?Guardian Ghost? Part -3 ༆ കർണൻ(rahul)༆ 343

അവൻ നടന്ന് ഒരു റൂമിനു മുന്നിൽ എത്തി അവളുടെ അടുത്തേക്ക് ഇനി ഒരു ഡോറിന്റെ ദൂരം മാത്രം പക്ഷെ ആ ഡോറിന്റെ പിടിയിൽ പിടിച്ചപ്പോൾ തന്നെ അവന്റെ കൈ ഒന്ന് വിറകൊണ്ടു. അവളുടെ അവസ്ഥ എന്താകുമെന്ന് ഓർത്ത് ഒരു അകാരണമായ ഭയം.

അപ്പോഴേക്കും എയ്ഞ്ചലിന്റെ കൈ അവന്റെ ചുമലിൽ ഒരു നനുത്ത ഇളം തെന്നൽ പോലെ പതിഞ്ഞു. അത് അവനിൽ ഒരു ആശ്വാസം പകർന്നു അവൾ നൽക്കുന്ന പിന്തുണ പോലെ ഒരു അനുഭൂതി. അവൻ ഡോർ തുറന്ന് അകത്തു കയറി അവിടെ കുറയെ തൂവെള്ള മെത്തയിൽ ഒരു മാലാഖയെ പോലെ അവൾ കിടക്കുന്നുണ്ട്. അവന്റെ കുഞ്ഞി.

പക്ഷെ അവളുടെ മുഖത്തേയ്ക്ക് നോക്കിയ അവന്റെ ഹൃദയം ഒന്ന് പിടഞ്ഞു. നെറ്റിയുടെ സൈഡിലായി ഒരു മുറിവ് കവിളിൽ രക്തം ചത്തത് പോലെ തിണർത്ത പാട് ചുണ്ട് പൊട്ടിയിട്ടുണ്ട്. കവിൾ വീങ്ങിയിരിക്കുന്നു. കണ്ണിനു താഴെയായി കരുവാളിച്ച് കിടക്കുന്നു.
ഡ്രിപ്പ് ഇട്ടേക്കുന്ന കയ്യിൽ ആരുടെയൊക്കെയോ നഖം കൊണ്ട് മുറിഞ്ഞത് പോലെ ഉള്ള പാടുകൾ.കഴുത്തിലും എന്തോ മുറിവ് പറ്റിയിട്ട് മരുന്ന് വച്ചുട്ടുണ്ട്.

ആകെമൊത്തത്തിൽ തന്റെ കുഞ്ഞിപ്പെണ്ണ് തളർന്നു പോയിരിക്കുന്നു. അവളുടെ പഴയ പ്രസരിപ്പ് ആ മുഖത്ത് നിന്ന്  മാഞ്ഞ് പോയതുപോലെ.

അപ്പോഴേക്കും എയ്ഞ്ചൽ പുറത്തേക്ക് പോയി.

അവൻ അവളുടെ അടുത്തിരുന്ന് കൈക്ക് മേലെ കൈ വച്ച് തലോടി ഇരുന്നു. അവളിൽ ചെറിയ ഞരക്കങ്ങൾ രൂപപ്പെട്ടപ്പോൾ അവൻ അവളുടെ മുഖത്തേക്ക് നോക്കി. അവൾ കണ്ണുകൾ തളർച്ചയോടെ പതിയെ തുറന്നു.

കൊച്ചാ……. അവളുടെ ശബ്ദം നല്ലോണം തളർച്ച ബാധിച്ചതായിരുന്നു. അത് അവളുടെ ആ വിളിയിലെ ഇടർച്ചയിൽ നിന്ന് തന്നെ അവനും മനസ്സിലായി.

ഹാ കൊച്ചന്റെ കുഞ്ഞിപ്പെണ്ണ് എഴുന്നേറ്റോ എന്ത് ഉറക്കമാടാ ഇത് കൊച്ചൻ വന്നിട്ട് എത്ര നേരമായെന്ന് അറിയാവോ. എന്റെ കൊച്ചിന്റെ പിറന്നാളിന് കൊച്ചൻ സമ്മാനം ഒക്കെ ആയി വന്നപ്പോ നീ വന്ന് ഹോസ്പിറ്റലിൽ കിടക്കുവാ? നമുക്ക് പോയാലോടാ എന്റെ കൊച്ചിന് ഇവിടുത്തെ മണം ഇഷ്ടല്ലല്ലോ?
കൊച്ചൻ എയ്ഞ്ചലമ്മയോട് പറയട്ടെ?
അവൻ ഓരോന്ന് പറഞ്ഞ് അവളുടെ കവിളിൽ തലോടി അവളിലെ ഭാവം എന്താണെന്ന് അറിയാനുള്ള പ്രയത്നം നടത്തി.