❤️ദേവൻ ❤️part 20 [Ijasahammed] 248

കൂട്ടം കൂടികയ്യിലിരുന്ന കളർ

പെൻസിലുകൾ ഒരു കൊച്ചു മഴവില്ലിനെ പോലെ തോന്നിച്ചു..
ജീവിതത്തിലെ നിറങ്ങൾ മാഞ്ഞുപൊയ്ക്കൊണ്ടിരിക്കെ കയ്യിൽ വിരിഞ്ഞ ആ കൊച്ചുമഴവില്ലിനോട് വല്ലാത്തൊരു കൗതുകം തോന്നി..

അപ്പോഴും മറുകയ്യിലിരുന്ന സിഗരറ്റ്പാക്കറ്റ് കനല് പോലെ കയ്യിനെ പൊള്ളിച്ചുകൊണ്ടിരുന്നു…

അകത്തേക്ക് കടന്നു ചെല്ലുന്നആദ്യമുറിയിൽ ജനൽ പിടിയിൽ വിരലമർത്തി നിൽക്കുന്ന ദേവേട്ടനരികിലേക്ക് പതിയെ നടന്നു..

സംസാരിക്കാനായി തൊണ്ടഅനക്കിയിട്ടും വാക്കുകൾ പുറത്ത് വരാൻ കഴിയാതെ തൊണ്ടക്കുഴിയിൽ കുരുങ്ങിക്കിടന്നു…

ആ മുഖവും ശരീരവും കണ്ടതും അസ്ത്രം കണക്കിന് നെഞ്ചിൽ തറഞ്ഞുകയറിയ ആ വാക്കുകൾ അവിടെക്കിടന്നു നീറി..

“കെട്ട്യേ താലിപൊട്ടിച്ചെറിയാൻ നിക്ക് മടിണ്ടാകില്യ..

ഓർത്തോ.. !!!”””

അവയിലെ അവസാന രണ്ട് വാക്കുകൾ ഭ്രാന്ത് പിടിപ്പിക്കാൻ പാകത്തിന് ചെവിയിൽ വീണ്ടും വീണ്ടും മുഴങ്ങികേട്ട് കൊണ്ടിരുന്നു…

കരച്ചിൽ ഇങ്ങോളമെത്തിയതും ഒന്നും പറയാൻ തുനിയാതെ കയ്യിലെ ചുളിവ് നിറഞ്ഞ പാക്കറ്റ് ദേവേട്ടനരികിലെ മേശമേൽ വെച്ചു കൊണ്ട് വേഗത്തിൽ തിരിഞ്ഞു നടന്നു..

മുറിവിട്ടു വാതിലിന് അരികിൽ എത്തിയപ്പോഴേക്കും വിതുമ്പൽ ഒരുവലിയ കരച്ചിലായി മാറി കഴിഞ്ഞിരുന്നു…

ചുമരിനോട് ചേർന്ന് നിന്ന് കരയുമ്പോൾ തേങ്ങലുകൾ പുറത്ത് വരാതിരിക്കാൻ രണ്ട് കൈകൊണ്ടും വായഇറുക്കെ പൊത്തിപിടിച്ചു..

കണ്ണുനീർ നിറഞ്ഞ കണ്ണിലൂടെ ആ മുറിക്കുള്ളിൽ പുകയുയരുന്നത് അവ്യക്തതയോടെ ഞാൻ കണ്ടു…

നെഞ്ചിലെ താലിമാല ആദ്യമായി മാറിനെ പൊള്ളിച്ചു..

ആ ചുണ്ട്കളിൽ നിന്നും മേല്പോട്ട് ഉയർന്നു പൊന്തുന്നത് ഉള്ളിലെ കനത്തവേദനകളാണെന്ന് ഞാൻ ആ നിമിഷം തിരിച്ചറിഞ്ഞു..

പതിയെ നന്ദക്കരികിലേക്ക് നടന്നു..

കണ്ണുകൾ ചിമ്മിയടച്ചു കൊണ്ട് ഒന്നുമറിയാതെ അത്രമേൽ നിഷ്കളങ്കമായി ഉറങ്ങുന്ന നന്ദയെ നോക്കി കൊണ്ട് അവളുടെ അടുത്തുചെന്ന് കിടക്കുമ്പോൾ തേങ്ങലുകളെല്ലാം അവസാനിച്ചിരുന്നു..