അറിയപ്പെടാത്ത മാവേലിമാർ [അർജ്ജുൻ ദേവ്] 181

ആ ചെക്ക്ലീഫുമായി നിറഞ്ഞ കണ്ണുകളോടെ അവിടുന്നിറങ്ങുമ്പോഴും അയാളൊന്നുകൂടി പറഞ്ഞു… പോകാനുള്ളത് മാത്രമെടുക്കാതെ ഓണമുണ്ണാനുള്ളത് കൂടി എഴുതിയെടുക്കണമെന്ന്… ആദ്യത്തെ ഓണം അയാളുടെ വകയാകട്ടെയെന്ന്….!!

പുറത്തേക്കിറങ്ങിയപ്പോഴാണ് അയാളെയും ഓണമുണ്ണാൻ വിളിച്ചാലോയെന്ന് തോന്നലുണ്ടായത്…. തിരിച്ചു ചെല്ലുന്നത് കണ്ടതേ എന്റെ മനസ്സു വായിച്ചിട്ടെന്നപോലെ അയാളുടെ  മറുപടി വന്നിരുന്നു…..

“””ഓണമുണ്ണാൻ വീട്ടിലേക്ക് ഞാൻ വരില്ലെടോ… ബ്ലെയ്ഡ്തമ്പി വീട്ടിൽക്കേറിയിറങ്ങിയാൽ അതിനും നാട്ടുകാര് പലതും  പറഞ്ഞുണ്ടാക്കും…. ഇവളെയെനിക്ക് കൂട്ടിത്തന്നിട്ടാ താൻ ഗൾഫിന് പോയതെന്ന് വരെ…. എന്തിനാടോ വെറുതേ….??”””

അത് പറയുമ്പോൾ അയാളുടെ മുഖത്തും കണ്ണിലും നിറഞ്ഞത് സങ്കടമാണോ പരിഹാസമാണോ നിരാശയാണോ എന്നെനിക്കറിയില്ല….. ഒന്നും മിണ്ടാതെ അവിടുന്നിറങ്ങി പോരുമ്പോഴും അപ്പോഴങ്ങോട്ടു കയറിച്ചെന്ന് ശമ്പളം അഡ്വാൻസ് ചോദിച്ച ജോലിക്കാരനോട് അയാളുച്ചത്തിൽ ദേഷ്യപ്പെടുന്നുണ്ടായിരുന്നു…..

“””പതിനായിരം രൂപാ ശമ്പളം ഞാൻ തനിക്ക് തരുന്നില്ലേ സുധാകരാ… പിന്നെന്തോന്നിനാ അഡ്വാൻസ്‌…?? അടുത്ത ശമ്പളമല്ലാതെ അതിന് മുമ്പ് നയാ പൈസാ ഞാൻ നിനക്ക് തരില്ല… അല്ലെങ്കിൽ പലിശ തരേണ്ടി വരും… നൂറ്റിക്ക് പതിനഞ്ച് വെച്ച്… എന്താ വേണോ….??”””

തെറിവിളിച്ചുകൊണ്ടെന്നപോലെ തന്നെത്താൻ പിറുപിറുത്തുകൊണ്ട് ഞങ്ങളുടെ മുന്നിലൂടെ വേഗത്തിൽ കടന്നുപോകുന്ന ആ ജോലിക്കാരനെ നോക്കിയിട്ട് ഞാൻ തിരിഞ്ഞാ മനുഷ്യന്റെ മുഖത്തേക്കൊന്നുകൂടി നോക്കി…
അപ്പോഴും ആരെയും ശ്രദ്ധിക്കാതെ അന്ന് പലിശ വാങ്ങാൻ പോകേണ്ട കടക്കാരുടെ എണ്ണമെടുക്കുന്ന ധൃതിയിലായിരുന്നയാൾ…….!!

അവിടെ നിന്നിറങ്ങുമ്പോൾ എനിക്കൊരു കാര്യം മനസ്സിലായി… ഈരേഴു പതിനാലുലോകവുമളന്നിട്ടും അളവ്തീരാത്ത വാമനന് മുന്നിൽ തലകുമ്പിട്ടു കൊടുത്തതുപോലുള്ള മാവേലിമാരോ, തന്നെക്കാണാനെത്തിയ കുചേലന്റെ മനസ്സറിഞ്ഞ് സൗഭാഗ്യമേകിയ ഭഗവാൻ കൃഷ്ണനോ പോലുള്ള മഹാത്മാക്കളൊന്നും നമുക്കിടയിലുണ്ടാവില്ലായിരിക്കാം…പക്ഷേ ആരുടെ മുന്നിലും തലകുനിക്കാത്ത…, ആർക്കും പരസ്യമായിട്ടൊന്നും ചെയ്തു കൊടുക്കാത്ത, പതിനാലു ലോകവും സമ്പൽ സമൃദ്ധിയുമൊന്നും കൊടുക്കുന്നില്ലെങ്കിലും… വിശപ്പിന്റെ വിലയറിയുന്ന… ഇടംകൈയ്യറിയാതെ വലംകൈകൊണ്ട് ദാനം ചെയ്യാനിഷ്ടപ്പെടുന്ന… ആരാരുമറിയാതെ പോകുന്ന ചില മഹാബലിമാരും കൃഷ്ണമാരുമെല്ലാം നമുക്കിടയിലുമുണ്ട്….!! അവരെയാരെയും കണ്ടെത്താൻ നമുക്ക് കഴിയാതെ പോകുന്നുവെന്നു മാത്രം….!!

-ഏവർക്കും ഹൃദയം നിറഞ്ഞ ഓണാശംസകൾ….!!