അനാമികയുടെ കഥ 7

Anamikayude Kadha Part 7 | Author : Professor Bro | Previous Part 

വാട്സ്ആപ്പിൽ സ്റ്റാറ്റസ് കണ്ടുകൊണ്ടിരുന്ന അരുൺ അപ്രതീക്ഷിതമായാണ് ആ ചിത്രം കാണുന്നത്, അതിനൊപ്പം ഒരു അടിക്കുറിപ്പും WITH MY ETTAN AND AMMAAS ♥️

അരുണിന്റെ മനസ്സിൽ എരിഞ്ഞുകൊണ്ടിരുന്ന പകയുടെ കനലുകൾ ആളിക്കത്തി, അവന്റെ കണ്ണുകൾ രക്തവര്ണമായി

‘ഏട്ടൻ …ആ വാക്കിനു അവൾ കൊടുത്ത അർഥം എന്താണ് …അവൾക്ക് സ്വന്തമായി ഒരു ചേട്ടൻ ഇല്ല എന്നത് എനിക്കുറപ്പാണ് ,കസിൻസ് …??? ഏയ്യ് അതിനും വഴി ഇല്ല, അന്ന് ഞാൻ അവളുടെ അച്ഛൻറെയും അമ്മയുടെയും അടുത്ത് സംസാരിച്ചപ്പോൾ അവർ പറഞ്ഞതാണ് അവൾക്ക് ആകെയുള്ള കസിൻ അർച്ചന ആണെന്ന് …,,,പിന്നെ ഇതാരാണ് !!!! ഇനി അവൾ കല്യാണം കഴിക്കാൻ പോകുന്ന ആൾ …,, പക്ഷെ അന്നത്തെ ആ കൂടിക്കാഴ്ചക്ക് ശേഷം ഇങ്ങനെ ഒരു കാര്യം …,,, ഒന്നും വ്യക്തമാകുന്നില്ല ,എല്ലാം മനസ്സിലാക്കാൻ ഒരേ ഒരു വഴി, അയാളെ കണ്ട് പിടിക്കുക, അവർ തമ്മിൽ ഉള്ള ബന്ധം അവനിൽ നിന്ന് തന്നെ അറിയുക ,..,  അനാമിക…,,, ഞാൻ പറഞ്ഞത് നിനക്കോർമ ഉണ്ടല്ലോ അല്ലെ …,ഓർമ വേണം ഞാൻ വരികയാണ് നിന്റെ മുന്നിലേക്ക്, കയ്യിൽ നിനക്കായി പണി കഴിച്ച താലിയുമായി …’

അരുണിന്റെ ചുണ്ടിൽ എല്ലാം ചിന്തിച്ച് ഉറപ്പിച്ച ഒരു ചിരി നിറഞ്ഞു

⚪️⚪️⚪️⚪️⚪️⚪️

“അനൂ …നീ ആ ഫോൺ ഒന്ന് നിലത്തു വയ്ക്കാമോ,…കുറെ നേരമായല്ലോ അതിൽ പണിയുന്നു”

“ഇപ്പൊ വയ്ക്കാം അമ്മേ…മെസ്സേജുകൾക്ക് ഒന്ന് മറുപടി കൊടുത്തോട്ടെ… എല്ലാം എന്റെ ഏട്ടന്റെ ആരാധികമാരാ”

അനാമിക സീതക്ക് കൊടുത്ത മറുപടിയിൽ ഞെട്ടിയത് ഗൗതം ആയിരുന്നു

“ആരുടെ ആരാധികമാര് ..???”

“ഏട്ടന്റെ ,,,…ഇത് കണ്ടോ ,.ഞാൻ നമ്മുടെ ഫോട്ടോ സ്റ്റാറ്റസ് ഇട്ടപ്പോൾ മുതൽ വന്ന മെസ്സേജുകളാ,എല്ലാവർക്കും അറിയേണ്ടത് ഏട്ടനെക്കുറിച്ചാ…ഏട്ടൻ ആരാ, കല്യാണം കഴിച്ചതാണോ, കല്യാണം ആലോചിക്കുന്നുണ്ടോ, ഏതെങ്കിലും കുട്ടിയെ സ്നേഹിക്കുന്നുണ്ടോ …ഹോ മറുപടി കൊടുത്തു ഞാൻ മടുത്തു .ഇനിയും കൂടുതൽ വന്നേക്കാം, നോക്കിക്കേ ഇത്രയും പേര് കണ്ടു നമ്മുടെ ഫോട്ടോ”

അനാമിക തന്റെ ഫോണിൽ നോക്കിക്കൊണ്ട് സ്റ്റാറ്റസ് കണ്ടവരുടെ പേരുകൾ വായിക്കുവാൻ തുടങ്ങി

“അഞ്ജലി ,ഇന്ദു ,ആര്യ ,അലീന ,അച്ചു ,….”

പേരുകൾ വായിച്ചുകൊണ്ടിരുന്ന അനാമികയുടെ മുഖത്ത് ഒരു ഭയവും ദേഷ്യവും കലർന്ന ഭാവം വന്ന്‌ നിറയുന്നത് ഗൗതം കണ്ടു ,അവൻ അവളുടെ കയ്യിൽ നിന്നും ആ ഫോൺ വാങ്ങി അതിൽ നിന്നും ആ പേരുകൾ വായിക്കുവാൻ തുടങ്ങി

“അഞ്ജലി …..,…,…,,..അച്ചു , അരുൺ …,,, എന്റെ മോളെ ഇത് കണ്ടിട്ടാണോ നിനക്ക് ഇപ്പൊ ദേഷ്യം വന്നത് ,നിനക്ക് ഇഷ്ടമല്ലെങ്കിൽ ആ no അങ്ങ് ബ്ലോക്ക്‌ ചെയ്തേക്ക് അതിന് ശേഷം ഡിലീറ്റ് ചെയ്തോ പ്രശ്നം തീർന്നില്ലേ…”

“ഞാൻ ഇതൊക്കെ നേരത്തെയും ചെയ്തതല്ലേ ഏട്ടാ ….എന്നിട്ട് എന്താ ഉപകാരം ഉണ്ടായത്”

“നേരത്തെ ഞാൻ ഇല്ലായിരുന്നല്ലോ മോളെ നിന്റെ ഒപ്പം”

അനാമികയുടെ ആത്മവിശ്വാസത്തെ പതിന്മടങ്ങു വർധിപ്പിക്കാൻ സഹായിക്കുന്നതായിരുന്നു ഗൗതമിന്റെ വാക്കുകൾ, ഇനി മുതൽ ഞാൻ നിന്റെ ഒപ്പം ഉണ്ടാകും എന്നവൻ പറയാതെ പറയുകയായിരുന്നു

“ലക്ഷ്മിയമ്മേ എന്റെ ഏട്ടന്റെ പെണ്ണിനെ ഞാൻ കണ്ടുപിടിച്ചോട്ടെ …”