ശ്രീ നാഗരുദ്ര 🥰 🙄🩸🐍👻 പതിനൊന്നാം ഭാഗം – [Santhosh Nair] 1116

സമയം പത്തുമണിയോളമായി. രുദ്രയും പെൺകുട്ടിയും പാലക്കാട്ടെ തറവാടിന്റെ ഗേറ്റ് തുറന്നു അകത്തു കയറി. ലാവെണ്ടർ കളറിലുള്ള കോട്ടൺ സാരി ഉടുത്ത ആ സുന്ദരിയും അതെ കളറിലുള്ള പാവാടയും ബ്ളവുസും ഇട്ട ആ കൊച്ചു സുന്ദരിയും ഗേറ്റ് കടന്നപ്പോൾ സുഗന്ധ വാഹിയായ കാറ്റു അവരെ തഴുകി കടന്നുപോയി. അതിൽ കുളിർ പകർന്നു കൊടുത്തത് അവരുടെ ബന്ധുക്കളുടെയും സ്വന്തങ്ങളുടെയും സാന്ത്വന നിശ്വാസങ്ങൾ ആവാം.

ഗേറ്റ് കടന്നയുടൻ അവൾ കൈകൾ ഉയർത്തി കൈ മുന്പോട്ടും താഴേയ്ക്കുമായി വീശി. ആ ഗേറ്റ് മുതൽ അവർ നടക്കുന്ന വഴിയിലെ പുല്ലുകളും കാടുകളും മുൾച്ചെടികളും അപ്രത്യക്ഷമാകാൻ തുടങ്ങി. അങ്ങനെ നടന്നു ചരൽ വിരിച്ച മുറ്റത്തു അവൾ എത്തി. “ഞങ്ങൾ വന്നിരിയ്ക്കുന്നു” എന്ന ഒരു പ്രത്യക്ഷ ആംഗ്യത്തോടെ അവൾ വലതു കൈ മുകളിലേക്കുയർത്തി ശക്തിയായി കറക്കി.

അതിൽനിന്നും രൂപം കൊണ്ട ഒരു കൊച്ചു ചുഴലിക്കാറ്റു ആ വീടിനു ചുറ്റും കാടുപിടിച്ചു നിന്നിരുന്ന പുല്ലുകൾ വലിച്ചു ദൂരെയെറിഞ്ഞു, മുറ്റത്തുണ്ടായിരുന്ന കരിയിലകളും മറ്റു ചപ്പുചവറുകളും പറമ്പിലേക്കെറിഞ്ഞു മുറ്റം ശുദ്ധമാക്കി.

അവളുടെ ശ്രദ്ധ ആ തുളസിത്തറയിലേക്കായി – പൊട്ടിപ്പൊളിഞ്ഞു പുല്ലു പിടിച്ച ആ പഴയ തുളസിത്തറയുടെ നേരെ അവൾ കയ്യുയർത്തി എന്തോ ഉരുവിട്ടു. ആ തറയ്ക്കു ചുറ്റിലുമായി നിന്ന പുല്ലുകളെയെല്ലാം ആ ചുഴലിക്കാറ്റു വലിച്ചു പറമ്പിലേക്കെറിഞ്ഞു. അല്പം വാടിനിൽക്കുന്ന തുളസിച്ചെടിയുടെ ചുവട്ടിൽ അല്പം നല്ല മണ്ണ് വന്നു വീണു, കൂടെ അല്പം തണുത്ത ജലവും. കാടു കയറിയ ആ ചെറിയ തോട്ടത്തിലേക്ക് അവൾ നോക്കി കൈകൾ വീശി – അതിലുണ്ടായിരുന്ന ആവശ്യമില്ലാത്ത പുല്ലുകളും കാടുകളും വേരോടെ പറിയ്ക്കപ്പെട്ടു പറമ്പിലേക്ക് വീശിയേറിയപ്പെട്ടു. അവിടെയുള്ള ചെത്തി, മുല്ല, ചെമ്പരത്തി, ചെമ്പകം, പിച്ചി മുതലായ ചെടികളുടെ ചുവട്ടിൽ ചാണകവും മണ്ണും കലർന്ന തടങ്ങൾ ഇടപ്പെട്ടു, അവയിലെല്ലാം ചുവടു തണുക്കുന്ന അളവിൽ വെള്ളവും ഒഴിയ്ക്കപ്പെട്ടു.

അവളുടെ നോട്ടം പിന്നീട് പുരയിടത്തിലേയ്ക്കായി. ക്ഷണനേരം കൊണ്ടു തൊടിയിൽ ഉള്ള തെങ്ങുകളുടെയും മാവുകളുടെയും പ്ലാവുകളുടെയും ഒക്കെ ചുവടുകൾ തെളിയിക്കപ്പെട്ടു, ആവശ്യമില്ലാത്ത പുല്ലുകളും കളകളും ഒക്കെ പറിച്ചു നീക്കപ്പെട്ടു.

അവിടുത്തെ കാടും പടലും നീങ്ങിയപ്പോൾ ആ സ്ഥലം കണ്ടാൽ ഒരു ഐശ്വര്യം ഒക്കെ വന്നു.

അവൾ വീടിനു നേരെ തിരിഞ്ഞു. ആ വീടിനു നേരെ അവൾ കൈവീശി. വീണ്ടും ആ ചെറിയ ചുഴലിക്കാറ്റ് തിരികെ വന്നു. ആ വീടിന്റെ ചുവരിലെ പൂപ്പലും പായലും നീക്കപ്പെട്ടു – ഓടിലുണ്ടായിരുന്ന അഴുക്കുകൾ ഉൾപ്പെടെ. അവ ആ പറമ്പിലെ തെങ്ങുകൾക്കും മറ്റും വളമായി എറിയപ്പെട്ടു.

പെട്ടെന്നു കാറ്റിന്റെ വേഗത്തിൽ ആ പുരയിടം മുഴുവൻ അവൾ ചുറ്റിവന്നു – വീടിന്റെ പിറകുവശമുൾപ്പെടെ. ഇതു വരെ ചെയ്ത ശുദ്ധീകരണ പ്രക്രിയയിൽ സംതൃപ്തയെന്നോണം തലയാട്ടിയ ശേഷം അവൾ വീടിനു മുൻപിലെത്തി.

വീടിന്റെ തിണ്ണയിൽ കയറിയ അവൾ വീണ്ടും കൈകൾ രണ്ടു വശത്തേക്കും ആട്ടി. അവിടുണ്ടായിരുന്ന ചപ്പുകളും മറ്റും നീക്കപ്പെട്ടു, ഒടിഞ്ഞും മറ്റും ഇരുന്ന പല വിധ സാമഗ്രികളും പൂർവസ്ഥിതിയിലായി.