ഫ്ളൈറ്റിന്റെ ജാലകത്തിലൂടെ നിറയെ പച്ചപ്പ് കണ്ടപ്പോൾ അറിയാതെ കണ്ണുകൾ നിറഞ്ഞു… ആറുവർഷം കഴിയുന്നു ജനിച്ച നാട് കണ്ടിട്ട്..!!
അന്ന് അച്ഛന് സുഖമില്ലാതെയായതോടെ ജീവിതമിനിയെങ്ങനെ മുന്നോട്ടു കൊണ്ടു പോകണമെന്നറിയാത്ത അവസ്ഥയിൽ നിൽക്കുമ്പോഴാണ് വിദേശത്ത് വലിയൊരു കമ്പനിയിൽ ജോലിയ്ക്ക് ആളെയാവശ്യമുണ്ടെന്നും പ്ലസ് ടു യോഗ്യത മതിയെന്നുമുള്ള വിവരം ഒരു കൂട്ടുകാരൻ പറഞ്ഞതറിയുന്നത്…!! അവന്റെ അമ്മാവൻ അവനായി ഒരുക്കിക്കൊടുത്ത ഓഫർ, ജീവിതത്തിന്റെ ബാധ്യതയെന്തെന്നറിയാതെ അവൻ തട്ടിമാറ്റിയപ്പോൾ ഒന്നപേക്ഷിച്ചു നോക്കി…. വലിയ പ്രതീക്ഷയൊന്നുമില്ലാഞ്ഞിട്ടും വീട്ടിലെ അവസ്ഥയാലോചിച്ചപ്പോൾ,  മൂത്തമകന്റെ കർത്തവ്യങ്ങൾ തലയ്ക്ക് മുകളിൽ നിന്നും കൊഞ്ഞനം കുത്തിയപ്പോൾ അവനോടു വാവിട്ടു ചോദിച്ചുപോയി എന്നു പറയുന്നതാവും കൂടുതൽ ശെരി…….!!ആരുടെയെങ്കിലും മേൽ ആ ജോലിയെ വെച്ചൊഴിയാൻ കാത്തിരുന്ന അവൻ പൂർണ്ണ സമ്മതമറിയിച്ചതോടെ ആകെയുണ്ടായിരുന്ന വീടിന്റെ പ്രമാണവും ബാങ്കിൽ പണയം വെച്ച് നാടുകടക്കുകയായിരുന്നു… ജീവിതത്തിലെന്തെങ്കിലുമൊക്കെ നേടണമെന്നാഗ്രഹമുള്ളവന് വാശികൂടി വന്നാൽ എന്താണ് സംഭവിയ്ക്കുകയെന്നത് തെളിഞ്ഞ നാളുകളായിരുന്നു പിന്നീട്……..!!

പണയം വെച്ച വീടിന്റെ പ്രമാണം തിരിച്ചെടുത്തതിനൊപ്പം പണിയിച്ചു ഒരിരുനില വീട്… അതിനൊപ്പം പ്രൌഡിയ്ക്കൊരു കുറവുമുണ്ടാകാതിരിയ്ക്കാൻ മുറ്റത്തൊരു കാറ്… പോയി നാലുവർഷം കഴിയുന്നതിനുള്ളിൽ അവർ ചോദിച്ച സ്ത്രീധനം കൊടുത്ത് അനിയത്തിയുടെ കല്യാണവും നടത്തി,  അനിയൻ സ്നേഹിച്ച വലിയ വീട്ടിലെ പെണ്ണിനെ നേടിക്കൊടുക്കാനും സാധിച്ചു………!!

അന്നെന്നെ നോക്കി കൊഞ്ഞനം കുത്തിയ ബാധ്യതകൾക്കു നേരേയൊരു പുച്ഛച്ചിരിയും ചിരിച്ചു കൊണ്ട് നെടുമ്പാശ്ശേരി എയർപോർട്ടിലെ അറൈവൽ സൈഡിലേയ്ക്ക് നടന്നടുക്കുമ്പോൾ എന്നെയും കാത്തുനിന്ന ബന്ധുജനങ്ങളെ കണ്ട് മനസ്സുകുളിർന്നു…  അവരപ്പോളെന്നോടു കാണിച്ച സ്നേഹത്തിനു മുന്നിൽ ഇത്രയും കാലം അവരെ പിരിഞ്ഞു ചെയ്ത കഷ്ടപ്പാടുകളൊന്നും മനസ്സിൽ വന്നതേയില്ല…. എല്ലാവർക്കുമൊരുമിച്ചുള്ള ഓരോണം… അതായിരുന്നു വർഷങ്ങളായുള്ള സ്വപ്‌നം…!! അതു സാക്ഷാത്കരിയ്ക്കാൻ കൂട്ടുനിന്ന ദൈവത്തിനും നന്ദി പറഞ്ഞു കൊണ്ട് ഞാനവർക്കൊപ്പം വീട്ടിലേയ്ക്ക് തിരിച്ചു……..!!

അത്രയും നാൾ കുടുംബത്തെ വിട്ട് അന്യനാട്ടിൽ കിടന്നു കഷ്ടപ്പെട്ടതിന്റെ കൂലിയെന്നോണം അവരെന്നെ കൈവെള്ളയിൽ കൊണ്ടു നടന്ന നാളുകൾ…
വീട്ടിനുള്ളിലൊരു മൊട്ടുസൂചിയനങ്ങണമെങ്കിൽ ഹരി പറയണമെന്ന അവസ്ഥ…..!!

“””ഹരിക്കുട്ടാ… നമ്മടെയെല്ലാ ബാധ്യതേങ്കഴിഞ്ഞു…!! ഇനിയിപ്പോ നിനക്കുമ്മേണ്ടേയൊരു കുടുംബം…??”””

രാത്രിയിലെ അത്താഴത്തിനടയിൽ അച്ഛൻ കല്യാണക്കാര്യമെടുത്തിട്ടതും ഒരു പുഞ്ചിരിയോടെ ഞാൻ കൈകുടഞ്ഞെഴുന്നേറ്റു…….!!

“””മോനേ…!! അച്ഛഞ്ചോയിച്ചേനൊന്നും നീ പറഞ്ഞില്ല…!!”””