ശ്രീ നാഗരുദ്ര ? ???? പതിനൊന്നാം ഭാഗം – [Santhosh Nair] 1116

ശ്രീകുമാർ വൈകിട്ട് എട്ടു മണിയ്ക്കുതന്നെ പുറപ്പെട്ടു. സേലം വരെ അവൻ ഡ്രൈവ് ചെയ്യും. പിന്നീട് ഉറങ്ങണം.

അതുകൊണ്ടു വാളയാർ വരെയുള്ള ദൂരം തമ്പി ഓടിയ്ക്കും. ബാക്കി ദൂരം പിന്നെ നോക്കാം എന്നാണു പ്ലാൻ.
എന്തായാലും തിരികെ നാളെ തമ്പി മൊത്തം ഓടിയ്ക്കണം, അതുകൊണ്ടു നന്നായി ഭക്ഷണം കഴിയ്ക്കുക ഉറങ്ങുക ഇവ മാത്രമാണ് പാലക്കാട് അവന്റെ ജോലിയെന്ന് ശ്രീകുമാർ നേരത്തെതന്നെ പറഞ്ഞിട്ടുണ്ട്.
തെല്ലുറക്കപ്രിയനും ഭക്ഷണപ്രിയനുമായ തമ്പിയ്ക്കു ആ പരിപാടി ഇഷ്ടപ്പെട്ടു. അവൻ സാധാരണ രാത്രി ഡ്രൈവുകൾ ഇഷ്ടപ്പെടുന്നവനാണ്.

ഓഫീസിൽ ഒരു കാരണവശാലും നാളെ ഉച്ചയ്ക്ക് 12 മണിവരെ യാതൊരു വിധ ശല്യങ്ങളും ഉണ്ടാകാത്തവിധം എല്ലാം പ്ലാൻ ചെയ്തിട്ടുണ്ട്. ഉള്ളു നിറഞ്ഞ സന്തോഷത്തോടെ അവർ പുറപ്പെട്ടു. ഇന്ദിരാനഗറിൽനിന്നും കോറമംഗലവഴി വന്നു ഇടത്തോട്ട് തിരിഞ്ഞു നേരെ പോയി വലത്തോട്ട് തിരിഞ്ഞു സിൽക്ക് ബോർഡ്. പിന്നീട് ഇടത്തേക്ക് തിരിഞ്ഞു നേരെ ഹൊസൂർ route.

യാത്രയുടെ വിരസത അകലാനും ഒരു ഗുഡ് ഫീലിനുമായി അവൻ അനൂപ് ശങ്കറിന്റെ പാട്ടു പ്ലേയ് ചെയ്തു.

സിൽക്‌ബോർഡ് മുതൽ നല്ല ട്രാഫിക് ആയിരുന്നു. ഫസ്റ്റ് ഗിയറിലും സെക്കന്റ് ഗിയറിലും തന്നെ മുൻപോട്ടു പോകേണ്ടിവരുന്നത് വലിയ ഇറിറ്റേഷൻ തന്നെയാണ്. എങ്കിലും ബോമ്മസാന്ദ്ര കഴിഞ്ഞപ്പോൾ തിരക്കിന് അല്പം ഭേദമുണ്ടായി, കുറച്ചുകൂടി വേഗത്തിൽ പോകാനായി.

ഒരു മണിക്കൂർ കൊണ്ട് ഹൊസൂർ എത്തിച്ചേർന്നു. പിന്നീടങ്ങോട്ട് വലിയ തിരക്കൊന്നും ഉണ്ടായിരുന്നില്ല. സാമാന്യം നല്ല സ്പീഡിൽ തന്നെ പോകാനായി.

രണ്ടര മണിക്കൂറിനുള്ളിൽത്തന്നെ രുദ്രയുടെ വീട് സ്ഥിതി ചെയ്യുന്ന സ്ഥലത്തിനടുത്തെത്തി. വഴിയിൽ നിന്ന് നോക്കിയാൽ ആ ബംഗ്ളാവ് കാണാനാവില്ല. കാട് പിടിച്ച ഏരിയ. വണ്ടിയുടെ സ്പീഡ് അല്പം കുറച്ചു അവൻ തമ്പിയ്ക്കു സംശയമുണ്ടാകാത്ത വിധം ആ സ്ഥലം നോക്കിക്കൊണ്ടു വണ്ടി ഓടിച്ചു.

പന്ത്രണ്ടു മണിയോടെ അവർ സേലത്തെത്തി. ഒരു റെസ്റ്റാറ്റാന്റിനു മുൻപിൽ നിർത്തി.   ഇറങ്ങി കാപ്പിയും ഇഡലിയും കഴിച്ചു.