അനാമികയുടെ കഥ 7 [പ്രൊഫസർ ബ്രോ] 325

‘അവൾക്ക് ഇഷ്ടമാകുമോ, ശേ… അവളോട് ചോദിച്ചിട്ട് ഏട്ടനോടും അമ്മയോടും ഒക്കെ പറഞ്ഞാൽ മതിയായിരുന്നു ,ഇനീപ്പോ അച്ചൂന് ഇഷ്ടമായില്ലെങ്കിൽ ഞാൻ ഇതെങ്ങനെ അവരോട് പറയും…ഓഹ്‌ സമാധാനം പോയല്ലോ ദൈവമെ…ഞാൻ കാരണം എപ്പോഴും എല്ലാവർക്കും വിഷമം ആണല്ലോ, ഞാൻ എന്താ ഇങ്ങനെ…ശേ…’

അനു അവളുടെ കട്ടിലിൽ കിടന്നുകൊണ്ട് തന്നത്താൻ ശപിച്ചു.,സമയം നീങ്ങിക്കൊണ്ടിരുന്നതല്ലാതെ ഉറക്കം മാത്രം അവളെ അനുഗ്രഹിച്ചില്ല.

തിരിഞ്ഞും മറിഞ്ഞും കിടന്ന അവളെ ഉണർത്താൻ ഫോണിന്റെ വൈബ്രേഷൻ മാത്രം മതിയായിരുന്നു,

ഡിസ്‌പ്ലേയിൽ അച്ചുവിന്റെ മെസ്സേജിന്റെ നോട്ടിഫിക്കേഷൻ കണ്ടപ്പോൾ അവളുടെ ഹൃദയം ക്രമാധീതമായി മിടിക്കുവാൻ തുടങ്ങി,വിറയ്ക്കുന്ന കൈകളോടെ ആണ് അവൾ ആ മെസ്സേജ് തുറന്ന് വായിച്ചത്

“‘അനൂ…നീ പറഞ്ഞുള്ള അറിവ് മാത്രമേ നിന്റെ ഏട്ടനെക്കുറിച്ച് എനിക്കുള്ളൂ. നീ പറഞ്ഞതിൽ നിന്നും ആൾ പാവമാണ് എന്ന് തോന്നുന്നു, പക്ഷെ നേരിൽ പരിചയമുള്ള ആളുകൾ പോലും ചതിക്കുന്ന ഈ കാലത്ത് ഒരാളെ കാണാതെ എങ്ങനെയാ…എനിക്ക് ഇഷ്ടക്കുറവ് ഒന്നും ഇല്ല.നമുക്ക് നോക്കാന്നെ സമയം ഉണ്ടല്ലോ “‘

സങ്കടത്തോടെ വായിച്ചു തുടങ്ങിയ ആ മെസ്സേജ് അവസാനിച്ചപ്പോൾ അനാമികയുടെ ചുണ്ടിൽ ഒരു പുഞ്ചിരി ഉണ്ടായിരുന്നു .അവൾ സന്തോഷത്തോടെ ഫോൺ കട്ടിലിന്റെ ഒരു വശത്തേക്ക് ഇട്ടിട്ട് തലയിണ കെട്ടിപ്പിടിച്ചു കിടന്നു. തനിക്കരികിലേക്ക് വരാൻ മടിച്ച ഉറക്കത്തെ അവൾ തന്നിലേക്ക് വലിച്ചടുപ്പിച്ചു

സുഖകരമായ പുലർകാല സ്വപ്നവും കണ്ടുകൊണ്ടാണ് അനാമിക പുതിയ ദിവസത്തെ വരവേറ്റത്, എഴുന്നേറ്റ ഉടനെ അവൾ അടുക്കളയിലേക്ക് ഓടി

പാത്രം കഴുകിക്കൊണ്ടിരുന്ന സീതയെ സീതയെ അവൾ പിന്നിൽ നിന്നും കെട്ടിപ്പിടിച്ചു, പെട്ടന്നുണ്ടായ ഞെട്ടലിൽ സീതയുടെ കയ്യിൽ നിന്നും കഴിക്കൊണ്ടിരുന്ന സ്റ്റീൽ പാത്രം താഴെ വീണു. താഴെ വീണ പാത്രത്തിന്റെ ഒച്ചയോടൊപ്പം സീതയുടെ ശബ്ദവും അവിടെ മുഴങ്ങി

