അമ്മയുടെ തലോടലിൽ, ആ മാറിലെ ചൂട് പറ്റി കിടക്കുമ്പോൾ അവൻ മറ്റെല്ലാം മറക്കുകയായിരുന്നു, പതിയെ പതിയെ അവൻ ഉറക്കത്തിലേക്ക് വഴുതിവീണുഉറങ്ങിക്കൊണ്ടിരുന്ന മകന്റെ മൂർദ്ധാവിൽ ചുംബിച്ചുകൊണ്ട് ലക്ഷ്മിയും അവനരികിലായി കിടന്നു…

‘ഇങ്ങനെ ഒരു ദിവസം താൻ പ്രതീക്ഷിച്ചത് തന്നെയാണ്, എന്നാലും അതിങ്ങനെ ഒരവസ്ഥയിൽ ആയിരിക്കും എന്ന് കരുതിയില്ല.. ഇനി എന്തൊക്കെ സംഭവിക്കും എന്നറിയില്ല, ഗൗതം ഇനി അയാളെ കാണുമ്പോൾ എങ്ങനെ പ്രതികരിക്കും… ആ കുട്ടിയോടുള്ള അവന്റെ സമീപനം എങ്ങനെ ആയിരിക്കും… ഓർക്കുമ്പോൾ തന്നെ പേടി ആകുന്നു… ‘

വരുന്ന ദിവസത്തെക്കുറിച്ചു ആലോചിച്ചു കിടന്ന ലക്ഷ്മിക്ക് ഉറങ്ങാൻ സാധിച്ചില്ല, എന്നാൽ ലക്ഷ്മി മാത്രം ആയിരുന്നില്ല…അന്ന് രാത്രി ഉറങ്ങാൻ സാധിക്കാത്തവരായി മൂന്ന് പേര് കൂടി ഉണ്ടായിരുന്നു

അച്ഛനെ മാതൃകയാക്കി ഇതുവരെ ജീവിച്ചിരുന്ന അനാമിക, പഴയ കാലത്തെ തെറ്റുകൾ ഓർത്തും സ്വന്തം മകളുടെ മുൻപിൽ തെറ്റുകാരനായി നിൽക്കേണ്ടി വന്നതും ഓർത്ത് ഉരുകുന്ന രാഘവൻ,  ഭർത്താവിന്റെ കഴിഞ്ഞ കാലങ്ങൾ അറിയാമെങ്കിലും അയാളുടെ മകനെ നേരിൽ കണ്ടതിന്റെ വിഷമത്തിൽ സീത. എല്ലാവരും ഓരോ തരത്തിൽ ദുഖിതർ ആയിരുന്നു

രാവിലെ ഗൗതം എഴുന്നേൽക്കുമ്പോൾ അവനരികിൽ ലക്ഷ്മി ഉണ്ടായിരുന്നില്ല, സാധാരണ എഴുന്നേറ്റാൽ ഉടനെ പ്രഭാത കൃത്യങ്ങളും കഴിഞ്ഞ് ഒരു ജോഗിങ് പതിവുള്ളതാണ് അന്ന് അവൻ അതിനൊന്നുമുള്ള മാനസീകാവസ്ഥയിൽ ആയിരുന്നില്ല.

അടുക്കളയിൽ ജോലി ചെയ്തുകൊണ്ടിരുന്ന ലക്ഷ്മിയുടെ അവസ്ഥയും മറിച്ചായിരുന്നില്ല, കരിഞ്ഞ മണം വന്നപ്പോഴാണ് അടുപ്പിൽ ഇരുന്ന ദോശ കരിഞ്ഞത് അവർ അറിഞ്ഞത്… വെപ്രാളത്തിൽ എടുത്തപ്പോൾ കൈ പൊള്ളുകയും ചെയ്തു…

ദോശയും ചമ്മന്തിയും പാത്രത്തിലാക്കി ഡൈനിങ്ങ് ടേബിളിൽ കൊണ്ട് വെക്കാനായി പോയപ്പോഴാണ് tv യിൽ നോക്കി സോഫയിൽ ചാരിയിരിക്കുന്ന ഗൗതമിനെ കാണുന്നത്,

ലക്ഷ്മി ടേബിളിൽ എല്ലാം വച്ചതിനു ശേഷം ഗൗതമിന്റെ അരികിലേക്ക് നടന്നു, അവൻ tv യിലേക്ക് നോക്കിയാണ് ഇരിക്കുന്നതെങ്കിലും അവന്റെ ശ്രദ്ധ അതിൽ ഒന്നും ആയിരുന്നില്ല അവൻ എന്തൊക്കെയോ ചിന്തയിൽ ആയിരുന്നു…

“അപ്പൂ… ”

അവന്റെ തലയിൽ തഴുകിക്കൊണ്ട് ലക്ഷ്മി അവനരികിലായി ഇരുന്നു, അവൻ അമ്മയെ നോക്കി ചിരിച്ചതല്ലാതെ ഒന്നും സംസാരിച്ചില്ല

“നീ എന്താ ചിന്തിക്കുന്നത്… ”

“ഏയ്യ്… ഒന്നൂല്ലമ്മേ… ഞാൻ വെറുതെ tv കാണുകയായിരുന്നു”

“അതിന് നീ എപ്പോഴാ കന്നഡ പഠിച്ചത്… ”

അപ്പോഴാണ് അവൻ tv യിലേക്ക് നോക്കുന്നത്, എന്തൊക്കെയോ ചിന്തിച്ചുകൊണ്ട് ചാനെൽ മാറ്റി കന്നഡ ചാനെൽ എത്തിയത് അവൻ അറിഞ്ഞിരുന്നില്ല…