ശുഭമുഹൂർത്തം [ഷാനു]

“കുറച്ചൂടെ ചായ എടുക്കട്ടേ?”

ഒഴിഞ്ഞു കിടക്കുന്ന കാലിഗ്ലാസ്സിലേക്ക് നോക്കി അവൾ ചോദിച്ചു

“വേണ്ട”, “ഞാൻ കുറച്ചു നേരം കിടന്നോട്ടെ എന്നാൽ?””

മറുപടി ഒന്നും പറയാതെ അവൾ പതുക്കെ എണീറ്റ്, അവളുടെ കണ്ണുകളിൽ ഉണ്ടായിരുന്ന ആ സഹതാപം എന്നെ വല്ലാണ്ട് വേദനിപ്പിച്ചു.. പാവം പെൺകുട്ടി.. ഒരു തെറ്റിദ്ധാരണയുടെ പേരിൽ എത്ര കാലാമാ എന്നെ ഇങ്ങനെ സഹിക്കുക. പലപ്പോഴും അവളുടെ കണ്ണുകളിൽ കാണുന്ന സഹതാപം കാണുമ്പോൾ ദേഷ്യം വരും, പിന്നെ ഒന്നും പറയാൻ നിൽക്കില്ല. കണ്ണടച്ചു കിടക്കും.. ദൈവം ഒരു തമാശ കാണിച്ചതാണത്രേ.. ഈ അവസ്ഥയിൽ ഒന്ന് എണീക്കാൻ കൂടെ വയ്യാണ്ട് അരക്കു താഴോട്ട് തളർന്നു കിടക്കാൻ തുടങ്ങിയിട്ട് 6 വര്ഷം കഴിഞ്ഞു… ഓരോന്ന് ആലോജിച് എപ്പോഴാ ഉറങ്ങിയത് എന്ന് അറിയില്ല.. അല്ലെങ്കിലും രാത്രിയേതാ പകലേതാ എന്നൊന്നും അറിയാറു കൂടെ ഇല്ല..

കുഴമ്പുകളുടെയും മരുന്നിന്റെയും വൃത്തികെട്ട മണം മാത്രം ശ്വസിച്ചു കൊണ്ടിരുന്ന എന്റെ ഈ ഇരുട്ട് നിറഞ്ഞ ജീവിതത്തിൽ അന്ന് കാച്ചിയ എണ്ണയുടെയും മുല്ലപ്പൂവിന്റെയും മണമായിരുന്നു തുടക്കം കുറിച്ചത്, കണ്ണുകൾ തുറന്ന് നോക്കിയത് എന്റെ ദേവുട്ടിയുടെ മുഖത്തേയ്ക്ക് . എന്നെ തന്നെ നോക്കി ഇരിക്കുകയാണ് പാവം.

“ദേവു”, “ഇന്നെന്താ വിശേഷം ”

“ഇന്നത്തെ ദിവസം മറന്നോ കണ്ണേട്ടൻ?”

നിഷ്കളങ്കമായ അവളുടെ ചോദ്യം കേട്ട് ഒന്ന് പുഞ്ചിരിക്കാൻ മാത്രേ കഴിഞ്ഞൊള്ളു,

“കണ്ണേട്ടാ , ഇന്ന് ഞാൻ കണ്ണേട്ടന്റെ ജീവിതത്തിലേക്ക് വന്നിട്ട് 6 വർഷം ആയിരിക്കുന്നു”

“ഓ ഇന്നാണല്ലേ ആ ദിവസം”

എന്റെ മറുപടിയിൽ അവൾ ഒട്ടും തൃപ്‌ത ആയില്ല എന്നറിയ, എന്നാലും എനിക്ക് അവളോട് വേറെ ഒന്നും പറയാൻ കഴിയില്ല.

“ഇന്നു അച്ഛനും അമ്മയും ഒക്കെ വരുമെന്ന് പറഞ്ഞിരുന്നു, ഞാൻ അപ്പോയെക്കും എന്തേലും ഒക്കെ ഉണ്ടാക്കട്ടെ കേട്ടോ ”

“ദേവു”

“എന്താ കണ്ണേട്ടാ”

“എന്നോട് ദേഷ്യം ഉണ്ടോ നിനക്ക്?”

ചെറുപുഞ്ചിരിയുമായി അവൾ എന്റെ നെറ്റിയിൽ ഉമ്മ വെച്ചു

“ഞാൻ ദേ അടുക്കളയിലേക്ക് ചെല്ലട്ടെ, ‘അമ്മ അടുക്കളയിൽ ഒറ്റക്കല്ലേ”

തിരിഞ്ഞു നടക്കാൻ നിന്ന അവളുടെ കയ്യിൽ ഞാൻ പിടിച്ചു, അറിയാതെ എന്റെ കണ്ണ് നിറയുന്നുണ്ടായിരുന്നു,

“പോയി വാ”

പതുക്കെ കണ്ണുകളടച്ചു ആ നല്ല കാലത്തിലേക്ക് ഞാൻ എന്റെ ഓർമ്മകളെ തിരിച്ചു വിട്ടു.

