സഖി 79

കേട്ടതെല്ലാം തെറ്റാണെന്നു തിരുത്താൻ കഴിഞ്ഞില്ലവന്. ആയിരം കുടത്തിന്റെ വായ മൂടി കെട്ടാം.. പക്ഷേ.. ഒരു മനുഷ്യന്റെ….

ദുഷിച്ച നാവിനു മറുപടി നൽകാനിറങ്ങി പുറപ്പെട്ടപ്പോൾ അതും വാർത്തയാക്കി നാട്ടുകാർ ആഘോഷിച്ചു.

ഒടുവിൽ ലക്ഷ്മിയുടെ വീട്ടുകാർ തന്നെ തള്ളിപ്പറഞ്ഞു.
അവളുടെ അച്ഛന്റെ കൈത്തലം പതിഞ്ഞ കവിളിൽ അവൻ മെല്ലെ തലോടി.

വാപ്പ ഇല്ലാത്ത സ്ഥാനത്ത് താൻ കണ്ട മനുഷ്യൻ. വേർതിരിവില്ലാതെ തന്നെയും മകനെ പോലെ സ്നേഹിച്ച വ്യക്തിത്വം.
കവിളിലെ തിണർത്ത പാടുകളേക്കാൾ അവന്റെ ഹൃദയത്തിൽ നിറഞ്ഞ വേദന കടിച്ചമർത്താൻ അവൻ പാടുപെട്ടു.

ട്രെയിനിന്റെ ചൂളം വിളികൾക്കിടയിൽ അവൻ ബാഗിൽ മുഖമമർത്തി പൊട്ടിക്കരഞ്ഞു.

അനുജനോട്‌ ഉമ്മയെ നോക്കാൻ പറഞ്ഞേൽപ്പിച്ച് നാടുവിടുമ്പോൾ അവന്റെ പേഴ്സിനുള്ളിൽ സൂക്ഷിച്ചു വെച്ചിരുന്നു അവളുടെ നിറം മങ്ങിയൊരു ചിത്രം.

“എവിടെയാണെങ്കിലും സന്തോഷായിരിക്കണം”

പോകാൻ നേരം അവളോട് അവൻ പറഞ്ഞ വാക്കുകളാണത്.

കാലങ്ങൾക്കിപ്പുറം ആ കണ്ണുകളെ അവൻ വീണ്ടും കണ്ടു.

അവന്റെ നെഞ്ചകം നീറി.

കരഞ്ഞു വാടിയ കണ്ണുകളിൽ അവളുടെ ചിത്രം തെളിഞ്ഞു.

ആരോരുമറിയാതെ സൂക്ഷിച്ച ലക്ഷ്മിയുടെ ചിത്രത്തിലേക്ക് തന്നെ അവന്റെ കണ്ണുകൾ എന്തോ തിരഞ്ഞു.

ആ ചിത്രത്തിൽ അവൾ ചിരിക്കുന്നുണ്ട്.

മനസ്സ് തുറന്നു ചിരിക്കുവാൻ അവൾക്കറിയാമായിരുന്നു.
ലക്ഷ്യമില്ലാത്ത ജീവിതത്തിൽ തനിക്കൊരു കൈത്താങ്ങായി കൂടെ ഉണ്ടായിരുന്നവൾ. എപ്പോഴോ അടിപതറി തുടങ്ങിയ ജീവിതം കെട്ടിപ്പടുക്കുവാൻ വാക്കുകൾ കൊണ്ടവന്റെ മനസ്സിൽ ഇന്ദ്രജാലം തീർത്തവൾ.

അവളാണ് എന്റെ സഖി.

അവന്റെ മിഴിനീരുകൾ ആ ചിത്രത്തെ നനച്ചു.

അവളിൽ അസ്തമിച്ച സന്തോഷങ്ങളെ വീണ്ടെടുക്കുവാൻ തനിക്ക് സാധിച്ചാലോ.

ആ ചിന്തയിൽ നിന്നും അവൻ അവളെ തേടിയെത്തി.

വീണ്ടും ഒരുവട്ടം കൂടി അവളെ കാണണം.
അവൾക്ക് പറയാനുള്ളത് കേൾക്കാൻ ഒരു മനസ്സ്.

അതാണ്‌ അവൾ ആഗ്രഹിക്കുന്നത്. അതുമാത്രമാണ് അവൾക്കില്ലാത്തതും.

ആ സ്ത്രീ വീണ്ടും തടഞ്ഞു അവനെ.

കടം വാങ്ങിയ നോട്ടുകൾ അവർക്ക് നൽകി അവൻ അവളെ തേടി അകത്തേക്ക് കടന്നു.

കണ്ണഞ്ചിപ്പിക്കുന്ന ലൈറ്റുകളും കർട്ടനുകളും മടുപ്പിക്കുന്ന ഗന്ധങ്ങളും ചേർന്ന് വ്യത്യസ്തമായൊരു അന്തരീക്ഷം. ഒപ്പം ഒരുപാട് കഥകൾ പേറുന്ന കുറെയേറെ ജന്മങ്ങൾ.

പലരും മുഖത്ത് നോക്കി ചിരിക്കുന്നുണ്ട്. ആ ചിരിക്ക് നിഷ്കളങ്കതയില്ല. അന്യമായി തീർന്നിരിക്കാം അതെല്ലാമവർക്ക്.

ഒടുവിൽ അവളെ തിരഞ്ഞു അവനൊരു മുറിയിലെത്തി.

പറന്നുയരാൻ ആകാശങ്ങൾ സ്വപ്നം കണ്ടവൾ നാലു ചുവരുകൾക്കുള്ളിൽ തളയ്ക്കപ്പെട്ട വിധിയോർത്ത് അവന്റെ കണ്ണുകൾ നിറഞ്ഞു തൂവി.