ഇവാ, An Angelic Beauty Part 4[മാലാഖയുടെ കാമുകൻ] 1769

ഭദ്ര തിരികെ പോകുമ്പോൾ ആണ് അജിത്തിനെ ഒന്ന് കണ്ടാലോ എന്ന് തോന്നിയത്. അവൾ കാർ നേരെ ഹോസ്പിറ്റലിലേക്ക് വിട്ടു..

അവനെ ഫോണിൽ വിളിച്ചു ഒന്ന് കാണാൻ വന്നതാണെന്ന് പറഞ്ഞപ്പോൾ അജിത്ത് ഓടിവന്നു..

“എന്താ വക്കീലേ..?”

അവൻ പരിഭ്രമത്തോടെ ചോദിച്ചു. അവൾ അവനെ ഒന്ന് നോക്കി.. ഇളംനീല ഷർട്ട്. ചേരുന്ന പാന്റ്സും കഴുത്തിൽ സ്റ്റെതസ്കോപ്പും.. നല്ല ഭംഗി ഉണ്ട്.

“ഒന്ന് കാണാൻ വന്നതാണ്..”

ഭദ്ര ചിരിയോടെ പറഞ്ഞപ്പോൾ അവൻ വിശ്വസിക്കാൻ ആകാതെ അവളെ നോക്കി..

“ആടോ ഡോക്ടറെ.. എന്താ കാണാൻ വരാൻ പാടില്ലേ..?”

അവൾ കുസൃതിയോടെ ചോദിച്ചപ്പോൾ അവൻ പുഞ്ചിരിച്ചു..

അവർ നേരെ ഒരു കോഫി ഷോപ്പിലേക്ക് പോയി..

ഭദ്രയുടെ പീലികൾ തിങ്ങിയ കറുത്ത കണ്ണുകൾ കണ്ടപ്പോൾ അവന് അവളുടെ കണ്ണുകളിൽ ചുംബിക്കാൻ തോന്നി.. പക്ഷെ അവൾ ഇഷ്ട്ടം പറഞ്ഞിട്ടില്ല എന്ന് അവന് ബോധ്യം ഉണ്ടായിരുന്നു..

“കൃഷിയൊക്കെ എങ്ങനെ പോകുന്നു ഡോക്ടറെ..”

അവന്റെ നോട്ടം കണ്ടപ്പോൾ അവന്റെ ശ്രദ്ധ തിരിക്കാൻ അവൾ ചോദിച്ചു.

“ങേ എന്താ.?”

“ഓഹോ അപ്പോൾ സ്വപ്‌നം കണ്ടത് ആണല്ലേ..സത്യം പറ ആരാ അവൾ..?”

അവൾ ചിരിയോടെ ചോദിച്ചു.. അവൻ ചിരിച്ചു..

“നേരെ മുൻപിൽ ഇരിക്കുന്നവൾ തന്നെയാണ് സ്വപ്നത്തിലും..”

അവൻ പറഞ്ഞതുകേട്ടപ്പോൾ അവളുടെ കവിളിലേക്ക് രക്തം ഇരച്ചുകയറി.. അവൾ തലതാഴ്ത്തി..