🐆MISSION JUNGLE🐾 1 [Nikila] 2391

സിംഹം അൽപ്പനേരം ആലോചിച്ചശേഷം ;

 

“താനെന്തെങ്കിലും ചെയ്യ്”

 

സിംഹത്തിന്റെ അനുവാദം കൂടി കിട്ടിയതോടെ ആ കാട്ടിൽ ഇലക്ഷൻ നടത്താമെന്ന തീരുമാനം എല്ലാവരും സമ്മതിച്ചു. ഇലക്ഷനിൽ മത്സരിക്കാൻ ഒരുപാട് പേര് മുന്നോട്ട് വന്നു. സ്ഥാനാർഥി പട്ടികയിൽ പേര് വരാൻ വേണ്ടി തന്നെ അവർക്കിടയിൽ വേറൊരു മത്സരമുണ്ടായി. കാടായാലും ശരി നാടായാലും ശരി അധികാരം തലയ്ക്ക് പിടിച്ചാൽ പിന്നീടാവർക്ക് ഭ്രാന്തിളകിയ പോലെയാണ്. അങ്ങനെ രാജാവ് പദവിക്ക് വേണ്ടിയുള്ള ഇലക്ഷനിൽ മത്സരിക്കാൻ യോഗ്യരായ നാല് പേരെ അവസാനം തിരഞ്ഞെടുത്തു.

 

ആദ്യത്തെയാൽ സിംഹം തന്നെയായിരുന്നു. രണ്ടാമത്തെയാൾ കടുവച്ചാരാണ്. ഇന്ത്യയുടെ ദേശീയമൃഗം കടുവയാണെന്ന പൊതുവായുള്ള ഒരു കേട്ടറിവിന്റെ ബലത്തിലാണ് കടുവച്ചാർ സ്ഥാനാർഥി പട്ടികയിലെ യോഗ്യതാ റൗണ്ട് പാസായത്. പിന്നൊരാൾ ശ്രീ നായേഷ് നായ തന്നെയായിരുന്നു. നാട്ടിലുള്ള പോലീസ് പദവിയിൽ ഒരുപാട് നാൾ ജോലി ചെയ്തതുക്കൊണ്ട് പുതിയ ചില ഭരണ നയങ്ങൾ കൊണ്ടുവരാൻ തനിക്കു കഴിയും എന്ന് വാദിച്ചുകൊണ്ടാണ് നായേഷ് മത്സരിക്കാനുള്ള യോഗ്യതയിലെത്തിയത്. അവസാനത്തെയാൾ പൊതുപ്രവർത്തകൻ കാക്കയായിരുന്നു. നാട്ടുകാർക്ക് പരോപകാരിയായി ജീവിക്കുന്ന കാക്കയെയും അങ്ങനെ സ്ഥാനാർഥി ലിസ്റ്റിൽ ഉൾപ്പെടുത്തി.

 

അങ്ങനെ ഇലക്ഷന് വേണ്ടിയുള്ള തയ്യാറെടുപ്പുകൾ തകൃതിയായി നടന്നു. വോട്ട് ചോദിക്കുന്ന ഘട്ടം വന്നപ്പോൾ അത് സിംഹത്തിന് അടി കിട്ടിയതുപോലൊരു അവസ്ഥയുണ്ടാക്കി. അതുവരെ ഭക്ഷണം കഴിക്കാനും ഫോണിൽ തോണ്ടിക്കളിക്കാനും മാത്രം തല കുനിച്ചുകൊണ്ടിരുന്ന സിംഹത്തിന് വോട്ട് ചോദിക്കാൻ വേണ്ടി കാട്ടിലെ മൃഗങ്ങളുടെ മുൻപിൽ തല കുനിക്കേണ്ട അവസ്ഥ വന്നു. എങ്കിലും ഇനിയും മുന്നേറമെന്നുള്ളതു കൊണ്ട് ഇഷ്ടത്തോടെയല്ലെങ്കിലും സിംഹം അതെല്ലാം സഹിച്ചു നിന്നു. സിംഹത്തെപ്പോലെ എടുപ്പും പ്രൌടിയുമുള്ള കടുവച്ചാർ സിംഹത്തെപ്പോലെ തന്നെ മാന്യമായി മറ്റു മൃഗങ്ങളോടും വോട്ട് ചോദിച്ചു. എന്നാൽ ബാക്കിയുണ്ടായിരുന്ന കാക്കയും നായേഷും ചെയ്തത് ഇത്തിരി വെറൈറ്റിയായിരുന്നു.