………………………………………………………………………………………………………

നീണ്ട 3 വർഷത്തെ പ്രവാസ ജീവിതത്തിനു ശേഷമാണു ഞാൻ നാട്ടിലെത്തിയത്. കല്യാണപ്രായമായി, അച്ഛൻറെ ഒരു സുഹൃത്തിന്റെ മകളെ പോയി പെണ്ണ് കാണണം , അതാണ് വരവിന്റെ ഉദ്ദേശവും. ഞാനും അച്ഛനും ,അമ്മയും പിന്നേ എന്റെ ഉറ്റ ചങ്ങാതി ഫാസിലും കൂടെ ആണ് പെണ്ണ് കാണാൻ പോയത്. വീടിന്റെ അടുത്ത് നിന്ന് ഒരു 4 കിലോമീറ്റർ മാത്രം ഒള്ളു ആ വീട്ടിലേക്ക്.. അവിടെ എത്തിയപ്പോൾ വളരെ ഊഷ്മളമായ വരവേല്പായിരുന്നു ഞങ്ങള്ക് കിട്ടിയത്. അച്ഛന്റെ സുഹൃത്തായതു കൊണ്ടും എനിക്ക് അവിടുത്തെ അച്ഛനെ നേരത്തെ അറിയാമെങ്കിലും അവിടെ ഉള്ള വേറെ ആരെയും എനിക്ക് അറിയില്ലായിരുന്നു..അത് കൊണ്ട് തന്നെ കുറച്ചു നാണവും പേടിയുമൊക്കെയുണ്ടായിരുന്നു, കൂട്ടുകാരൻ ഉള്ളത് കൊണ്ട് സത്യം പറഞ്ഞാൽ രെക്ഷപ്പെട്ട അവസ്ഥയായിരുന്നു.. അങ്ങിനെ പെണ്ണിനെ വിളിക്കാം എന്ന് അവളുടെ അച്ഛൻ പറഞ്ഞപ്പോൾ ആദ്യത്തെ പെണ്ണുകാണലിന്റെ ആകംക്ഷയോടെ ഞാൻ കാത്തിരുന്ന്… ദേ വരുന്നു മന്ദം മന്ദം കയ്യിൽ ചായയും ആയി എന്റെ പെണ്ണ്.. ആ മുഖത്തേക്ക് ഒരു തവണ നോക്കിയിട്ട് പിന്നെ അവിടെ നിന്ന് കണ്ണെടുക്കാൻ എനിക്ക് കഴിഞ്ഞില്ല. പതുക്കെ വന്നു എനിക്ക് ചായ തന്നു അവൾ അവളുടെ അമ്മയുടെ പിറകിൽ പോയി നിന്നപ്പോഴും ഞാൻ അവളുടെ മുഖത്തേക്ക് തന്നെ നോക്കുകയായിരുന്നു…

ഉണ്ടക്കണ്ണു ആണെങ്കിലും അതിൽ ഒരു ഭംഗിയുണ്ടായിരുന്നു, എനിക്ക് ഏറ്റവും ഇഷ്ടപെട്ടത് അവളുടെ ചിരി ആയിരുന്നു. ആ ചിരിക്ക് ആരെയും വീഴ്ത്താനുള്ള ഒരു പ്രേത്യേഗ കഴിവുണ്ടെന്ന് എനിക്ക് മനസ്സിലായി. പെട്ടെന്നു എന്റെ കാലിൽ ‘അമ്മ നുള്ളിയപ്പോഴാണ് എനിക്ക് പരിസര ബോധം വന്നത്..

ഇനി ചെറുക്കനും പെണ്ണിനും എന്തേലും സംസാരിക്കാൻ ഉണ്ടേൽ ആവാം.. ഞാൻ കാത്തിരുന്ന ഡയലോഗ് , അവളുടെ അനിയത്തി വഴി കട്ടിയായി ഞാൻ അവളുടെ റൂമിലേക്ക്, ഞാൻ വരുന്നതും കാത്തു പേടിച്ചരണ്ട മാൻകിടാവിനെ പോലെ നിക്കുന്നു പെണ്ണ്.. എന്ത് സംസാരിക്കണം എങ്ങനെ സംസാരിക്കണം എന്ന് അറിയാത്തതു കൊണ്ടും ഞാൻ ഒന്ന് പുഞ്ചിരിച്ചു, അവളും…

“ടെൻഷൻ ഉണ്ടോ’?

എന്റെ ആ ചോദ്യത്തിനു ആദ്യം ഒരു ചെറു പുഞ്ചിരിയായിരുന്നു

“എന്നെ കുറിച്ച് അവരെന്തൊക്കെ പറഞ്ഞിട്ടുണ്ട്?”

