അനാമികയുടെ കഥ 7 [പ്രൊഫസർ ബ്രോ] 325

“ഈ വിറകടുപ്പൊക്കെ മാറ്റി ഗ്യാസ് സ്റ്റോവ് വാങ്ങിക്കൂടെ അമ്മായി ഇങ്ങനെ കിടന്ന് ഊതണോ…”

പിന്നിൽ നിന്നും അനാമികയുടെ ശബ്ദം കെട്ടാൻ അടുപ്പിൽ തീ ഊതിക്കൊണ്ടിരുന്ന മിനി പിന്നിലേക്ക് തല ഉയർത്തി നോക്കുന്നത്

“നിന്റെ അമ്മാവൻ സമ്മതിക്കണ്ടേ ഗ്യാസ് ഭയങ്കര അപകടം ആണെന്നാ അങ്ങേരുടെ വാദം”

“അങ്ങനെ ഒക്കെ നോക്കിയാൽ ജീവിക്കാൻ പറ്റുമോ അമ്മായി…”

“ആ,ആരോട് പറയാൻ…അല്ല എന്താണ് പതിവില്ലാതെ ഈ വഴിക്ക്., അപ്പൊ ഞാനും അവരുടെ കൂടെ കൂടിയില്ല എന്നെ ഉള്ളു നീ ഇങ്ങോട്ടൊന്നും വരാത്തതിൽ എനിക്കും വിഷമം ഉണ്ട്”

“സോറി അമ്മായി.ആശുപത്രിയിൽ നിന്ന് വന്നതിന് ശേഷം അധികം പുറത്തേക്ക് ഒന്നും പോകണ്ട എന്ന് ഏട്ടന്റെ കർശന നിർദ്ദേശം ഉണ്ടായിരുന്നു”

ഗൗതമിനെ കുറിച്ച് അവർ അറിഞ്ഞ സ്ഥിതിക്ക് അവരിൽ നിന്നും അവനെക്കുറിച്ചുള്ള അഭിപ്രായം അറിയാൻ തന്നെയാണ് അനാമിക അപ്പൊ അവന്റെ കാര്യം പറഞ്ഞത്

“ഹ്മ്മ്”

അനാമികക്കുള്ള മറുപടി അവർ ഒരു മൂളലിൽ ഒതുക്കി

“അമ്മായി,അമ്മായിക്ക് അച്ഛനോട് ദേഷ്യം ഉണ്ടോ”

“ഇതിൽ ദേഷ്യപ്പെടേണ്ട ആൾ ഞാൻ അല്ലല്ലോ,അമ്മാവൻ എന്ത് പറയുന്നോ അതാണ് എന്റെ തീരുമാനം”

ആ ഉത്തരം താൻ ചോദിച്ച ചോദ്യത്തിനും ചോദിക്കാത്ത ചോദ്യത്തിനും ചേർത്തുള്ളതാണെന്ന് അനാമികക്ക് മനസ്സിലായി

“അമ്മായി,..ഞാൻ ഇപ്പൊ അച്ചുവിനെ കൊണ്ട് പോകാനാണ് വന്നത് ഏട്ടനും വരും,ഞങ്ങൾ ഒന്ന് പോയിട്ട് വരട്ടെ”

“എന്നോട് ചോദിക്കണ്ട മോളെ,അമ്മാവനോട് ചോദിച്ചിട്ട് പൊയ്ക്കോ”

അനാമിക ദയനീയമായി ഒരിക്കൽക്കൂടി മിനിയുടെ മുഖത്തേക്ക് നോക്കി,  അവർ വീണ്ടും കൈ മലർത്തി

നിരാശയുടെയും അതിൽ കൂടുതൽ ഭയത്തോടെയും അനാമിക അമ്മാവന്റെ അരികിലേക്ക് നടന്നു

“അമ്മാവാ ഞാനും അച്ചുവും ഒന്ന് പുറത്ത് പോയിട്ട് വരട്ടെ..”

അനാമിക ഭയത്തോടെ ആണ് അത് ചോദിച്ചത്

“നിങ്ങൾ മാത്രമേ ഉള്ളോ”

അമ്മാവന്റെ ഗൗരവത്തോടെ ഉള്ള ചോദ്യം അവളുടെ ഉള്ളിലെ ഭയത്തെ വീണ്ടും ഇരട്ടിയാക്കി

“അ…അല്ല …ഏട്ടൻ കൂടി ഉണ്ട്”

“ഹ്മ്മ്…അധികം വൈകണ്ട”

അമ്മാവൻ സമ്മതിച്ചതിൽ അവൾക്ക് സന്തോഷം ഉണ്ടായെങ്കിലും അയാളുടെ ഗൗരവ ഭാവം അവളുടെ മനസ്സിൽ ഒരു  വിഷമവും ഉണ്ടാക്കി

⚪️⚪️⚪️⚪️⚪️

അനാമിക എത്താം എന്ന് പറഞ്ഞ കഫെ ഡേയിൽ ഗൗതമാണ് ആദ്യം എത്തിയത്, കഫെയുടെ മുന്നിൽ എത്തിയ ഗൗതം പാർക്കിങ്ങിൽ നോക്കിയിട്ടും അനാമികയുടെ വണ്ടി കാണാത്തത് കൊണ്ട് അവൾ എത്തിയിട്ടില്ല എന്ന് മനസ്സിലാക്കി കാറിൽ തന്നെ ഇരുന്നു

ഏകദേശം അഞ്ചു മിനിറ്റ് കഴിഞ്ഞപ്പോഴേക്കും അനാമികയുടെ സ്കൂട്ടി ദൂരെനിന്ന് വരുന്നത് അവൻ കണ്ടു, അടുത്തു വന്നപ്പോഴാണ് അവളുടെ ഒപ്പം വേറൊരു പെൺകുട്ടി കൂടി ഉള്ളത് അവൻ ശ്രദ്ധിക്കുന്നത്.

അതാരായിരിക്കാം എന്ന് ഒരു നിമിഷം ചിന്തിച്ച ഗൗതമിന് അച്ചു എന്നാണ് മനസ്സിൽ വന്ന ഉത്തരം, ഒരു കൂടിക്കാഴ്ച പ്രതീക്ഷിച്ചത് ആണെങ്കിലും യാതൊരു മുന്നറിയിപ്പും ഇല്ലാതെ ഇങ്ങനെ ആയിരിക്കും ആയിരിക്കും എന്നവൻ കരുതിയിരുന്നില്ല

സർജിക്കൽ ബ്ലേഡ് കൊണ്ട് മനുഷ്യ ശരീരം കീറിമുറിക്കുന്ന ഡോക്ടർ ഗൗതമിനെ ഒരു പെണ്ണുമായുള്ള കൂടിക്കാഴ്ച ഭയപ്പെടുത്തി, ചില്ലുകൾ അടച്ചിട്ട ശീതീകരിച്ച കാറിലെ തണുത്ത വായുവിനും അവന്റെ നെറ്റിയിൽ പൊടിഞ്ഞ വിയർപ്പു കണങ്ങളെ തടഞ്ഞു നിർത്താൻ ആയില്ല