 

വോട്ട് കിട്ടുവാൻ വേണ്ടി നായേഷ് നായ കാട്ടുമുക്കിലെ സുരക്ഷയെക്കുറിച്ചും സുരക്ഷാ പ്രശ്നങ്ങളെക്കുറിച്ചും ഘോരഘോരമായി കുരച്ചു. ആളുടെ ആ നേരത്തുള്ള സംസാരശൈലിയൊക്കെ ഒരു പോലീസ് ഓഫീസറെപ്പോലെയായിരുന്നു. വേദിയിൽ നിന്ന് കുരച്ചതും പോരാഞ്ഞിട്ട് കൂടുതൽ സപ്പോർട്ട് കിട്ടുവാൻ വേണ്ടി നായേഷ് ചില വി ഐ പി കളുടെ വീടുകളില് രാത്രി കാവല് നിന്നു.

 

എന്നാൽ പൊതുപ്രവർത്തകൻ കാക്ക സാധാരണ രീതിയിൽ വലിയ അതിശയോക്തിയൊന്നുമില്ലാതെ സംസാരിച്ചുക്കൊണ്ടായിരുന്നു എല്ലാവരോടും വോട്ട് അഭ്യർത്ഥിച്ചത്. കാക്കയ്ക്ക് സംസാരിക്കുന്നുണ്ടായിരുന്നത് കാടിന്റെ ശുചീകരണത്തെപ്പറ്റിയും സ്വച്ഛവാനനത്തെപ്പറ്റിയുമൊക്കെയായിരുന്നു. അതിന്റെ ഭാഗമായി ആഴ്ചയിലൊരിക്കൽ ഡ്രൈഡേയ് ആചാരിക്കാനും പുള്ളി ആഹ്വാനം ചെയ്തു.

 

അങ്ങനെ ഇലക്ഷൻ ആഘോഷമായി തന്നെ മുന്നോട്ട് പോയി. സംഭവം കാട്ടുമുക്കിലെ മൃഗങ്ങൾക്കെല്ലാം നന്നായി ഇഷ്ടപ്പെട്ടു. കാരണം ഒരുകാലത്തൊക്കെ ഇവരുടെയൊക്കെ മുൻപിൽ അഹങ്കാരത്തോടെയും ജാട കാണിച്ചും നടന്ന അധികാരികൾ ഇപ്പോഴത്തെ സാഹചര്യത്തിൽ പിന്തുണ കിട്ടാൻ വേണ്ടി ഇവരുടെ മുൻപിൽ എളിമ കാണിക്കുമ്പോൾ ഇതിൽപരം എന്തു സന്തോഷമാണ് ഈ പാവപ്പെട്ട മൃഗങ്ങൾക്കുണ്ടാകേണ്ടത്. നിലവിലെ സാഹചര്യമനുസരിച്ച് പിന്തുണയുടെ കാര്യത്തിൽ മുന്നിൽ നിൽക്കുന്നത് സിംഹവും കടുവച്ചാരുമാണ്. പലരുടെയും പ്രതീഷ ഇത്തവണയും അധികാരത്തിൽ കേറുന്നത് സിംഹം തന്നെയായിരിക്കുമെന്നായിരുന്നു. അദ്ദേഹത്തിന്റെ പൂർവികർക്ക് കാട്ടുമുക്കിലെ മൃഗങ്ങൾ കാലകാലങ്ങളായി കൊടുക്കുന്ന ബഹുമാനമായിരുന്നു അങ്ങനെ വിചാരിക്കാൻ കാരണം.

