ശ്രീ നാഗരുദ്ര ? ???? ഒൻപതാം ഭാഗം – [Santhosh Nair] 1123

അല്പം ഭയന്നുപോയ ശ്രീകുമാർ പുറകോട്ടു നീങ്ങി, ആ നായയുടെ തീക്കട്ട പോലെ തിളങ്ങുന്ന കണ്ണുകളിലേയ്ക്ക് നോക്കാൻ അവനു അല്പം ഭയം തോന്നി.

അവന്റെ കണ്ണുകളിൽ നോക്കിക്കൊണ്ടു ആ വലിയ നായ മുന്പോട്ടെടുത്തു. ആ പേടിക്കിടയിലും ആ നായയെ വെളിച്ചത്തിൽ ഒന്നു വിശദമായി നോക്കിക്കാണാൻ അവൻ മറന്നില്ല. ഒരു ജർമ്മൻ ഷെപേഡ് നായയുടെ ഓർമ്മയാണ് വന്നത്. അവന്റെ അരയ്ക്കുമുകളിൽ ആ നായയ്ക്ക് പൊക്കമുണ്ടാകും. രണ്ടുകാലിൽ നിന്നാൽ ഒരു പക്ഷെ അവനെക്കാൾ. വലിപ്പമുള്ള ശരീരഘടന.  ബലിഷ്ഠമായ കൈ കാലുകൾ. അവന്റെ കൈ കടിച്ചെടുക്കാൻ പോന്ന വലിപ്പമുള്ള വായ.

പുറകോട്ടു നീങ്ങിയ അവൻ എന്തിലോ തടുക്കി മലർന്നു വീണു. അവൻ മലർന്നു വീണപ്പോൾ അല്പം അന്തിച്ചു പോയ നായ ഒന്നു പുറകോട്ടു നീങ്ങി. നിറയെ പുല്ലുള്ള സ്ഥലമായതിനാൽ ഒന്നും പറ്റിയില്ല – പെട്ടെന്നു തന്നെ അവൻ ചാടി എഴുനേറ്റു നിന്നു.

ആരും രക്ഷയ്ക്ക് എത്തില്ല എന്നു മനസ്സിലായതിനാൽ തന്നെ അവൻ പ്രത്യാക്രമണത്തിനൊരുങ്ങി. “ഇനി തിരിച്ചടിയ്ക്കുക തന്നെ. ഒരു നായയുടെ കടികൊണ്ടു ചാകാൻ മനസ്സില്ലെനിയ്ക്കു.” അവൻ മനസ്സിലോർത്തു.

പെട്ടെന്നു ആ നായ അവന്റെ കഴുത്തു ലക്ഷ്യമാക്കി ഉയർന്നു ചാടി. അതു പ്രതീക്ഷിച്ചെന്നോണം നിന്ന അവൻ പിന്നോട്ടമർന്ന ശേഷം ഒരു കൈ കൊണ്ട് അതിന്റെ തൊണ്ടയിലും മറ്റേ കൈകൊണ്ടു അതിന്റെ വയറിലും തള്ളി ദൂരേക്കെറിഞ്ഞു. അവൻ തള്ളിയ ബലത്തിൽ മുപ്പതു കിലോയ്ക്ക് മുകളിൽ ഭാരമുള്ള ആ നായ നൂറോളം മീറ്റർ ദൂരെ പോയി വീണു.

മുഴുവൻ പുല്ലു മൂടിയ ഇടമായതുകൊണ്ടു തന്നെ അതിനൊന്നും പറ്റിയില്ല. അത് എഴുനേറ്റു എങ്ങോട്ടോ ഓടി മറഞ്ഞു.