അറിയപ്പെടാത്ത മാവേലിമാർ [അർജ്ജുൻ ദേവ്] 181

“””ഒരു പട്ടി കൊരച്ചാലും നൂറുപട്ടി കൊരച്ചാലും അതെന്റെ തീറ്റ തിന്നിട്ടാണെന്നു കരുതുമ്പോ എനിക്കത് വല്ലാത്ത സുഖവാടോ….!! അതുകൊണ്ടുതന്നെ ഇനീം ഞാനാ തീറ്റ കൊടുക്കും… എന്നെ നോക്കിക്കൊരക്കുന്ന സർവ പട്ടികൾടേം വീടിന്റെ അടിത്തറവരെ ഞാനിളക്കുവേം ചെയ്യും… അതാ തമ്പീടെ ന്യായം….!! ഒരു പിച്ചക്കാരനും അഞ്ചുപൈസാ ഞാനിന്നേവരെ കൊടുത്തിട്ടില്ല… ഇനിയൊട്ടു കൊടുക്കേമില്ല…. പക്ഷേ തനിക്ക് തരും… എന്താന്നുവെച്ചാൽ… അധ്വാനിക്കുന്നെന്റെ വെലയറിയാവുന്നോനാ നീ… വല്ലോന്റേം മുമ്പില് കൈനീട്ടി നിക്കുന്നോനേക്കാൾ അന്തസുണ്ടടോ അഷ്ടിക്ക് വകയില്ലേലും അധ്വാനിച്ചു ജീവിക്കുന്നൊന്…!! എനിക്ക് നിന്നെ ബോധിച്ചതെപ്പോഴാന്നറിയോ… നാട്ടുകാര് മൊത്തം വേശ്യയെന്നും പിഴച്ചവളെന്നുമൊക്കെവിളിച്ച് മാറ്റി നിർത്തിയിരുന്ന ഇവളെ വിളിച്ചോണ്ടു പോകാനുള്ള മനസ്സ് നിനക്കുണ്ടായില്ലേ… വീട്ടീന്നാട്ടിയിറക്കിയിട്ടും ഈ പെണ്ണിനെ നോക്കാനുള്ള മനസ്സു നീ കാണിച്ചില്ലേ… അവള്ടെ മാനത്തിന് വെല പറയാതെ നോക്കിയില്ലേ നീ… തന്തക്ക് പെറന്നോനാ നീ… അങ്ങനെയുള്ളോരെ വല്ലാത്തയിഷ്ടവാ തമ്പിക്ക്….!! കാരണമെന്റപ്പന് ഇല്ലാതെ പോയ ഒന്നാ നീ കാണിച്ചേ…. സ്വത്തിനു വേണ്ടി ഗർഭിണിയായ എന്റമ്മയെ തള്ളി പറഞ്ഞ എന്റപ്പനോടുള്ള വാശികാരണമാ ഞാനീ നിലയിലെത്തിയെ…. ആ വാശിയിപ്പോ ഞാൻ നിന്നിലും കാണുന്നുണ്ട്….  അതുകൊണ്ട്  നിനക്കാവശ്യവൊള്ള കാശ് നീ എഴുതിയെടുത്തോ…  നീ തിരിച്ചു വന്നിട്ട് തന്നാ മതി….!!”””

അയാളൊരു പുഞ്ചിരിയോടെ പറഞ്ഞതു കേട്ട് സ്വപ്‌നമാണോ മുന്നിൽ നടക്കുന്നതെന്നു പോലും മനസ്സിലാകാതെ നിന്നയെന്റെ തോളിലയാൾ കൈയമർത്തി…..

