അനാമികയുടെ കഥ 7 [പ്രൊഫസർ ബ്രോ] 325

“അമ്മേ ഏട്ടൻ ഇല്ലേ അവിടെ”

അനാമിക ലക്ഷ്മിയെ ഫോൺ വിളിച്ചു സംസാരിക്കുകയായിരുന്നു

“ഉണ്ടല്ലോ മോളെ…”

“ഇന്ന് ഏട്ടന് ഹോസ്പിറ്റലിൽ പോകണ്ടല്ലോ ”

“വേണ്ടെന്ന് തോന്നുന്നു,ഒന്നും പറഞ്ഞില്ല,എന്താടി ”

“ഇന്ന് ഞായറാഴ്ച അല്ലെ,.ഇന്ന് അച്ചു ഫ്രീ ആണ് അപ്പൊ ഏട്ടന് അച്ചുവിനെ ഒന്ന് പരിചയപ്പെടുത്തി കൊടുക്കാം എന്ന് വച്ചു”

“അതിനെന്താ…ഞാൻ അവനെ വിളിച്ചു എഴുന്നേൽപ്പിച്ച് വിടാം”

“എഴുന്നേൽപ്പിച്ചോ,പക്ഷെ കാര്യം പറയണ്ട.കാര്യം ഇതാണെന്ന് അറിഞ്ഞാൽ ആൾ മുങ്ങാനുള്ള സാധ്യത ഉണ്ട് ”

അനാമിക പറഞ്ഞതിൽ കാര്യമുണ്ടെന്ന് മനസ്സിലാക്കിയ ലക്ഷ്മി അവൾ പറഞ്ഞത് അതുപോലെ അനുസരിച്ചു

“അപ്പൂ… എഴുന്നേൽക്ക് സമയം എത്രയായി എന്നറിയോ…ഇന്ന് ഓടാൻ പോകുന്നില്ലേ”

തലേദിവസം ഉണ്ടായിരുന്ന ഒരു ഓപ്പറേഷൻ കഴിഞ്ഞ് രാത്രി വൈകി ആണ് ഗൗതം ഉറങ്ങാൻ കിടന്നത്, ആ ഉറക്ക ക്ഷീണത്തിൽ ലക്ഷ്മി വന്ന്‌  വിളിച്ചപ്പോൾ അനിഷ്ടത്തോടെയാണ് അവൻ കണ്ണുകൾ തുറന്നത്

“ഇന്ന് വയ്യ അമ്മേ…നാളെ ആകട്ടെ”

“ഏയ്യ്,…അതൊന്നും പറഞ്ഞാൽ പറ്റില്ല,എഴുന്നേൽക്ക്…എഴുന്നേറ്റ് വ്യായാമം ഒക്കെ കഴിയുമ്പോൾ ഈ ക്ഷീണം ഒക്കെ മാറിക്കോളും”

ഗൗതം വീണ്ടും പല ഒഴിവ് കഴിവുകൾ പറഞ്ഞെങ്കിലും ലക്ഷ്മി അതൊന്നും ചെവിക്കൊണ്ടില്ല, അവൻ കട്ടിൽ വിട്ട് എഴുന്നേൽക്കുന്നത് വരെ ലക്ഷ്മി തന്റെ പരിശ്രമം തുടർന്നു

“ഈ അമ്മ,…സമാധാനം ആയല്ലോ,ഞാൻ എഴുന്നേറ്റു”

ഗൗതം എഴുന്നേറ്റത് കണ്ടതും ചുണ്ടിൽ ഒരു പുഞ്ചിരിയുമായി അവന്റെ തലയിൽ ഒന്ന് തഴുകിക്കൊണ്ട് ആ മുറിയിൽ നിന്നും പിൻവാങ്ങി

അമ്മയുടെ മുഖത്തെ സന്തോഷം കണ്ടപ്പോൾ തന്നെ ഗൗതമിന്റെ പകുതി ക്ഷീണം മാറി ഒരുന്മേഷം വന്നിരുന്നു,

“ഞാൻ പോയി എന്ന് കരുതി വീണ്ടും ഉറങ്ങാൻ നിക്കണ്ട.അഞ്ചു മിനിറ്റിനുള്ളിൽ താഴെ കണ്ടില്ലെങ്കിൽ ഞാൻ വീണ്ടും കയറി വരും”

താഴേക്കുള്ള സ്റ്റെയർകേസ് ഇറങ്ങുമ്പോൾ ലക്ഷ്മി ഗൗതമിന്റെ മുറിയിലേക്ക് നോക്കി വീണ്ടും വിളിച്ചു പറഞ്ഞു

“ആ…”

ഗൗതമിന്റെ ദേഷ്യത്തോടെ ഉള്ള ആ മറുപടി കേട്ടപ്പോൾ ലക്ഷ്മിക്ക് ചിരി ആണ് വന്നത്

‘ദൈവമെ ഇതെങ്കിലും ഒന്ന് ശരിയായാൽ മതിയായിരുന്നു, ആദ്യമായി ആണ് അവൻ ആരുടെയെങ്കിലും കാര്യത്തിൽ അര്ധസമ്മതം എങ്കിലും മൂളുന്നത്. ഇനി ഇവർക്ക് തമ്മിൽ ഇഷ്ടപ്പെട്ടിട്ട് വീട്ടുകാർക്ക് ഇഷ്ടപ്പെട്ടില്ലെങ്കിലോ…ആദ്യം വീട്ടുകാരോട് സംസാരിച്ചിട്ട് മതിയായിരുന്നു എല്ലാം. അനുമോളും സീതയും ഉള്ളതാണ് ഒരാശ്വാസം.’

ചിന്തയിൽ ആയിരുന്ന ലക്ഷ്മി പടികൾ കഴിഞ്ഞത് അറിഞ്ഞത് വേച്ചു വീഴാൻ പോയപ്പോൾ ആണ്,ആ സമയത്ത് കൈവരിയിൽ പിടിത്തം കിട്ടിയത് കൊണ്ട് മാത്രം വീണില്ല

പെട്ടന്നുണ്ടായ ഭയത്തിൽ കുറച്ചു സമയം അടുത്തുള്ള കസേരയിൽ ഇരുന്നതിന് ശേഷമാണ് ലക്ഷ്മി അടുക്കളയിലേക്ക് പോയത്

ജോഗിങ് കഴിഞ്ഞ് തിരിച്ചെത്തിയ ഗൗതം ഉടൻ തന്നെ കുളിക്കുവാൻ ആയി പോയി, കുളിച്ചിട്ടിറങ്ങിയ ഗൗതമിന് ലക്ഷ്മി പറഞ്ഞത് പോലെ നല്ലരു ഉന്മേഷം തോന്നി,അത്രയും സമയം ഉണ്ടായിരുന്ന ക്ഷീണങ്ങൾ ഒക്കെ എവിടെയോ പോയത് പോലെ

“അമ്മേ വിശക്കുന്നു…”

ഗൗതം ഡൈനിങ്ങ് ടേബിളിൽ ഇരുന്നുകൊണ്ട് അടുക്കളയിലേക്ക് നോക്കി അലറി

“കിടന്ന് കാറാതെ ചെക്കാ വരുവാ”

അധികം വൈകാതെ തന്നെ ഒരു കാസറോളിൽ ചൂട് പറക്കുന്ന ഇടിയപ്പവും മുട്ടക്കറിയുമായി ലക്ഷ്മി ഡൈനിങ്ങ് ഹാളിലേക്ക് വന്നു,