 

അങ്ങനെ വോട്ട് ചെയ്യുന്ന ദിവസം വന്നെത്തി. വോട്ട് ചെയ്യുന്ന സ്ഥലത്തൊക്കെ പതിവിലും കൂടുതൽ ആൾത്തിരിക്കായിരുന്നു. ഈ കാട്ടിൽ ഇത്രത്തോളം ജീവികളുണ്ടായിരുന്നെന്ന കാര്യം പലരും അറിഞ്ഞത് ആ ദിവസമായിരുന്നു. വോട്ട് ചെയ്യേണ്ട പോളിംഗ് ബൂത്തിലെല്ലാം മൃഗപ്രവാഹമായിരുന്നു. മൃഗങ്ങളുടെ വലിപ്പത്തിനനുസരിച്ചാണ് പോളിംഗ് ബൂത്തുകൾ തരം തിരിച്ചിരുന്നത്. അങ്ങനെ വലിയ ആഘോഷത്തോടു കൂടി തന്നെ വോട്ട് ചെയ്യൽ പ്രക്രിയ ഭംഗിയായി നടന്നു.

 

അവസാനം റിസൾട്ട്‌ പ്രഖ്യാപിക്കുന്ന ദിവസമെത്തി. ഇനി ഈ കാട് ഭരിക്കുന്നത് ആരാണെന്നറിയാൻ എല്ലാവർക്കും ആവേശമായി. എന്നാൽ ഫലപ്രഖ്യാപനം വന്നപ്പോൾ എല്ലാവരും അക്ഷരർത്ഥത്തിൽ ഞെട്ടി. കാടിന്റെ രാജാവായി തിരഞ്ഞെടുക്കപ്പെട്ടത് കടുവച്ചാരെയായിരുന്നു. ഇനി മുതൽ കാട്ടുമുക്ക് എന്ന കാട്ടിലെ രാജാവായി അറിയപ്പെടുന്നത് കടുവച്ചാരായിരിക്കും. കാടിന്റെ പാരമ്പരാഗതമായ ചരിത്രം തന്നെ മാറിമറിഞ്ഞു. അതുവരെ ഏറ്റവും കൂടുതൽ പിന്തുണ കിട്ടിക്കൊണ്ടിരുന്ന സിംഹം എങ്ങനെ അവസാനനിമിഷം തോറ്റുപോയി എന്ന് പലർക്കും സംശയം തോന്നി. ഇതോടെ പുലികേശി പുലിവാല് പിടിക്കാൻ പോലും കഴിയാതെ നട്ടം തിരിഞ്ഞു😆. ഇനി സിംഹം സാറിന്റെ കയ്യിലെങ്ങാനും ചെന്നു പെട്ടാൽ സാധാ പുലിയായ തന്നെ അങ്ങേരു വരയൻ പുലിയാക്കുമല്ലോന്ന് ഓർത്തു പുലികേശി ടെൻഷനടിച്ചു. സിംഹത്തിന്റെ നഖത്തിന്റെ മൂർച്ച എത്രത്തോളമുണ്ടെന്നു നന്നായി അറിയാവുന്ന ആളാണ് പുലികേശി.

 

എത്രയും പെട്ടന്ന് ഈ പ്രശ്നത്തിനൊരു പരിഹാരം കാണണമെന്ന് പുലികേശി തീരുമാനിച്ചു. എങ്ങനെയാണ് സിംഹം അവസാന റൗണ്ടിൽ തോറ്റത് എന്നറിയാനായി പുലികേശി ഇലക്ഷനിൽ വോട്ട് ചെയ്ത മൃഗങ്ങളുടെ ലിസ്റ്റ് ഒന്ന് കുടഞ്ഞിട്ട് പരിശോധിച്ചു നോക്കി. ആദ്യപരിശോധനയിൽ തന്നെ പുലികേശി ഞെട്ടിക്കുന്ന ഒരു കാര്യം കണ്ടെത്തി. താൻ കണ്ടെത്തിയ ഈ വിവരം അറിയിക്കാൻ പുലികേശി സിംഹത്തിന്റെയടുത്തേക്ക് ചെന്നു. ഈ സമയം സിംഹം ഗുഹയിൽ താടിക്ക് കൈത്താങ്ങും വച്ചിരിക്കുകയായിരുന്നു. ദൂരെ നിന്നും തന്റെടുത്തേക്ക് വരുന്ന പുലികേശിയെ കണ്ടതും ആള് ഒഴിഞ്ഞു മാറാൻ ശ്രമിച്ചു. എന്നാൽ അതിനു മുന്നേ പുലികേശി പുള്ളിയെ തടഞ്ഞു നിർത്തി.