ശ്രീ നാഗരുദ്ര 🥰 🙄🩸🐍👻 പതിനൊന്നാം ഭാഗം – [Santhosh Nair] 1116

അപ്പോഴേയ്ക്കും സമയം അഞ്ചരയോളമായി. ഇനി ഹോമം ആരംഭിയ്ക്കണം. അപ്പോഴേയ്ക്കും പല താവഴികളിലുള്ളവരും വന്നു തുടങ്ങി. ഹോമത്തിനു ഒരു ഗൃഹസ്ഥനായ (കല്യാണം കഴിഞ്ഞ വ്യക്തി) യജമാനൻ നിര്ബന്ധമാണ്. അതുകൊണ്ടു തന്നെ ഈ ഹോമത്തിനു കാരണഭൂതനാണെങ്കിലും അവനു യജമാന സ്ഥാനത്തു ഇരിയ്ക്കാനാവില്ല.

അവന്റെ അനുവാദത്തോടുകൂടി നാരായണ അയ്യരുടെ അനിയനും ഭാര്യയും യജമാനസ്ഥാനത്തിൽ ഇരുന്നു. അദ്ദേഹവും ഒരു വേദ പണ്ഡിതനും ഇവരുടെ തറവാടിന്റെ മേൽ സ്നേഹവും ബഹുമാനവും ഉള്ള വ്യക്തിയാണ്.

നാരായണ അയ്യർ എല്ലാവരോടും നാമജപം തുടങ്ങാൻ ആവശ്യപ്പെട്ടു. അദ്ദേഹം തന്നെ അത് തുടങ്ങിവെച്ചു. ഉടനെ തന്നെ എല്ലാവരും ചേർന്ന്
“ഹരേ കൃഷ്ണ ഹരേ കൃഷ്ണ കൃഷ്ണ കൃഷ്ണ ഹരേ ഹരേ
ഹരേ രാമ ഹരേ രാമ രാമ രാമ ഹരേ ഹരേ” എന്ന മന്ത്രം പതിനാറു പ്രാവശ്യം ചൊല്ലി.

അതിനു ശേഷം സുദർശന ഹോമത്തിന്റെ പ്രാധാന്യത്തെപ്പറ്റി അദ്ദേഹം പറഞ്ഞു:
“ഈ ഹോമം ക്ഷേമൈശ്വര്യങ്ങൾ വർദ്ധിപ്പിക്കാനും പിതൃദോഷശാന്തിക്കും ശത്രുദോഷങ്ങൾ ഉപദ്രവങ്ങൾ അകലാനും സഹായിയ്ക്കുന്നു. എല്ലാ ദോഷങ്ങളെയും സുദർശനൻ തന്റെ ആരക്കാലുകളാൽ നശിപ്പിയ്ക്കുന്നുവെന്നു വ്യംഗ്യം. ഈ ഹോമത്തിൽ എള്ള്, അക്ഷതം, പഞ്ചഗവ്യം, കടലാടി, കടുക്, നെയ്യ്, പാൽപ്പായസം എന്നീ ദ്രവ്യങ്ങളാണ് ഉപയോഗിയ്ക്കുന്നത്.
ഇന്നു നമ്മൾ ഗണപതിഹോമത്തോടെ ആരംഭിച്ച് നവഗ്രഹഹോമവും തുടർന്ന് മഹാസുദർശന ഹോമവും നടത്തി ശാന്തിഹോമത്തെ തുടർന്ന് ഭഗവതി സേവയും നടത്തും. എല്ലാവര്ക്കും മംഗളങ്ങൾ ഉണ്ടാകട്ടെ.”

ശേഷം വിഘ്നേശ്വര സ്തുതിയോടെ ഹോമം തുടങ്ങി. ആദ്യം ഗണപതി ഹോമം. എല്ലാ ദേവതകളോടും അഗ്നിയോടും പ്രാർത്ഥിച്ച ശേഷം പ്രാർത്ഥനകളോടെ ഹോമ കുണ്ഡത്തിലേയ്ക്ക് അഗ്നി പകർന്നു. എല്ലാവരും നിറഞ്ഞ കണ്ണുകളോടെ പ്രാർത്ഥിച്ചു.