ഹൃദയരാഗം 27 [Achu Siva] 1053

ലാപ്ടോപ്പിൽ കണ്ണും നട്ടു ഇരിക്കുന്നുണ്ടെങ്കിലും വിനയ്ക്ക് അതിലൊന്നും ശ്രദ്ധിക്കാൻ കഴിയുന്നുണ്ടായിരുന്നില്ല….

അവളുടെ ഇടയ്ക്കിടയ്ക്കുള്ള ചിരിയും, സംസാരവുമൊക്കെ അയാളുടെ കണ്ണുകളെ അവളിലേക്ക് കൂട്ടി കൊണ്ടു പോയി….

അവളുടെ കുറുമ്പും കുസൃതികളും തനിക്ക് എന്ത് മാത്രം പ്രിയപ്പെട്ടവയായിരുന്നു….

അവൻ ഓർത്തു….

ശെരിക്കും അവഗണയുടെ നീറ്റൽ ഇപ്പോഴാണ് മനസ്സിലാകുന്നത്…. താൻ അവളോട്‌ കുറെ നാളായി അത് തന്നെയല്ലേ ചെയ്തു കൊണ്ടിരുന്നത്… അവൾക്കു ഇതിലേറെ നൊന്തിട്ടുണ്ടാവില്ലേ….

വിനയ് ഓര്‍മ്മകളിലേക്ക് അറിയാതെ പോയി….

നവീന്റെ വിഷയത്തിൽ നിന്നും ഉടലെടുത്ത ദേഷ്യമാണ് തന്നെ കൊണ്ടു ഇതെല്ലാം ചെയ്യിപ്പിച്ചത്…. തെറ്റുകൾ മനസ്സിലാക്കി അവൾ തിരികെ വന്നിട്ട് പോലും ക്ഷമിച്ചില്ല…. അവളുടെ അറിവില്ലായ്മയും പക്വത കുറവുമായി കണ്ടു പൊറുക്കാൻ മനസ്സ് കാട്ടിയില്ല….കൂടുതൽ കൂടുതൽ അകറ്റാൻ ശ്രെമിച്ചു ….എന്ത് കൊണ്ടാണ് താൻ അങ്ങനെ ചെയ്തത്…. ഒരുപക്ഷേ അവളെ ജീവനേക്കാളേറെ സ്നേഹിക്കുന്നത് കൊണ്ടാകുമോ ?…. പ്രണയിക്കുന്നത് കൊണ്ടാകുമോ ?….

അവൻ വേദനയോടെ അവളെ നോക്കി….

ഇങ്ങനൊരു വ്യക്തി ഈ വീട്ടിൽ ഉണ്ടെന്നു പോലുമുള്ള പരിഗണന ഞാൻ അവൾക്ക് പലപ്പോഴും കൊടുത്തിരുന്നില്ല…. അവളോടൊപ്പം സമയം ചിലവഴിക്കാനോ, പുറത്തു കൊണ്ടു പോകാനോ, ആവശ്യമുള്ള സാധനങ്ങൾ വാങ്ങി കൊടുക്കാനോ ഒന്നും…. ഒന്നും താൻ ശ്രദ്ധിച്ചിരുന്നില്ല….

ഇപ്പൊ എന്താണെന്നു അറിയാത്ത ഒരു കാരണം കൊണ്ടു അവൾ എന്നെ അകറ്റി നിർത്തുമ്പോൾ സഹിക്കാൻ പറ്റാത്തത് പോലെ…. അവളുടെ ഒരു ചെറിയ മാറ്റം പോലും എന്നെ ഇത്ര മാത്രം കുത്തി നോവിക്കുന്നുവെങ്കിൽ എന്റെ പെരുമാറ്റം അവളെ എത്ര മാത്രം തളർത്തിയിട്ടുണ്ടാവും….