?കരിനാഗം 11?[ചാണക്യൻ] 367

വാ മഹി………….

മഹിയുടെ കയ്യും പിടിച്ചുകൊണ്ട് യക്ഷമി സ്റ്റേഷന് ഉള്ളിലേക്ക് നടന്നു..

ഉള്ളിലെത്തിയതും മഹിയെ അവിടെ നിർത്തിയിട്ട് യക്ഷമി എൻക്വയറിൽ പോയി മംഗള ഏതു പ്ലാറ്റ്ഫോമിലാണ് എത്തുന്നതെന്ന് ചോദിച്ചറിഞ്ഞു.

ശേഷം മഹിയുടെ കയ്യും പിടിച്ചുകൊണ്ട് തന്നെ മുന്നിലേക്ക് നടന്നു.

അമ്മ തന്റെ കുഞ്ഞിനെ കൂട്ടം തെറ്റാതെ സുരക്ഷിതമായി കൊണ്ടു പോകുന്ന പോലെ യക്ഷമി മഹിയെയും കൊണ്ടു നടന്നു.

നാലാമത്തെ പ്ലാറ്റ് ഫോമിലായിരുന്നു മംഗള ലക്ഷദ്വീപ് എത്തിച്ചേരുന്നത്.

കൃത്യം നാലു മണിക്ക്.

പ്ലാറ്റ്ഫോമുകളിൽ ആളുകൾ തിങ്ങി നിൽപ്പുണ്ട്.

അവിടെയുള്ള കസേരകളിൽ ഒന്നിലായി മഹി പതിയെ ഇരുന്നു.

കൂടെ യക്ഷമിയും.

ഇരുവർക്കുമിടയിൽ മൗനം തളം കെട്ടി കിടന്നു.

എങ്ങോട്ടോ പോകുവാനായി തയാറായിക്കൊണ്ട് ആളുകളെയും വഹിച്ചുകൊണ്ട് ഒരു ട്രെയിൻ പുറപ്പെടുവാൻ തയാറായിരിപ്പുണ്ട്.

പല റെയിൽവേ ട്രാക്കുകളിലായി നിരവധി ട്രൈയ്നുകൾ തങ്ങളുടെ ഊഴവും കാത്തു കിടപ്പുണ്ട്.

ഇനി അരമണിക്കൂർ കൂടെ കഴിഞ്ഞാൽ മംഗള ഈ ട്രാക്കിലേക്ക് എത്തി ചേരും.

യക്ഷമി ഓരോ ചിന്തകളിലായിരുന്നു.

ഒരു ചായ കുടിച്ചാലോ?

മഹി അവളോടായി ചോദിച്ചു.

ഹ്മ്മ്

യക്ഷമി തലയാട്ടി.

അതു കണ്ടതും മഹി അവരുടെ ഇരിപ്പിടത്തിനു പിറകിലുള്ള സ്റ്റാളിൽ പോയി രണ്ടു ചായ വാങ്ങി.

അതിന്റെ പൈസയും കൊടുത്തിട്ട് അവൻ തിരികെ അതേ സീറ്റിൽ വന്നിരുന്നു.

കയ്യിലുള്ള ഒരു ഗ്ലാസ് യക്ഷമിക്ക് നേരെ നീട്ടി.

അവൾ അത്‌ ഔത്സുക്യത്തോടെ വാങ്ങി.

ശേഷം ചുണ്ടോട് അടുപ്പിച്ചു ഒരു കവിൾ കുടിച്ചിറക്കി.

ഇനി എപ്പോഴാ കാണാ?

മഹി ഒരു ചോദ്യമെറിഞ്ഞു.

യക്ഷമിയുടെ മുഖത്തെ പേശികൾ വലിഞ്ഞു മുറുകി.

ചുണ്ടുകൾ കടിച്ചു പിടിച്ചുകൊണ്ട് അവൾ ചുമൽ കൂച്ചി.

പ്രതീക്ഷിച്ച മറുപടി തന്നെ ആയതിനാൽ മഹിയും ഒന്നും പറഞ്ഞില്ല.

പാലക്കാടേക്ക് ഞാൻ വരുന്നുണ്ട്

എപ്പോ?

മഹി അതിശയത്തോടെ അവളെ തന്നെ ഉറ്റു നോക്കി.

ഇങ്ങനൊരു മറുപടി അവൻ നിനച്ചതേയില്ല.

ഇവിടുത്തെ പ്രൊജക്റ്റ്‌ കംപ്ലീറ്റ് ആയാൽ ഉടൻ കേരളത്തിലേക്ക് തിരിക്കും.