അറിയപ്പെടാത്ത മാവേലിമാർ [അർജ്ജുൻ ദേവ്] 181

“””അന്നഷ്ടിയ്ക്കു വകയില്ലാതെ പട്ടിണി കിടന്നെല്ലാം തീരോന്നു തോന്നിയപ്പോൾ എനിക്ക് തോന്നിയ വാശി… അതൊന്നിന്റെ ബലത്തിലായിപ്പോളെന്റെ മുന്നിൽ നിന്നീ വീരവാദമ്മുഴുമ്പറയുന്നേ…!! പക്ഷേയൊന്നോർത്തോ… ആ വാശി… അതുണ്ടല്ലോ…  അതിപ്പോഴുമെങ്ങുമ്പോയിട്ടില്ല…!!ഞാഞ്ചീവിയ്ക്കും…. ഇവക്കൊപ്പം… ഈ നാട്ടിൽ….  നിങ്ങടെയൊക്കെ മുന്നിൽ…  നോക്കിയ്‌ക്കോ….!!”””

അപ്പോഴുണ്ടായ ദേഷ്യത്തിൽ അവരോട് വെല്ലുവിളിയുമുയർത്തി അവളുടെ കൈയും പിടിച്ചിറങ്ങുമ്പോൾ പക്കലാകെയുണ്ടായിരുന്നത് രണ്ടായിരത്തിന്റെ ഒരൊറ്റ നോട്ടും പാസ്‌പോർട്ടും മാത്രം……!!

എല്ലാം നഷ്ടമായെന്നു തോന്നിയെങ്കിലും എന്തൊക്കെയോ നേടണമെന്ന ചിന്തയുള്ളിൽ തീക്കനൽ വിതറിയതിനാലാവണം തിരികെയവൾക്കൊപ്പം അവളുടെ വീട്ടിലെത്തുമ്പോഴും ആ പുഞ്ചിരിയെന്നോടൊപ്പ -മുണ്ടായിരുന്നത്…….!!

“””എന്താ തന്റെ പേര്…??”””

ആ കയറു കട്ടിലിലെനിയ്ക്കു കിടക്കാനവസരമൊരുക്കി നിലത്ത് പഴംപായ വിരിച്ച അവളോട്‌ ഞാൻ ചോദിച്ചു……

“””ദേവു…!!”””

വല്ലാത്തൊരു സംശയഭാവത്തോടെ എന്നെത്തന്നെ നോക്കിയ ശേഷമവൾ മറുപടി തന്നു…

സകലവും കണ്മുന്നിൽ നഷ്ടപ്പെട്ട് കൊട്ടാരത്തിൽ നിന്നും കുടിലിലേയ്ക്കു മാറ്റപ്പെട്ടിട്ടും ഇയാളെന്തായിങ്ങനെ യെന്നായിരിയ്ക്കണം അപ്പോളവളുടെ മനസ്സിൽ….!!

“””തനിക്കിപ്പോഴും വെശക്കുന്നുണ്ടോ…??”””

“””ങ്…ഹൂം…!!”””

നട്ടപ്പാതിരായ്ക്ക് വിശക്കുന്നെന്നു പറഞ്ഞിട്ടും കാര്യമില്ലെന്നുള്ള ബോധ്യത്താലാവൾ  മറുപടിയില്ലായെന്ന മൂളി…..!!

പിറ്റേദിവസം തന്നെ കൈയിലിരുന്ന പണത്തിന് അത്യാവശ്യം വേണ്ട അരിയും സാധനങ്ങളും വീട്ടിലേയ്ക്കടുപ്പിച്ചപ്പോൾ കൈയിൽ കരുതിയിരുന്ന ആകെത്തുകയും കഴിഞ്ഞു… മുപ്പതുരൂപ ശേഷിയ്ക്കേ…..!!

അടുത്ത ദിവസം മുതൽ നാട്ടിലിറങ്ങി ജോലി തെണ്ടലാരംഭിച്ചെങ്കിലും ഓണം പ്രമാണിച്ചെങ്ങും ജോലിയ്‌ക്കൊരൊഴിവുമില്ല… ചിലവ് കുറയ്ക്കാനാണോ അതോ ബോണസ് കൊടുക്കണമെന്നു കരുതിയിട്ടോ പലരും കൈമലർത്തിയപ്പോൾ ചിലരുടെയെങ്കിലും മുഖത്തൊരു പരിഹാസച്ചിരിയുതിർന്നിരുന്നു….!!
കൂട്ടത്തിൽ കെട്ട്യോൻ മരിച്ച സ്ത്രീയുടെ കൂടെ താമസിക്കുമ്പോൾ ഉണ്ടാവുന്ന നാട്ടുകാരുടെ മുറുമുറുപ്പും…….!!

ഇതിനിടയിൽ കൂടെജോലിചെയ്തു പോന്ന പലചങ്ങാതിമാരെയും വിളിച്ചു നോക്കി….  ഓണമായതിനാൽ ഉളളതെല്ലാം തപ്പിപ്പെറുക്കി വീട്ടിലേയ്ക്കയച്ചു പോയെന്നും വേണമെങ്കിൽ വിളിച്ചു പറഞ്ഞേക്കാം നീ പോയി വാങ്ങിക്കോളാൻ പറഞ്ഞപ്പോൾ ഞാനതിനെ സന്തോഷപൂർവ്വം തിരസ്കരിച്ചു… അവിടെവരെയെത്താനുള്ള വണ്ടിക്കൂലി കൈയിലില്ലാതെ സ്വീകരിച്ചിട്ടെന്തിനാ….??

അവസാനത്തെ ഉദ്യമമെന്നോണം കമ്പനിയിലെന്നോടേറ്റവും കൂറുകാണിച്ചിട്ടുള്ള ബോസുമായി ബന്ധപ്പെട്ടു…. അദ്ദേഹം സാലറിഅഡ്വാൻസയച്ചു തരാം പക്ഷേ സാധാരണ ശമ്പളമയയ്ക്കുന്ന ബാങ്ക് അക്കൗണ്ടിലേയ്ക്കേ ക്രെഡിറ്റ്‌ ചെയ്യാൻ നിർവാഹമുള്ളൂ എന്നു പറഞ്ഞതോടെ ആ വഴിയുമടയുകയായിരുന്നു…..!! കാരണം കമ്പനിയിൽ നിന്നും പണമൊഴുകിക്കൊണ്ടിരുന്നത് മുഴുവൻ അച്ഛന്റെ അക്കൗണ്ടിലേയ്ക്കായിരുന്നു…..!!