“””പിന്നൊരു കാര്യം….. ഇതിന്റെ  പലിശ… അതിന് താനിവൾക്കൊരു താലി വാങ്ങിച്ചു കെട്ടിക്കൊടുക്കണം…. കാരണം ഇവളെക്കാൾ വലിയ സ്വത്തൊന്നും തനിയ്ക്കീ ജന്മത്ത് കിട്ടാമ്പോണില്ലെടോ….!! നീയിവളെ വീട്ടിലേയ്ക്കു കൂട്ടിക്കൊണ്ടോയതും നിന്നെ വീട്ടുകാരാട്ടിയിറക്കിയതും നീയിവളെ പോറ്റാമ്മേണ്ടി നെട്ടോട്ടമോടിയതുമൊക്കെ എന്റെ മുന്നിലേങ്ങലടിച്ചു കൊണ്ടെണ്ണി പെറുക്കി പറയുമ്പോൾ ഞാൻ കണ്ടതാടോ ഇവൾക്കു നിന്നോടുള്ള സ്നേഹം….!! ഒരു കൊള്ളപ്പലിശക്കാരനായ എന്റെ മനസ്സുപോലും മാറ്റാമ്പോന്ന സ്നേഹമിവൾക്കു നിന്നോടുള്ളതു കണ്ടിട്ടാ പണം തരാമെന്ന് ഞാനുറപ്പിച്ചേ…. ഇവൾക്കു വേണ്ടി രാപ്പകലില്ലാതെ കഷ്ടപ്പെടുന്ന തന്നെ സഹായിയ്ക്കാൻ മടിക്കുത്തഴിയ്ക്കാൻ തയ്യാറായ പെണ്ണിന്റെ മനസ്സു കാണാൻ കഴിയാത്ത നാറിയല്ല തമ്പി…..!!”””

പറഞ്ഞു നിർത്തി ചെറുചിരിയോടെ അയാളാ ബ്ലാങ്ക്ചെക്ക്ലീഫ് എടുത്തുനീട്ടിയപ്പോളും അയാളത്തെന്നെ തുറിച്ചു നോക്കി നിൽക്കുകയായിരുന്നു ഞാൻ…. എന്റെ അമ്പരപ്പ് കണ്ടിട്ടാവും അയാളാ ചെക്ക്ലീഫ് അവളുടെ നേരെ നീട്ടി…. അവളും വാങ്ങാതായപ്പോൾ ബലമായി അവളുടെ കയ്യിലേക്ക് അയാളത് വെച്ചുകൊടുത്തു……!!

“””ഇന്നലെയിവള് വന്നപ്പോത്തന്നെ ഇത് കൊടുത്തുവിടണമെന്ന് ഞാൻ കരുതിയതാ…. പക്ഷേ അത് ഞാൻ കൊടുത്തുവിട്ടാൽ എന്നെലുമൊരിക്കൽ തനിക്കും തോന്നും ഇവളിത് തുണിയഴിച്ചു മേടിച്ചുതന്നതാനെന്ന്…. ഇവളൊരു പെഴയാണെന്ന്….!!അതുകൊണ്ടാണ് പണം വേണോങ്കിൽ തന്നെയും കൂട്ടി വരാമ്പറഞ്ഞത്….!!”””

അയാളൊന്നു നിർത്തിയപ്പോൾ ഞാനവളെ എന്നിലേയ്ക്കു വലിച്ചടുപ്പിച്ചു….  അപ്പോഴും നിറഞ്ഞു തൂവിയ കണ്ണുകളോടെ എന്നെ നോക്കി നിന്ന ദേവുവിനെ ചൂണ്ടിക്കൊണ്ട് അയാൾ പറഞ്ഞു….

“””സ്നേഹിയ്‌ക്കുന്നവന്റെ മനസ്സു കാണാമ്പറ്റുന്ന ഇവളുണ്ടല്ലോ… ഇവളൊരു മാണിക്യമാടോ… ഓരോ ദിവസം ചെല്ലുന്തോറും മൂല്യമേറുന്ന മാണിക്യം….!! ഇവളെയൊന്നും താനൊരിക്കലും നഷ്ടപ്പെടുത്താൻ പാടില്ല…!!”””