“അനൂ…നീ മേടിക്കും കേട്ടോ പെണ്ണെ…കണ്ടോ എന്റെ പാത്രം ചളുങ്ങി”

“പിന്നെ… ഒരു പാത്രം…”

അവൾ സീതയെ തന്നിലേക്ക് തിരിച്ചു നിർത്തി ആ കവിളിൽ ചുണ്ടുകൾ അമർത്തി, അത്രയും സമയം ദേഷ്യപ്പെട്ടുകൊണ്ടിരുന്ന സീത ഒരു നിമിഷം കൊണ്ട് ശാന്തയായി

“എന്താണ് രാവിലെ വല്യ സന്തോഷത്തിൽ ആണല്ലോ…ഓഹ്‌ .,, വാ നാറുന്നു പെണ്ണേ…നിനക്കൊന്നു വായെങ്കിലും കഴുകിക്കൂടെ…”

അനാമിക സീതയിൽ നിന്നും അകന്ന് അവരുടെ മുഖത്തേക്ക് ഒരു കപട ദേഷ്യത്തോടെ നോക്കി, പിന്നെ ചുണ്ട് കൂട്ടിക്കൊണ്ട് സിങ്കിന്റെ അരികിലേക്ക് തിരിഞ്ഞു

“സിങ്കിൽ തുപ്പിയാൽ നീ വാങ്ങും. അകത്തു വാഷ് ബേസിൻ ഉണ്ടല്ലോ,അവിടെ പോയി കഴുകിയാൽ മതി”

“ഓ…പിന്നെ ഇനി അവിടെ വരെ നടക്കാൻ ഒന്നും വയ്യ..,ഇനി ചായ കൊണ്ട് വാ കഴുകാം”

അവൾ അടുക്കള സ്ലാബിൽ ഇരുന്ന ചായ എടുത്ത് ഒരു കവിൾ ഇറക്കി

“അതെന്റെ ചായയാ…”

“അമ്മ വേണേൽ വേറെ ചായ ഇട്ട് കുടിച്ചോ…”

“ഓഹ്‌…ഇങ്ങനെ ഒരു പെണ്ണ്… അല്ല എന്താ ഇന്നത്തെ സന്തോഷത്തിന്റെ കാര്യം എന്ന് പറഞ്ഞില്ലാല്ലോ, അച്ചു സമ്മതിച്ചോ”

“സന്തോഷത്തിന് രണ്ട് കാരണങ്ങൾ ആണ് , ഒന്ന് അച്ചു പാതി സമ്മതം മൂളി അവൾക്ക് ഏട്ടനെ കാണണം എന്ന് പറഞ്ഞു. രണ്ടാമത്തെ കാര്യം ഇപ്പൊ കാലത്ത് കണ്ട സ്വപ്നമാണ്”

“അതെന്താണ് അത്ര സന്തോഷം തരുന്ന സ്വപ്നം”

“ഏട്ടന്റെയും അച്ചുവിന്റെയും കല്യാണം, നല്ല സ്വപ്നം ആയിരുന്നു പക്ഷെ ആ സ്വപ്നത്തിൽ എന്നെ മാത്രം കണ്ടില്ല അതെന്താണാവോ…”

“നീ സ്വപ്നം കാണുകയായിരുന്നില്ലേ അതാവും”

“ഓഹ്‌…എന്റെ സീതക്കുട്ടിയുടെ ഒരു തമാശ”

അവൾ സീതയുടെ കവിളിൽ പിടിച്ച് പതിയെ പിച്ചി വലിച്ചു

“ദേ പെണ്ണെ …എനിക്ക് വേദനിച്ചൂട്ടോ, രാവിലെ എന്റെ കയ്യിൽ നിന്നും വാങ്ങാൻ നിൽക്കരുത്”