“എല്ലാം പറഞ്ഞിട്ടുണ്ട്” , അവൾക്കിപ്പോഴും എന്റെ മുഖത്തേക്ക് നോക്കാൻ മടിയാണെന്ന് മനസ്സിലായി.

“എല്ലാം എന്ന് പറഞ്ഞാൽ എന്തൊക്കെയ ?”

“അച്ഛൻ എല്ലാം പറഞ്ഞായിരുന്നു, ഗൾഫിലാണെന്നും ജോലിയെന്താ എന്നതുമൊക്കെ”

തന്റെ മുഖത്തേക്ക് നോക്കാതെ താഴെ മാത്രം നോക്കി സംസാരിക്കുന്ന അവളെ കണ്ടപ്പോൾ എനിക്ക് സഹതാപമാണ് തോന്നിയത്..

“ദേവു ”

ആ വിളി കേട്ടപ്പോ പെട്ടെന്ന് അവൾ എന്റെ മുഖത്തേക്ക് നോക്കി.

“അയ്യോ അതാരാ ആ പേര് പറഞ്ഞു തന്നത്”

“എന്തെ അങ്ങനെ വിളിക്കാവോ എനിക്ക്”

“എന്നെ അടുപ്പമുള്ളോരും വീട്ടിലും മാത്രേ അങ്ങനെ വിളിക്കു”

“ഞാനും അങ്ങനെ വിളിച്ചോട്ടെ എന്നാൽ”

അപ്പൊയെക്ക് നാണം കൊണ്ട് ചുവന്നു തുടുത്തായിരുന്നു അവളുടെ കവിൾ ,

“എനിക്ക് തന്നെ കണ്ടപ്പോ തന്നെ ഇഷ്ടായി , ഞാൻ എന്തായാലും ഓക്കേ പറയുകയാണ്. തനിക്കെന്നെ ഇഷ്ടയോ”

നാണിച്ചു തല താഴ്ത്തിക്കൊണ്ട് വെറും മൂളൽ മാത്രം ആയിരുന്നു അവളുടെ മറുപടി..

“എനിക്ക് ഒരു കാര്യം പറയണൂണ്ടായിരുന്നു ”

“പറ ദേവു” എന്തെ എന്നെ ഇഷ്ടമായില്ല?

“അയ്യോ അതല്ല”, “കല്യാണം കഴിഞ്ഞാലും എനിക്ക് എന്റെ ക്ലാസുകൾ തുടരണം എന്നുണ്ട്, പിന്നെ ഏട്ടൻ സമ്മതിക്കുകയാണെങ്കിൽ വല്ല ജോലിക്കും പോകണം എന്നുണ്ട്”

“ഹ ഹ ഹ ” ,

പെട്ടെന്ന് ഞാൻ ചിരിച്ചപ്പോ അവളുടെ മുഖത്തു ചെറിയൊരു പരിഭ്രമം കണ്ടു.

“എന്റെ ദേവു , എന്നെ ഒരു മൂരാച്ചിയായി കാണല്ലേ, കല്യാണം എന്ന് പറഞ്ഞാൽ ഭാര്യയെ ചങ്ങലക്കിട്ട അടിമയാക്കുക എന്നല്ല, എന്നെ പോലെ തന്നെ എല്ലാ സ്വാതന്ത്ര്യവും നിനക്കും ഉണ്ടാകും, നിന്റെ ആഗ്രഹങ്ങൾ നല്ലതാണേൽ അതിനു പൂർണ സമ്മതവും എന്റെ സപ്പോർട്ടും കാണും. ആ ഒരു വാക്ക് എനിക്ക് തരാൻ പറ്റും , പെണ്ണ് കാണലിനു തന്നെ കൂടുതൽ വാക്കുകൾ തന്നു ഞാൻ നിന്നെ ബോറടിപ്പിക്കുന്നില്ല..”

“എങ്കിൽ ഞാൻ എന്നാൽ പൊയ്ക്കോട്ടേ?, ഭാക്കി എല്ലാം കാരണവന്മാര് തീരുമാനിക്കട്ടെ അല്ലെ ”

“അതെ ”

അവളുടെ ആ പുഞ്ചിരി സമ്മാനമായി തന്നു കൊണ്ട് ഞങ്ങൾ അവിടെ നിന്ന്ഇറങ്ങി .

പിന്നെ എല്ലാം പെട്ടന്നായിരുന്നു, തിയ്യതി നിശ്ചയിച്ചു, അടുത്ത മാസം തന്നെ കല്യാണവും ഉറപ്പിച്ചു, ഒരു മാസത്തെ സമയം ഉണ്ടായിരുന്നുള്ളു കല്യാണത്തിന്, പക്ഷെ ആ ഒരു മാസത്തിനുള്ളിൽ തന്നെ ഒരിക്കലും പിരിയാൻ കഴിയാത്ത രീതിയിൽ ഞാനും ദേവുവും അടുത്തു ,

അങ്ങനെ ആ സുദിനം വന്നെത്തി,

എന്റേം ദേവുടെയും കല്യാണം.

 

തുടരും