∆ ആഴങ്ങളിൽ ∆ [രക്ഷാധികാരി ബൈജു] 84

“അയ്യോ അല്ല… എനിക്ക് സാറിന്റെ ഉയരത്തിനൊപ്പം കൈയെത്തി പിടിക്കുമ്പോ വേദനിക്കുന്നുണ്ട് അതാ… ”

“ആണോ എന്നാ നീ ഇരിക്ക് എന്നിട്ടാ താക്കോൽ ഇങ്ങ് താ.”

“ദാ സാറേ…”

അങ്ങനെ എന്റെ കൈയ്യിൽ നിന്നും താക്കോലുവാങ്ങി വേഗം വണ്ടിക്കരികിലെത്തിയ മനോജ്സാറിന് പക്ഷേ വണ്ടിയെടുത്തെന്‍റെ അരികിലേക്കെത്താൻ നല്ല പാടായിത്തോന്നി.

സാധാരണ ടൂ വീലർ മാത്രം ഓടിച്ച് പരിചയമുള്ള സാറിന് എന്റെ ടൂ വീലറായ ഫോർ വീലർ ഓടിക്കുവാൻ നല്ല ബുദ്ധിമുട്ടായി.

എങ്ങനോ ഒരുവിധം വണ്ടിയെന്റെ എടുതെത്തിച്ച ശേഷം…

“നീ എങ്ങനെയാണെടാ ഇതുകൊണ്ട് നടക്കുന്നേ. ഇങ്ങോട്ട് പിടിച്ചാൽ അങ്ങോട്ട് പോകും.ഒരു തരത്തിൽ പറ്റില്ല…”

“ഓ ഇതൊക്കെയൊരു പരിചയമാണ് സാറെ. ഇതിപ്പോ സാറ് ആദ്യമായതുകൊണ്ടാ…”

“ആ ചിലപ്പോ അതുമാവാം… മ്മ് നീ വാ എഴുന്നേൽക്ക് ഞാനീ വണ്ടിയിലേക്ക് ഇരുത്താം.”

അങ്ങനെയെന്നെ വണ്ടിയിൽ ഇരുത്തിയ ശേഷം സാറ് തിരിച്ച് സ്റ്റാഫ് റൂമിലേക്ക് പോയി,

ഞാൻ വണ്ടി സ്റ്റാർട്ട് ചെയ്ത്  മെല്ലെ വീട്ടിലേക്കും.

സ്കൂളിൽ നിന്നും കഷ്ടിച്ച് മുക്കാൽ മണിക്കൂർ യത്രകാണും വീട്ടിലേക്ക്. അങ്ങനെ സമയം മൂന്നര കഴിഞ്ഞപ്പോഴേക്കും ഞാൻ വീട്ടിലെത്തി. വണ്ടി മുറ്റത്തെത്തിയ ശബ്ദംകേട്ടെന്നോണം അമ്മ മുറ്റത്തേക്കു വന്നു…

“ആ നീ ആരുന്നോ എന്താടാ ഇന്ന് നേരത്തെ. നീ വരുന്ന സമയം ആകുന്നേയുള്ളല്ലോ”.

“മ്മ് കുറച്ച് നേരത്തെ ഇറങ്ങി. അവര് വിളിച്ചാരുന്നു. ഇന്നു വരുമെന്നാ പറഞ്ഞെ.”