 3? [കുട്ടപ്പൻ] 1232

അപ്പുവിന്റെ കണ്ണൊക്കെ നിറഞ്ഞുവരുന്നുണ്ടായിരുന്നു. അറിഞ്ഞുകൊണ്ടല്ലെങ്കിലും അവളുടെ ഈ അവസ്ഥക്ക് അവനും കാരണമാണെന്ന് അവന് തോന്നി.

കുറച്ച് സമയം ഇത് തുടർന്നപ്പോൾ ദേവിക ഒന്ന് ഞരങ്ങി.

അവൻ അവളുടെ കാലിൽ തടവി ചൂട് പിടിപ്പിക്കാൻ ശ്രെമിച്ചുകൊണ്ടിരുന്നു.
അത് കണ്ട് ലക്ഷ്മിയും സരസ്വതിയും അതുപോലെ അവളുടെ കയ്യും കാലും ഒക്കെ ചൂട് പിടിപ്പിക്കാൻ നോക്കി.

നീണ്ട പരിശ്രമത്തിനോടുവിൽ ദേവിക കണ്ണ് തുറന്നു. സരസ്വതി അവളെ മാറോടണച്ച് പൊട്ടിക്കരഞ്ഞു. ലക്ഷ്മിയും കരയുകയായിരുന്നു. അപ്പുവിന്റെ കണ്ണും നിറഞ്ഞിരുന്നു.
ലക്ഷ്മിയമ്മ അവനെ ചേർത്ത് നിർത്തി.

അവന്റെ ശ്രദ്ധ മൊത്തം വാടിത്തളർന്ന് അവശയായ ദേവുവിന്റെ മുഖത്തായിരുന്നു.

അവൻ നോക്കുന്നത് കണ്ട് അവൾ ഒന്ന് ചിരിക്കാൻ ശ്രqമിച്ചു. എന്നാൽ അതിന് പോലും കഴിയാത്ത അത്ര അവശയായിരുന്നു അവൾ.

അവർ അവളുമായി നാലുകെട്ടിലേക്ക് നടന്നു. ഇപ്പോഴും എല്ലാരുടെയും മുഖത്ത് സങ്കടഭാവം തന്നെയായിരുന്നു.

” മ്മേ…. ക്ക്… ന്നും.. പ.. റ്റീല… ല്ലോ…
ന്തിനാ… സങ്കട.. പ്പെടുന്നേ.. ”

ദേവിക സരസ്വതിയോട് ചോദിച്ചു. അവളുടെ ശബ്ദം വളരെ നേർത്തതായിരുന്നു. പലവാക്കുകളും മുറിഞ്ഞു പോയി. അത്രക്കണ്ടു അവശയായിരുന്നു അവൾ.
അത് കണ്ട് വീണ്ടും ലക്ഷ്മിയമ്മയുടെയും സരസ്വതിയമ്മയുടെയും കണ്ണുകൾ നിറഞ്ഞു.

അപ്പുവിനും ആകെ സങ്കടമായി. അവൻ ആദ്യമേ ചെന്ന് നോക്കിയിരുന്നെങ്കി ഇങ്ങനെ ഒന്നും വരില്ലായിരുന്നു എന്നോർത്തു അവന്റെ കണ്ണുകളും നിറഞ്ഞു.

ക്ഷീണം കാരണം ദേവിക സരസ്വതിയുടെ മടിയിൽ കിടന്ന് ഉറങ്ങിപ്പോയി. അവളുടെ മുടിയിൽ തലോടി കണ്ണീർ പൊഴിച്ചു കൊണ്ട് അവരും അവളുടെ അടുത്ത് നിന്ന് മാറാൻ കൂട്ടാക്കിയില്ല.

കുറച്ച് കഴിഞ്ഞപ്പോ ശ്രീനിവാസനും ബാലകൃഷ്ണനും വന്നു. വിവരം ഒക്കെ അറിഞ്ഞപ്പോ അവർ ദേവികയേയും കൂട്ടി അടുത്തുള്ള ഗവണ്മെന്റ് ആശുപത്രിയിൽ പോയി.

നല്ല ക്ഷീണം ഉണ്ടായിരുന്നത് കൊണ്ട് അവൾക്ക് ഗ്ലൂക്കോസ് കയറ്റേണ്ടി വന്നു. അവൾ ക്ഷീണം കാരണം ഉറങ്ങിപ്പോയി.
കുറച്ച് നേരം കഴിഞ്ഞ് ശ്രീനിവാസൻ വിളിക്കുമ്പോഴാണ് അവൾ ഉറക്കമുണർന്നത്. അപ്പോഴേക്കും ഡ്രിപ് ചെയ്യുന്ന ഗ്ലൂക്കോസ് തീരാറായിരുന്നു.

അവൾക്ക് നല്ല ഭേദം തോന്നി. ക്ഷീണം ഒക്കെ കുറഞ്ഞത് പോലെ. ഡോക്ടർ വന്നു കുഴപ്പം ഒന്നും ഇല്ല എന്ന് പറഞ്ഞ് പോയി കുറച്ച് നേരം കൂടി അവർ ആശുപത്രിയിൽ ചിലവഴിച്ചു. പിന്നെ നേരെ വീട്ടിലേക്ക്.

അവരുടെ വരവും കാത്ത് സരസ്വതിയും ലക്ഷ്മിയും അപ്പുവും ഉമ്മറത്തു തന്നെ ഉണ്ടായിരുന്നു. ക്ഷീണം ഒക്കെ മാറി എന്ന് കണ്ടപ്പോ സരസ്വതിക്ക് ആശ്വാസമായി.

……………………

അപ്പു രാവിലെ തന്നെ കുളിച്ചൊരുങ്ങി സ്കൂളിൽ പോകാൻ തയ്യാറായി.
ബാലകൃഷ്ണനും ശ്രീനിവാസനും നേരത്തേ പോയിരുന്നു.