⚔️ദേവാസുരൻ 6⚒️ [Demon king-DK] 2205

പക്ഷെ ആ വനം ശാന്തമായിരുന്നു…
അവിടാരും ഉണ്ടായിരുന്നില്ല…. എന്നാലും പാറു തന്റെ പ്രതീക്ഷ കൈവിടാതെ അയാളുടെ വരവിനായി കാത്ത് നിന്നു…അവൾ പതിയെ ആ വനത്തിലേക്ക് തന്നെ നടന്നു….
അവിടെ ഒത്ത നടുക്കായി നിൽക്കുന്ന ഒരു വലിയ മരത്തിന്റെ പൊന്തി നിൽക്കുന്ന വേരിൽ അവളിരുന്നു….അതിന്റെ ചില്ലകൾ ഒരുപാട് വിടർന്നതാണ്…
അതും കയ്യെത്താ ദൂരത്ത് ഉള്ളതും…പാറു തന്റെ കണ്ണുകൾ അടച്ച് കാതോർത്ത് ആ പ്രകൃതിയുടെ ശുദ്ധ സംഗീതം ആസ്വദിക്കാൻ തുടങ്ങി….

കിളികളുടെ കുഞ്ഞു ശബ്ദവും വെള്ളത്തിലൂടെ ചാടുന്ന തവളയുടെ ശബ്ദവും അവൾക്കേറെ ഇഷ്ടമായി….

പെട്ടെന്ന് ചില ജീവികളുടെ ഭയന്നുള്ള കരച്ചിലാണ് പിന്നെ കേട്ടത്…. അപ്പോൾ തന്നെ പാറു തന്റെ കണ്ണ് തുറന്നു….

നേരത്തെ കണ്ട ശാന്തമായ അന്തരീക്ഷമല്ല ഇപ്പോൾ താൻ കാണുന്നത്…. അവിടുള്ള കുഞ്ഞു ജീവികളെല്ലാം എന്തിനെയും പേടിച്ച് കരയുന്നു…

ആകാശം ഇരുണ്ടു തുടങ്ങിയിരുന്നു….
അവിടെ വല്ലാത്തൊരു ഭീകരത അവളനുഭവിച്ചു….
പാറു യാന്ത്രികമായി ആ വേരിൽ നിന്നും എഴുന്നേറ്റ് നിന്നു…

പേടി അവളെ കീഴടക്കാൻ തുടങ്ങിയിരുന്നു…
കാൽ മുട്ടുകളിൽ വിറയൽ വരുവാൻ തുടങ്ങി….

പെട്ടെന്ന് തന്റെ പിന്നിൽ നിന്നും എന്തിന്റെയോ നിശ്വാസം അവളനുഭവിച്ചു….
അൽപ്പം ഭയത്തോടെ അവൾ പതിയെ തിരിഞ്ഞു നോക്കി…. അപ്പോൾ കണ്ട കാഴ്ചയിൽ അവൾ പകുതി മരിക്കാൻ തുടങ്ങിയിരുന്നു…

തന്റെ തൊട്ട് മുന്നിൽ ഒരു കരിനാഗം പത്തി വിടർത്തി നിൽക്കുന്നു…..
അതും ആ മരത്തിന്റെ ചില്ലയിൽ തൂങ്ങികൊണ്ട്…
അതിന്റെ നീളം തന്നെ 10 അടിയോളം വരും….

പാറുവിന് അനങ്ങുവാൻ സാധിച്ചില്ല….
തന്റെ മരണം തൊട്ട് മുന്നിൽ പത്തി വിടർത്തി നിൽക്കുന്നു…

അതിന്റെ കണ്ണുകൾ പാറുവിനെ സൂക്ഷ്മമായി നോക്കി…. പാറുവും അതിനെ കണ്ണെടുക്കാതെ നോക്കി നിന്നു…. അനങ്ങാതിരിക്കാൻ അവൾ പരമാവധി ശ്രമിച്ചു…

പക്ഷെ അതിന് സാധിച്ചില്ല….
യാന്ത്രികമായി പാറു തന്റെ കണ്ണുകൾ അടച്ചു തുറന്നു….
അതോടെ ആ പാമ്പ് അവളെ ആക്രമിക്കുവാൻ തയ്യാറായി നിന്നു….

അതിന്റെ പൊന്തി നിൽക്കുന്ന രണ്ട് പല്ലുകൾ പുറത്തേക്ക് വന്നു…..

ഒപ്പം രണ്ട് കൂർത്ത മുനയുള്ള നാവും പുറത്തേക്ക് തള്ളി വന്നു…

അവളെ കൊത്തുവാനായി ആ പാമ്പ് തയ്യാറായിരുന്നു…

പാറു തന്റെ കണ്ണുകൾ ഇറുകെ അടച്ചു….
ഒപ്പം ആ പാമ്പിന്റെ ചീറ്റൽ ശബ്ദവും മുഴങ്ങി…
അവൾ തന്റെ ഇരു കൈകളും ചെവിയിൽ വച്ച് ഉറക്കെ അലറി… അതിന്റെ ഒപ്പം തന്നെ ആകാശത്തിൽ നിന്ന് ശക്തിയിൽ ഒരു ഇടിമിന്നലും ഭൂമിയിലേക്ക് പതിച്ചു…

അൽപ്പ നേരം അവൾക്ക് കണ്ണുകൾ തുറക്കുവാനായില്ല……
ഭയം അവളെ അത്രക്ക് കീഴ്പ്പെടുത്തിയിരുന്നു….
അവൾക്ക് തന്റെ ദേഹത്ത് പാമ്പിന്റെ സ്പർശം അനുഭവിക്കുവാൻ സാധിച്ചില്ല….
മറിച്ച് തന്റെ ഹൃദയ താളം നന്നായി വർധിക്കുകയും ചെയ്യുന്നു…. ആരുടെയോ സാമീപ്യം അവളറിയുകയായിരുന്നു.